【球壇風向室】新帥對手觀察區EP3 迪沙比教咗熱刺半年仲喺榜尾
今季最令人大跌眼鏡嘅球隊，唔係車路士，而係駛咗大筆錢買人嘅熱刺。就算新iPhone有兩個Mon，我哋睇英超積分榜仍然要拉到最底先搵到佢哋個名。無他嘅，熱刺家陣係20弟嘛。
嗱嗱嗱，我知你想問候我全家：「迪沙比唔撚係新帥，做咩放佢入新帥對手觀察區？」
無錯，佢三月底已經上任。但嗰陣熱刺趕住護級，佢自己都話無時間慢慢教踢法；救完火，經過一個夏天再買咗班人，今季先係我哋真正睇佢想點改造熱刺嘅時候。問題係，五場聯賽踢完，新嘅踢法開始見到，勝仗就一場都未見到。
迪沙比話有世盃、傷患，新援又遲到。呢啲困難我信架，真係信，不過唔係得熱刺一隊有。所以今篇想睇嘅唔止係佢有幾唔好彩，而係熱刺個波究竟踢到邊一步、卡住喺邊，同埋迪沙比自己可以點拆。
一、後面傳得幾靚都無用
迪沙比嘅波，從來都唔怕由後場慢慢搓。只要對手一壓上嚟，熱刺就嘗試搵出跑空嘅人，將個波送過第一道防線。頭五場睇落，班球員的確知道後面要點樣砌，係，到後面為止，前面？仲係一大個問號。
對愛華頓就幾典型。熱刺有62%控球，亦有13次攻門，但全場只有0.82 xG，連一次黃金機會都無。蘇蘭基正選踢咗六十幾分鐘，只得一次禁區觸球，零射門。個波長時間喺熱刺腳下，佢喺最需要接波嘅地方卻幾乎摸唔到波。
當然，前鋒自己點走位、點樣同隊友配合，都有責任。但問題又唔止蘇蘭基一個。李察利臣對賓福特同樣零射門；馬莫殊加盟之後，亦未見到隊友可以穩定送佢入到危險位置。頭四場熱刺合共有49次攻門，黃金機會得兩次，呢個已經唔係單靠叫前鋒「醒目啲」就解決得到。
迪沙比賽後話要改善最後一傳同最後決定，呢點佢睇得無錯。熱刺有時真係可以由後場一路傳到對方禁區附近，但有人插入去嗰一下，就人快波慢；一係就幾經辛苦傳到，接應嘅人又未必喺最舒服起腳嘅位置。所以結果就係想搵個入波都難。
二、好波每場只踢到一輪
如果只睇結果，頭四場零入球，去到對維拉先終於入兩球，我估唔少人會覺得熱刺唔識攻門。但拆開睇又唔係咁。尤其對維拉，熱刺造到四次黃金機會、2.42 xG，前面終於有返啲威脅。尷尬在於，攻勢踢出嚟嗰場，佢哋仍然失三球輸波。
對紐卡素，熱刺亦試過用更積極嘅迫搶扭轉場波。下半場PPDA由7.4降到3.4，出手干擾對手快咗；攻門由上半場七次升到九次，黃金機會反而由一次變成一次都無。即係佢哋有能力將場波節奏推快，但暫時未有能力保證推快之後會更接近入波。紐卡素下半場就入咗兩球。
對維拉更令人在意嘅，係比賽一唔跟Plan走，熱刺就頂唔住。雲迪雲離場治理，熱刺短暫得十個人，迪沙比已經安排賓坦古亞補入後防，但球隊仍然喺上半場補時失波。到下半場，一腳長波又打亂防線。迪沙比賽後無迴避，話球隊當時應該溝通得更好，落後之後亦急住傳前，踢到失去平衡。
三、難做可以解釋，但解釋完要有做法
再睇返訪問，迪沙比話世盃、傷患同新援遲到，令熱刺無辦法一開季就用齊班人練波。但……世盃唔係得熱刺球員要踢，傷患亦唔係得佢哋先有；至於新援幾時買返嚟，領隊未必話到事，但球會總唔能夠當成天跌落嚟嘅意外。
何況迪沙比唔係今夏先接手。上季佢趕住救火，無時間慢慢教踢法，熱刺球迷明。七月佢自己都話，今次終於有時間改善球隊嘅踢法同組織。到開季踢咗五場，熱刺由後場推進的確有咗個樣；只係前面接唔到、入球難產，場波一變又容易亂。問題已經睇得幾清楚，再講一次準備不足，唔會令個波自己傳到前鋒腳下。
當然，兩個入球對住6.45 xG，球員把握機會差亦係事實。迪沙比唔使親自落場射波，但佢要決定邊個踢、點樣供應，同埋當原本嘅安排唔奏效，幾時換一個方法。呢幾樣，先係國際賽期之後要睇佢交嘅功課。
有個樣，幾時有埋結果？
有趣嘅係，望下車仔再望下熱刺，我又唔覺得熱刺係一隊完全唔知自己做緊乜嘅波。佢哋識得由後場傳出去，對維拉亦終於製造到足夠機會。迪沙比教緊啲乜，場上係見得到嘅。
作為車迷，下次對熱刺，唔好見到「20弟」就以為可以求其迫兩下。佢哋有能力將個波傳過你第一輪逼搶。如果國際賽期真係俾佢哋搵到答案，件事可能會嚟個360度反轉都唔定。(360度，嗯。)
迪沙比想大家俾時間佢，可以。只係佢都要話俾大家睇，呢段時間究竟用咗嚟解決啲乜。但過多幾場都仲喺20位啦喎……恐怕車仔要遇到迪沙比就會有少少難，執生啦兄弟。