【戰術覆盤】愛華頓 0：2 車路士　久違嘅零封係咪好嘅開始

戰術深潛1：攻唔入，都唔使由頭嚟過

今場上半場最值得留意嘅，唔係車路士有幾多控球，而係攻勢被擋走之後，個波未必就此交返俾愛華頓。

大約20分鐘附近，車仔有一段連續壓住對手嘅攻勢。第一下打唔入，愛華頓清走；邦仔喺外圍接返，再攻第二次；對手想將個波送出去，車仔又向前攔截，攻勢於是再續多一輪。最後尼圖喺右邊落底，回傳軒達臣起腳，雖然被封阻，但成段唔係靠一個人突然爆Seed，而係幾次回收接埋一齊。

呢種畫面，之前幾場其實唔多。

之前車路士前面攻緊，後面又怕被反擊，中場就要同時兼顧前線同自己個Pat。個波一被頂走，往往無人趕得切接應第二點；萬一對手搶先控球，車仔就要全隊轉身追返去。一次攻勢結束，下一幕多數係自己禁區著火告急。

今場無球時，車路士繼續用接近4-4-2嘅形狀，彭馬同祖奧柏度留前，尼圖同羅渣士回收兩邊，軒達臣拍住卡些度守中間。重要嘅唔係張陣式圖有幾工整，而係幾條線之間無拉得太開，前面有人上搶，後面有無人準備處理被清出嚟嘅下一腳。

所以邦仔可以睇準時機向前截波，唔使每次都先退到禁區等人攻。附近隊友距離夠近，即使佢攔截後未能直接控定個波，亦有人可以接住落點，將球權留返喺車路士腳下。

上半場車仔空中對抗贏咗9/10，至少說明第一點無俾愛華頓佔到便宜。但頂贏只係一半，真正令攻勢延續嘅，係頂完之後有人接。個波如果頂返俾對手，數據上贏咗對抗，場上仍然要再守一次。

當然，呢個唔代表車路士半場已經將愛華頓完全鎖死。Barry接應角球二次傳中嗰次無人看管頭鎚，就證明死球交接仍然有甩漏，馬天尼斯亦要幾次出手。車仔唔係無受壓，只係無再每次失去球權，都立即將成片中場送俾對手。

戰術深潛2：羅渣士引人，哈圖跑

上半場可以持續進攻，但仍然未能打開缺口。愛華頓中路人多，身體對抗亦強，車路士想靠彭馬或者羅渣士接波後直接轉身，往往接得穩個波，已經有人貼埋嚟。

換邊後第一球，車仔就利用咗對手貼身防守嗰一下。

攻勢由馬天尼斯長傳搵左邊嘅羅渣士開始。羅渣士頂住壓力接住個波，先交俾哈圖，再接返。呢一下交換唔止係撞牆，仲令哈圖有時間開始向前跑，羅渣士就留喺原位吸引Maitland-Niles貼近。

對手注意力放晒喺羅渣士身上，佢就用腳踭將個波送去身後。哈圖無停低等波，而係一早沿左邊加速，要愛華頓守衛起步轉身追佢。

羅渣士呢度最有價值嘅，唔係扭過咗邊個，而係佢有能力護住個波，逼對手真係要埋身處理。守衛如果唔貼，佢可以自己轉身；貼得近，身後又會留出哈圖嗰條走線。車仔終於令對手要作一個唔舒服嘅選擇。

哈圖落底之後，中央防守自然收向皮球，同時顧住彭馬嘅接應。尼圖就由另一邊入攝，喺防守注意力之外等到個波。傳中途中有折射，最後落到佢腳下有運氣成分，但佢到達嗰個位置，唔係個波彈過嚟先突然諗起要跑。

呢球由左邊Wing-back製造，右邊Wing-back完成，前面就靠羅渣士接應同彭馬牽制，將幾個位置嘅工作連埋一齊。

更值得留意嘅係，大約58分05秒，車路士又想再做一次羅渣士放哈圖。未必次次成功，但同一條路線再次出現，至少說明第一球唔係純粹靠球員即興撞出嚟。

對白禮頓嗰場，尼圖同哈圖已經試過分別由兩邊後上製造入球；今場對手無留低咁大片反擊空間，車仔就先用羅渣士護球引人，再放哈圖跑身後。同樣係利用兩邊速度，前面多咗一步將守衛拉出位置嘅處理。

所以哈圖今場嘅價值，唔只係交咗一次助攻。佢知道幾時交波、交完之後繼續跑，羅渣士亦知道應該幾時將個波送返出去。兩個人之間有呢種配合，左路先唔係單純等一個人自己爆。

至於尼圖，今場兩球當然值得讚，但第一球之前嗰次無球入攝，同樣係入球不可或缺嘅部分。左邊成功落底，如果遠邊無人跟上，最後都只會多一次傳中，唔會多一個入球。

戰術深潛3：換咗龍門，全隊仍然企得穩

今場有一個未必會出現喺精華，但我幾想特別講嘅細節：拿確斯點樣接應龍門傳波。

事緣上場就已經有幾位巴打屌柒拿確斯話佢表現差，所以我今場有特別睇佢。

龍門攞住個波，後衛唔係企喺附近就叫有接應。有時人明明喺度，傳球線卻被前鋒遮住；有時等到個波傳過嚟先郁，對手已經可以一齊撲上去。

拿確斯今場做得好嘅地方，係會因應龍門同對手位置，先移出一個可以傳波嘅角度，再迎住個波接應。佢唔係等龍門夾硬將個波塞過嚟，而係自己先幫隊友開一條路。

呢啲工作，單睇傳送成功率唔會知道。最後可能只係一腳幾碼嘅短傳，但如果接應嗰個無提早移動，龍門就可能要多等兩秒，甚至最後一腳踢走。之後爭唔爭到第一點、執唔執到第二點，又變成另一場賭博。

車路士上半場可以有耐性等機會，同後場有呢種接應有關。唔係每球都一定要短傳出去，而係龍門手上有選擇，可以交近、可以轉邊，亦可以好似第一球咁，直接長傳搵羅渣士。

但去到下半場，呢份穩定遇上咗一個完全無得預先安排嘅考驗。

馬天尼斯同Branthwaite碰撞後倒地，經過長時間治理，再由彭達斯入替。見到球員咁樣被抬走，場上場下都唔可能無影響，更何況入場嘅係第一次踢英超嘅年輕龍門，而當時車路士只係領先一球。

呢個時候，隊友可以做嘅，係繼續提供清楚嘅接應，同埋做好防線保護，唔好將所有壓力一口氣推俾Panda仔。

愛華頓之後的確多咗球權，但車仔無因此完全失去向前能力。86分鐘彭馬帶住三打二，最後交祖奧柏度起腳被救，就係一次本來應該更早結束比賽嘅機會。處理唔夠好係一回事，但則面證明球隊無因為換咗龍門，就全隊縮返禁區，等對手攻到完場。

Panda仔自己亦有好有壞。84分鐘主動出迎，出拳將傳中打遠，呢下算係一次幫防線解除壓力嘅好決定；88分鐘面對長界外球就處理得唔夠乾淨，要再接住Barry嘅頭鎚。補時93分50秒附近嗰次傳中，我亦會想佢更早預判同出迎，唔好俾個波穿過門前，等Johnson差少少先接唔到。

所以零封唔代表Panda仔每一下都完美，車路士尾段一樣有險情。只係今次隊友仍然守緊位置，前面亦保留住出口，佢唔需要一入場就靠連續神救，先可以幫球隊保住領先。

馬天尼斯傷退，係一件令人擔心嘅事；但單講球隊反應，車路士至少無因為失去正選龍門，就連本身嗰套踢法都一齊失去。

數據深潛：愛華頓多咗個波，卻少咗攻勢

今場最值得留意嘅數字，唔係車路士終於零封，而係愛華頓落後之後，究竟做到幾多嘢。

上半場，愛華頓完成117次傳送，四次射門累積0.32 xG；下半場成功傳送增加到206次，射門反而跌到兩次，xG亦只得0.14。佢哋有更多球權，卻無因此更加接近入球。

呢個同之前幾場車路士領先後嘅情況，分別相當明顯。

之前對手一壓上，車仔就愈退愈深，搶返個波亦送唔返出去，最後連前場出口都消失。今場愛華頓下半場傳得更多，車路士卻仍然完成13次射門，製造1.01 xG，兩次Big Chances亦全部喺換邊後出現。

攻勢來源亦支持呢個判斷。愛華頓全場0.45 xG，只有0.14來自生波；下半場生波xG更加顯示0.00，兩次射門嘅威脅都歸入死球。車仔同期生波xG就有0.77，第一球嘅配合、之後嘅反擊，都唔係得個向前衝嘅樣。

愛華頓多咗球權，車仔無跟住多送機會。對一隊之前領先都令人坐立不安嘅球隊嚟講，呢個先係今場個零最有份量嘅地方。

終於等到零封，但更想大馬平安

完場之後，心入面始終掛住馬天尼斯。

見到佢倒地、醫護人員圍住，再由擔架抬走，真係好難唔諗起當年施治。希望之後收到嘅係好消息，贏幾多球都好，球員平安返嚟先最重要。

另一邊，二安又坐足成場，仍然令我有少少可惜。今場一路只領先一球，沙比想保留原班人維持默契，我理解；但接住熱刺、利物浦、曼聯，如果連今場都等唔到機會，之後又要等到幾時？希望球隊搵到穩定踢法之後，亦搵到方法俾佢參與，而唔係永遠喺後備席等一場「夠穩陣」嘅比賽。

至於我本身估車仔下半場會失波……今次錯得幾開心。

如果我唔出明燈，車仔就有零封，咁下場熱刺不如繼續請假？講笑，下場我仍然會出POST，下篇文見。