【車迷觀點】安素轉會只剩最後24小時 £120M死線要迫嘅係邊個？
安素呢單嘢，一個月前，我仲笑住寫咗篇【割蓆聲明】。
由安素話自己將來想喺馬德里生活，到古古叫佢一齊去馬德里，再到經理人不斷研究離隊可能，成個6月幾乎每隔兩日就傳一次皇馬。最後皇馬可能真係俾人煩到頂唔順，罕有地喺官網發正式聲明，講明無直接或間接接觸安素，亦完全無意進行交易。
暗戀對象公開叫你唔好再有非分之想，正常人應該都會收拾心情，返屋企聽住失戀歌喊兩晚，然後重新做人。當時我亦以為，安素今個夏天嘅轉會故事差唔多可以收檔。
點知套劇居然可以原地換男主角。皇馬走咗，今次輪到曼城入場。
根據《The Athletic》報道，曼城成個夏天都對安素有認真興趣，佢更加係馬……那個男人補強中場嘅首選。不過去到呢一刻，曼城仍然未有正式報價，車路士亦唔打算繼續陪佢哋慢慢玩。球會已經公開落閘：英國時間星期五下午5點，即係香港時間星期六凌晨零時之前，£120m，夠鐘截單，逾時不候。
但再望清楚成件事，又有少少古怪。可能車仔今次想迫嘅，由始至終都唔止曼城咁簡單。
£120M唔係減價促銷，係唔想賣嘅價錢
首先要搞清楚一樣嘢：車路士無將安素列為非賣品，唔代表球會正積極將佢擺上貨架。車仔陣中除咗彭馬卡些度祖奧柏度占士二安嗰類極少數球員，根本無幾多人係真正意義上嘅非賣品。只要價錢去到某個數字，會計部計完數覺得實在太香，邊個都有機會被送上飛機。
但安素身上嗰張£120m價錢牌，亦唔係見到曼城有興趣先臨時加上去。早喺今年5月，車路士已經向佢嘅經理人攤咗牌；加上安素份合約去到2032年，球會既無迫切套現需要，亦無必要為咗避免人財兩失而減價清貨。反正急嘅唔係車仔。
更加重要嘅係，車路士根本無準備好一個「無安素版本」。
沙比阿朗素上任後已經同安素傾過，亦願意將佢重新放入計劃。上季安素各項賽事攻入15球，全隊只少過祖奧柏度；你可以嫌佢防守唔夠好、速度唔夠快、態度又間中令人想車佢兩巴，但將一個負責推進、創造機會兼突然識得入波嘅中場抽走，唔係隨便將另一個人名填落正選名單就取代到。
車仔現時中場人數表面上唔少，卡些度、拉維亞、艾素高、軒達臣、巴高同占士全部都可以踢中路，但「可以踢中場」同「可以代替安素」係兩回事。呢個問題我之前已經寫過，球壇上本來就好難搵到兩個功能完全一樣嘅球員，更何況開季不足兩星期，臨急臨忙先去市場搵人。
到時全世界都知道你啱啱袋咗£120m，賣家唔劏你，唔通留返拜年先劏咩？
所以呢個£120m，唔單止係安素本身值幾多錢。入面仲包括長約控制權、失去正選中場嘅代價、臨近開季先搵替代品嘅風險，以及直接賣人畀英超競爭對手嘅附加費。曼城要買嘅唔止係一個安素，仲要一併買走車路士原本成套季前計劃。
換句話講，£120m唔係咩水魚價，而係一道門檻。車仔無話一定唔賣，只係將選擇題擺返喺曼城面前：真係咁想要，就請連各種稅項一齊找數。
條死線唔止迫曼城，仲迫所有人停止觀望
既然車路士唔急住賣，照道理最簡單嘅做法，就係打開道門等到轉會窗最後一日。曼城幾時準備好£120m，幾時先再坐低傾，反正安素份合約又唔會走咗去。
但BlueCo偏偏唔想等。
曼城而家最想做嘅，當然係等。等巴塞隆拿買唔買到洛迪、等列恩達斯會唔會離隊、等其他中場交易完成，再睇下自己仲有幾多錢同幾大需要。最好拖到轉會窗尾，車仔開始擔心安素無心留隊，先慢慢試價兼研究有無得講價。
車路士今次最叻豬嘅地方，係睬你班友都有味。
你可以等洛迪嘅交易明朗，但安素唔會企喺貨架上面陪你等。真係認為佢係中場首選，就要喺所有條件尚未完全確定之前承擔風險、準備£120m；如果唔願意，星期五之後車仔就當你無心幫襯，落閘收舖。
不過，條死線唔止係落畀曼城，亦係落畀安素同佢嘅經理人。
由公開批評球會決定、同皇馬眉來眼去，到經理人承認研究離隊可能，安素果邊今個夏天一直都玩緊嘢。問題係，皇馬已經親自出嚟封咗其中一個出口，而家真正有能力付款嘅曼城，可能就係最後一個現實選項。
車仔畀佢哋最後24小時：如果真係想走，就請說服曼城正式出價；如果過咗死線仍然無人俾錢，麻煩停止觀望，返去同沙比阿朗素準備新球季。要轉會？下個轉會窗請早。
條死線同樣係畀沙比阿朗素一個答案。開季已經不足兩星期，安素留隊與否會嚴重影響戰術部署，拿臨解決好過將問題拖到轉會窗最後幾日，今日練一套有安素嘅打法，聽日又準備一套無安素嘅Plan B。
甚至連BlueCo自己，都被呢條死線綁住。球會既然公開講明逾時不候，星期六凌晨之後如果突然接受低價，或者畀曼城再續鐘，成個最後通牒就會即時變到同某個強國嗰啲紅線一樣咁有公信力。主動劃線嘅代價，就係自己都要企得穩。
所以BlueCo今次真正想賣走嘅，可能由始至終都唔係安素，而係籠罩住球隊成個夏天嘅不確定性。
曼城要決定買唔買，安素要決定留唔留，沙比阿朗素要決定點樣建隊，而車路士亦要為自己定出嘅界線負責。£120m只係價錢，星期五下午5點先係真正迫所有人表態嘅最後答案。
總結：買就即磅，唔買就收檔
我唔知道曼城會唔會真係掟£120m出嚟，甚至唔肯定車路士收到呢口價之後，係咪真係捨得放人。以我個人立場，安素留低當然最好；但如果有人肯俾足£120m，咁我亦唔會攬住佢隻腳喊住叫佢唔好走。
不過，無論最終結果係邊一個，至少BlueCo今次處理得算係幾靚仔。
過去幾年，BlueCo喺轉會市場做過嘅柒事多到可以俾李力持出本書。但管理球會唔係每次都要預測到未來，而係要預先畫好自己可以接受嘅範圍，然後逼其他人喺入面作出選擇。
收到£120m，車仔就有足夠補償承受失去安素嘅代價；收唔到，安素就留隊，沙比阿朗素可以正式將佢放入新球季計劃。兩個結果都未必完美，但至少都係車路士可以接受，而唔係被曼城、安素經理人或者轉會窗死線逼出嚟。
所以今次我願意讚BlueCo一句：佢哋終於唔係坐喺度等其他人決定車路士嘅命運，而係自己定價、自己定時間，再叫所有人埋位表態。
當然，前提係條死線真係叫做死線。
香港時間星期六凌晨零時之後，如果曼城無出價，安素就應該返去專心開工；如果£120m真係到帳，我哋就再研究車仔應唔應該撳下個確認鍵。至於BlueCo到底係成功奪回主導權，定只係擺咗個好有型嘅姿勢影相，最後24小時之後，我哋再開庭。