【車迷觀點】£125m賣走安素容易　車仔要去邊度搵返個節拍機？

識入波，同控制到場波係兩回事

先代大部份反安素嘅巴打講：「挑，垃圾文，無安素，車仔咪一樣贏波兼識入波。」

安素對富咸只踢咗部分時間，之後對盧頓同白禮頓亦無上陣，三場波車仔合共轟入九球。尤其對白禮頓，沙比更加索性降低控球，用速度同前場質素直接打穿對手。彭馬、羅渣士、祖奧柏度輪流殺入空位，成隊反擊跑起上嚟，確實無乜人會掛住安素。

所以問題唔係車仔無咗安素仲識唔識進攻，而係當比賽唔容許你一路衝，邊個負責叫停成隊。

對富咸領先之後，車仔一度連個波都推唔返上前；對白禮頓雖然反擊極有威脅，但全場只有約25%控球，中段更加長時間被對手壓住。贏波當然最重要，我亦唔會為咗吹奏控球，就將每場比賽都寫成一定要六成控球先叫識踢。沙比主動讓出球權，本身可以係一個完全合理嘅比賽策略。

但主動唔要個波，同想要都攞唔返，外表可以好相似，實際上係兩回事。

當車仔領先想降速，當對手開始全場逼搶，又或者對方縮後唔再送空位出嚟，中場就需要有人不停接波、轉向、再接波。佢未必要交出最後一腳助攻，亦未必係精華片段入面最搶眼嗰個，但成隊幾時向前、幾時轉邊、幾時停低抖啖氣，都要由佢控制。

呢個就係沙比以前喺利華古遜交俾沙卡嘅工作。

沙卡唔係靠速度帶波爆破，亦唔係每場衝入禁區刷入球。佢主要留喺攻勢後方，接應三中堅第一腳出波，再決定將個波送去邊。前面嘅域斯、兩邊翼衛同另一名中場可以四圍走，正正因為背後長期有人幫佢哋整理交通。

安素當然唔係沙卡。佢更加鍾意向前，後上入禁區同直接創造機會嘅能力亦更強。但放低踢法差異，車仔陣中最習慣大量接管球權、由後場開始組織，再用長短傳改變進攻方向嘅人，始終係安素。

過去幾場最多只能證明：車仔無安素，一樣可以製造入球。至於無安素之後，車仔係咪仍然可以控制一場比賽，暫時未證明到，三場都係。

個個都可以代工，但無一個係節拍機

當然，安素留下嘅工作唔會因為無人加盟就憑空消失。沙比仍然可以將佢拆散，再分俾陣中幾個人做。

拉維亞大概係最自然嘅第一個答案。佢願意喺中堅面前接波，受壓下護球同轉身亦夠冷靜，短距離帶波避過第一層逼搶更加係強項。如果只係要搵人負責後場第一腳，拉維亞完全有能力代工。

問題係，接到第一腳只係開始。安素以前唔止幫手避過逼搶，仲要喺之後不斷移位再接波，反覆將進攻由左邊搬去右邊。拉維亞可以令個波安全離開後場，但暫時未證明自己可以長時間用大量傳球控制全隊節奏，身體能否連續負荷更加係避唔開嘅問號。

軒達臣係另一種答案。經驗、場上指揮、長傳轉邊同控制速度，全部都比其他人接近一個傳統中場領袖。沙比要即時搵人維持秩序，佢甚至可能係現階段最可靠嘅選擇。

只不過，可靠唔代表可以長期依賴。以佢嘅年齡同體能，要佢每星期負責大範圍走動兼控制中場，明顯唔係一個完整球季嘅答案。佢更加似屋企突然跳大掣時嗰支電筒，可以即刻救命，但唔會有人真係打算長開支電筒過世。

卡些度亦可以接更多組織工作。佢有能力喺壓力下轉身，亦唔係傳唔到向前波。不過卡些度本身已經要包辦掃蕩、補位、對抗同失去球權後嘅第一輪救火，再叫佢兼任節拍機，等如公司見你做得快，就順手將辭職同事嘅蘇州屎塞埋俾你。最後未必係多一個安素，而係少咗原本最好嘅卡些度。

占士、古斯圖甚至巴高移入中路，就可以幫手增加接應點，令雙中場唔使由頭到尾孤軍作戰。呢個方法可以改善結構，但多一個人企喺中場，唔等於自然多咗一個人控制中場。有人幫手駁腳，同有人負責定節奏，始終係兩個層次。

所以車仔並非完全無辦法。拉維亞可以接第一腳，軒達臣可以維持秩序，卡些度可以幫手推進，閘位內收亦可以提供人數。將幾個人拼埋一齊，理論上足以分擔安素大部分工作。

問題係，每一個代工方案都有代價，而且無一個真正回答到最核心嗰句：

去到比賽最混亂嗰陣，究竟邊個有能力踩住個波，叫其餘十個人跟返自己嘅節奏行？

最有效亦最肉痛嘅選項

如果拉維亞、軒達臣同卡些度都只能接走部分工作，車仔其實仲有一個更加直接嘅選擇。

將彭馬拉返落中場。

呢個做法唔算新鮮。上季彭馬已經經常墮後接波，由中場甚至後場開始策動進攻。佢處理球權嘅質素亦完全足夠，接波前會先觀察四周，受壓下有能力轉身避過對手，短傳、直線同轉邊更加全部識做。安素離隊之後，陣中最有能力睇清全場，再決定下一腳點行嘅球員，可能已經變成彭馬。

而且車仔前場人手夠多。彭馬拉後一格，空出嚟嘅進攻位置仍然可以交俾羅渣士、二安或者祖奧柏度。純粹由人數計，呢個調動甚至可以令人覺得無乜損失：少一個中場，多一個前鋒，大家交換一下工作就得。

問題係，足球從來唔係淨係數場上有幾多人。

彭馬愈早落嚟接波，就愈遠離最能夠傷害對手嘅位置。佢可以幫車仔由後場解圍、將個波帶過半場，再親自整理進攻；但做完前面嗰幾步，佢未必仲趕得切出現喺禁區頂，交出最後一腳傳送或者射門。

即係為咗確保個波成功運到前場，車仔要將前場最有威脅嗰個人抽返落去運波。

短期而言，呢個可能真係最有效嘅答案。尤其對住高位逼搶或者需要控制球權嘅對手，彭馬拉後可以立即提升中場用波質素，亦有人真正負責將前後兩截駁返埋一齊。代價就係沙比要犧牲彭馬部分攻擊力，將佢由終結問題嘅人，變成負責將問題搬運到前場嘅人。

車仔當然可以咁踢，但如果每逢中場失控，都要靠陣中最好嘅攻擊球員返去執手尾，咁只係證明問題暫時被遮住，唔係已經解決。

感想：遙控無咗，唔代表部電視開唔到

£125m賣安素，我仍然唔覺得係錯誤決定。

球員想走，曼城願意支付追平英國紀錄嘅價錢，車路士亦無低過自己原定底線放人。呢張支票無理由唔收。

問題係，賣得好唔代表善後做得好。Camara最後一刻嚟唔到，車仔突然由「準備更換節拍機」，變成要用現有人腳逐件代工。

車仔個前場依然好似一部4K HDR大電視。畫面夠靚、功能夠多，開啱台一樣可以睇到大家嘩嘩聲。只係球會用£125m賣走咗個遙控，想新買一個又俾摩納哥臨出貨前取消訂單。

無遙控唔代表部電視報廢。你可以撳機身啲掣、裝手機App，甚至叫彭馬負責行埋去轉台。方法實有，純粹每一次操作都比以前麻煩。

最弊係，當全隊最有才華嗰個人忙住幫你轉台，前面又有邊個負責表演？

短期內，沙比可以靠分工同調位頂住；但長遠而言，車仔仍然要搵返一個真正識得接管球權、控制速度同轉移進攻方向嘅中場。未必要係另一個安素，但一定要有人接手節拍機呢份工作。

否則£125m的確成功入咗數，足球上嗰張單，就只係留俾其他球員慢慢找。

咩話？某啲足球專業話車路士有 7 個中場慢慢揀………？嗯，佢地連青訓都計埋……高見高見……小弟佩服佩服………