【戰術覆盤】聯賽盃 車路士6：3列斯　副選唔係無料只係未砌好

兩個斷點，成條傳導鏈就此斷開

我會話車路士上半場並唔係完全無部署。

無球時維持3-4-3，古斯圖同查華利亞負責兩邊；進攻時邦仔外移到右閘，古斯圖就推上去同二安配合，畫面變成接近4-2-3-1。巴高同屈臣留喺中間，理論上先將個波帶離後場，再交俾兩邊或者前場三個處理。

開局十幾分鐘，車路士亦確實控制到球權。問題係個波去到中場同右路，就先後出現兩個斷點。

第一個係屈臣。

先唔好誤會，我唔係話佢屎波。16歲第一次為一隊上陣，屈臣處理個波其實相當冷靜。上半場29次傳送成功27次，93%成功率；自己半場更加19腳全中，完全唔似一個仲返緊學嘅小朋友。甚至佢有一下前場搶斷，差少少就造成入波。

但安全完成傳送，唔等於推得到成隊向前。

屈臣上半場只有12.3米向前推進距離，無創造機會，亦無成功扭波。當列斯開始提高對抗強度，佢亦逐漸難以保護球權。佢有兩次Tackle同三次Interception，證明唔係企喺度睇波；只係搶到之後，往往仍然要將個波交返俾旁邊或者身後嘅隊友。

對一個16歲新人嚟講，今次表現絕對唔算失禮。問題係沙比將佢放喺巴高身邊，要求兩個人同時負責接應、對抗、向前推進同保護三中堅。屈臣完成到最安全嗰部分，其餘工作就自然集中落巴高身上。

到巴高將個波送過中場，第二個斷點又出現。

古斯圖推高之後，本來應該係車路士右路最重要嘅接應點。二安內切，佢可以沿邊線後上；守衛跟住佢，二安身邊又應該會出現空間。企位上似乎有兩條路，實際個波去到古斯圖腳下，攻勢卻經常突然斷開。

佢上半場29次傳送只成功20次，九次傳失係全隊最多；去到列斯半場更加12次只成功6次，亦無創造任何機會。即係車路士好不容易將個波由後場運上去，去到最應該完成撞牆、傳中或者放二安入身後嗰個位置，最後一步就處理唔到。

古斯圖唔係無跑，亦唔係無嘗試配合。只係呢個角色要求佢喺狹窄位置迅速判斷應該自己去、交俾二安，定回傳重新開始。當決定慢半拍或者傳送執行唔到，佢企得越高，失去球權後留低嘅空間亦越大。

所以車路士上半場唔係無人識傳波，而係兩個連接口一齊失靈。屈臣無法穩定將球權向前推，迫住巴高承擔更多物流工作；到個波終於送上右路，古斯圖又未能將接應轉化成威脅。

成套4-2-3-1個樣已經砌好，部車就撻極都着唔到。

同樣傳失，點解羅渣士斷有價值D？

沙比半場一次過換入占士、彭馬、尼圖同羅渣士，表面上係用四個正選救火，實際上就係將上半場混亂嘅工作重新分配。

占士接管古斯圖原本嘅右路位置，負責拉闊、接應同保護身後；彭馬取代屈臣喺中場嘅工作，不斷墮後去巴高附近攞波，成為真正決定節奏嘅人。尼圖換走二安，用速度將列斯防線向後拉；羅渣士就由基頓斯原本嘅左路出發，自由走入中路，甚至反覆出現喺右Half-space。

落後0：2之後，車路士嘅反撲先由十二碼打開缺口。真正令列斯防線開始跟唔上嘅，就係彭馬同羅渣士加入之後，進攻終於有人決定幾時加速、幾時轉向。

55分鐘，羅渣士接應界外球後順勢一撥，彭馬立即取得起腳空間射成2：2。57分鐘彭馬再放占士單刀；60分鐘又由彭馬直線劏入中路，羅渣士倒地將個波引到尼圖面前，車路士六分鐘內由0：2反超前。

去到65分鐘，羅渣士更加由右邊Half-space直接硬爆Muharemovic，再沿底線回傳。彭馬嘅走位吸引咗中間守衛，韋碧克就得到空間轉身射成4：2。80分鐘第五球，羅渣士又再喺右邊落底送波入禁區，最終由巴高完成埋門。

羅渣士明明由左路入場，幾次致命處理反而全部喺右邊出現。呢種流動正正令列斯最難防。尼圖留喺外線拉闊，彭馬喺中間吸引注意；羅渣士唔需要守住固定位置，只需要搵對手交接最混亂嗰個Half-space殺入去。

將古斯圖同羅渣士嘅數據放埋一齊，亦可以睇到點解同樣係失去球權，效果可以完全相反。

兩個人都踢45分鐘，傳送成功率同樣係69%；古斯圖失去11次球權，羅渣士更加有12次。單睇傳失同球權損失，羅渣士根本無令車路士踢得更加安全。

分別係古斯圖零Key Pass，羅渣士就創造四次機會兼交出三次助攻。佢三次扭波成功，亦完成11次帶波。每次冒險未必成功，但成功嗰幾次，已經足以直接拆開列斯防線。

當然，兩個人並非踢緊相同位置。呢組比較唔係要證明羅渣士應該取代古斯圖踢Wing-back，而係要說明風險本身唔係問題，問題係失敗同成功分別可以換到啲咩。

上半場古斯圖一傳失，攻勢就此結束；下半場羅渣士即使斷纜，下一次攞波仍然可以直接插入對手心臟。

沙比無將比賽變得更安全，佢只係換入一班更清楚應該喺邊度冒險嘅人。

前面重新駁通，後面繼續漏電

車路士換人後，進攻由斷斷續續變成一插即着。問題係前場重新駁通，唔代表後面突然識得防守。

其實上半場已經有警號。21分鐘，彭達斯先連續救出Aaronson同Muharemovic近門攻勢；之後嘅角球，古斯圖喺遠柱失去對位，Muharemovic幾乎無角度之下仍然頂入。

車路士第二個失球就更加熟口熟面。巴高中場失去球權，岩柏度再由外線突破羅渣士，傳中經Nmecha一撥，Aaronson由後面入攝。車路士成條防線嘅注意力跟住個波移向近柱，禁區中央就咁突然清空。

去到75分鐘，列斯第三球又係類似原理。對手由左路將個波送入禁區，車路士守衛自然收向有球一側，中場卻無追到第二線後上嘅Calvert-Lewin，結果中路再次無人接管。

呢種失球同對阿仙奴第二球幾乎有親戚關係。當時夏維斯近柱漏過傳送，奧迪加特由後面入攝；今場就由Nmecha一撥，再交俾Aaronson完成埋門。兩次都係第一個接應點吸引晒注意力，真正起腳嗰個反而無人理。

死球防守同樣無改善。列斯全場2.39 xG入面，足足1.46來自死球。即係佢哋最大部分威脅，唔係靠長時間流動進攻拆開車路士，而係不斷將個波掟入禁區，再靠身高、落點同第二點製造混亂。

最尷尬嘅係，車路士攻入六球，列斯仍然錄得36次禁區觸球，遠多過車路士嘅22次。個比分睇落係大炒，車路士個禁區實際上由頭到尾都無真正安全過。

所以沙比半場整好嘅，只係車路士點樣攻擊列斯。

至於列斯點樣攻擊車路士，個答案一直無變：將個波送入去，等佢哋自己漏人。

數據深潛：八腳中龍，八個入球

下半場到底有幾痴孖筋？

車路士11次射門，6次中龍，入6球；列斯9次射門，2次中龍，亦入2球。兩邊加埋八腳射門中龍，全部變成入球，兩個門將全個下半場連一次成功撲救都無。

呢個已經唔係正常足球環境。

車路士下半場錄得2.98 xGOT，代表六次中龍本身處理得相當高質素，但最終入足六球，仍然係射術、門將表現同混亂一齊推到極端嘅結果。

不過，車路士嘅改善亦唔係純粹撞彩。上半場球隊只有0.31 xG，換邊後就升到2.09。即使當中包括彭馬嗰個十二碼，四個換人仍然明顯將攻勢帶到更危險嘅位置。

Game State亦幫手將場波徹底拆散。列斯48分鐘領先2：0，本來可以收後守住，偏偏車路士五分鐘後就靠十二碼追近，彭馬再兩分鐘後扳平。原本可以慢慢管理嘅兩球優勢突然消失，列斯想搶返主動，防線自然愈推愈高。

換句話講，下半場嘅空間唔係全部由沙比四個換人憑空創造。後備提升咗車路士利用空間嘅能力，十二碼同短時間內連續入球，就負責將比賽推入邊個搶到波就向前衝嘅狀態。

亦因此，6：3將雙方實際差距放大得相當誇張。車路士全場xG係2.40，列斯就有2.39，兩隊製造嘅機會質素幾乎完全一樣。

車路士值得贏，因為下半場向前效率同埋門處理明顯高一截；但贏足三球，主要係極端把握力將嗰段優勢放大。

所以呢場最準確嘅形容，唔係車路士半場重新控制咗比賽。

場波仍然失控，只不過今次車路士每次拔槍，幾乎都真係有人中彈。

總結：贏咗場波，但副選………

完場一刻，我係笑住收貨嘅。

作為一場聯賽盃，娛樂性已經超額完成。由兩球落後到反Cup贏6：3，有處子入球、有助攻帽、有痴線撲救，仲有半場免費Mario Kart。你想搵開心位，成場波幾乎任揀。

但如果賽前條問題係，車路士班副選係咪真係有料砌埋做另一隊，今場恐怕答案仍然係「未得」。

今場至少證明沙比手上有足夠零件扭轉比賽，佢亦確實有能力重新分配工作，將散開嘅進攻駁返埋一齊。至於可唔可以唔使每次等部車撞到就散，先搵彭馬同羅渣士落嚟重新組裝，就係另一回事。

好啦，英格蘭本土歐聯大勝6：3，成功晉級。作為觀眾，我真係無資格再投訴。

只係下一次，可唔可以唔好等跌到包尾，先食星星衝返上嚟………？