【死因研究】社區盾 阿仙奴 3：0 曼城　該冒險時保守該保守時裸跑

案情重組：曼城點樣死？

阿仙奴開賽23秒就由卡拉費奧利先開紀錄，28分鐘再由夏維斯頂成2比0。曼城上半場曾經由科頓同夏蘭特起腳，但都被拉也救出，半場落後兩球。

換邊後，曼城以基亞利殊入替杜古，但48分鐘再被奧迪加特攻入第三球。球隊隨後陸續換走夏蘭特、奧懷利、科頓同安達臣，仍然無法改變戰局，最終以0比3落敗。

曼城全場錄得更多射門、禁區內觸球同進攻半場傳球，但預期入球只有0.77，黃金機會亦只有一次。控球同進攻次數都有，真正威脅就無。

死因一：前面想搶，後面裸跑

曼城第一個死因，唔係無搶迫，而係搶迫得太過天真。

由企位上睇，曼城並無打算退後捱打。兩翼推前封鎖阿仙奴中堅，中場跟住向前，防線亦企得相當高，希望壓縮空間，將對手困喺後場。

問題係，高位防線只係防守策略嘅其中一環。前場封唔死傳球路線，中場又未能及時補位，條高位防線就唔再係壓縮空間，而係主動送出身後空間。曼城今場正正就係前面擺出一副想食人嘅樣，後門就打開任人參觀。

開賽23秒嘅第一個失球，已經係最完整嘅示範。

阿仙奴由加比爾直接向前交俾奧迪加特，幾次簡單撞牆同轉邊之後，曼城第一層搶迫已被完全帶走。當美利斯基利接應賓韋治嘅傳球，佢唔止有時間轉身，仲有空間觀察卡拉費奧利嘅走位，再用一腳收埋意圖嘅直線劏穿防線。

卡拉費奧利由左路突然切入中路，古辛洛夫嘅注意力就被外圍嘅迪蘇利斯拉走。到佢發現真正威脅來自身後，卡拉費奧利已經進入禁區。

成個過程入面，曼城每一個人好似都有做緊自己工作。前線有推高，中場有追人，守衛亦有跟住目標移動。但當阿仙奴用走位將佢哋逐個拉開，就無人負責保護最重要嘅中央通道。

問題唔係某個球員單獨犯錯，而係每個人都做緊一件合理嘅事，組合起嚟卻變成一套完全唔合理嘅防守。

第二個失球亦係同一種病，只係換咗另一種死法。奧迪加特拉到右邊出波，迪蘇利斯喺遠柱無人看管，可以舒服咁將個波頂返中間；夏維斯擺脫加華度爾，就咁頂成2比0。曼城防線人數唔少，但無人處理遠柱，亦無人阻止夏維斯攻擊第二點。

數據亦反映兩隊搶迫質素嘅差距。上半場阿仙奴完成11次搶截同5次截球，曼城就只有5次同3次；地面對抗方面，阿仙奴亦以16比11佔優。當時懷斯甚至仲坐喺後備席，阿仙奴單靠古馬雷斯、美利斯基利同奧迪加特，已經足以掌握中場節奏。

阿仙奴嘅搶迫係將曼城趕去指定位置，再集體收網；曼城嘅搶迫就似一班人同時向住個波跑，第一個人一旦被過，後面就只剩下一大片需要救火嘅空間。

曼城唔係單純輸在防線企得太高，而係無提供任何條件，令條防線可以安全地企得咁高。

該保守嘅時候，曼城選擇咗裸跑。

死因二：該冒險時回傳　曼城自己放棄快攻

曼城今場最接近製造威脅嘅時刻，大部分都來自快攻。

18分鐘，安達臣將個波直接送入禁區，只係夏蘭特未準備好；36分鐘，杜古直線劏穿防線，再次搵到夏蘭特；40分鐘，安達臣一腳斜傳搵到杜古，之後夏蘭特同杜古先後起腳。

呢幾次攻勢嘅共同點，係阿仙奴仲未回防企穩，曼城就已經將個波送到前線。即使最後無入球，至少成功逼到對手防線轉身，亦令夏蘭特可以喺禁區內起腳。

問題係，曼城無將呢種直接進攻當成主要武器。

每當佢哋搶到個波，第一個選擇往往唔係立即向前，而係先回後重新組織。中堅接應、交俾中場、再轉去另一邊，等到真正推進至前場，阿仙奴大部分球員都已經返回自己位置。

全場曼城完成519次傳球，當中307次喺進攻半場完成，亦有33次禁區內觸球，三項數字全部高過阿仙奴。但最後只有0.77預期入球同一次黃金機會，12次射門有5次來自禁區外，14次傳中亦只有2次成功。

下半場更加誇張。曼城喺進攻半場完成186次傳球，亦有22次禁區內觸球，但只製造出0.44預期入球，連一次黃金機會都無。

阿仙奴領先三球之後，根本唔介意曼城喺外圍控球。曼城可以將個波傳入對手半場，亦可以踩入禁區，但禁區內無明確接應路線，外圍亦無足以拉開防線嘅走位。最後只能夠靠卓基遠射、施曼尤個人突破，或者成功率極低嘅傳中碰碰運氣。

控球本身無錯，回後組織亦唔係罪。但當最有威脅嘅進攻偏偏來自對手未企穩嗰幾秒，繼續主動放棄快攻，就等於幫阿仙奴爭取免費嘅回防時間。

曼城唔係搵唔到逃生門，而係每次道門一打開，佢哋都選擇先回傳一下。

死因三：換人只係換名，無換到踢法

半場落後兩球，曼城最需要嘅唔止係新球員，而係一個新答案。

但那個男人半場只係用基亞利殊換走杜古。呢個換人本身唔難理解，基亞利殊更加擅長控球，可以協助曼城喺左路留住個波；問題係，曼城上半場真正有威脅嘅攻勢，偏偏大部分都由杜古參與。

當球隊已經踢得太慢，換走最願意直接向前嘅球員，效果就可想而知。下半場開始僅僅三分鐘，曼城再次被阿仙奴用小組傳球拆散，奧迪加特射成3比0。

第三球之後，曼城喺短時間內連續換入馬慕殊、古希、歷高路易斯同卓基，換走夏蘭特、奧懷利、安達臣同科頓。考慮到部分球員啱啱踢完世界盃，當中可能有預定嘅體能安排，未必全部都係臨場判斷。

但無論換人原意係乜，場上問題始終無被處理。

人腳換咗一批，進攻方式仍然係外圍傳球、轉邊，再等待某個球員靠個人能力打開缺口。無論係邊路二打一、增加禁區人數、後上攻門，抑或針對阿仙奴防線某個位置，曼城都無展示出一套清晰而持續嘅進攻方案。

結果，曼城下半場有22次禁區內觸球，卻連一次黃金機會都製造唔到。佢哋唔係入唔到危險區域，而係入到去之後，無人知道下一步要做乜。

換人可以增加體力、技術同不同類型嘅球員，但無辦法代替一套不存在嘅後備方案。

那個男人叫齊救護員入場，最後先發現大家都無帶工具，白搞一場。

總結：一場警報，唔係一季死刑

公平啲講，社區盾始終只係球季第一場正式比賽。曼城正經歷重大轉變，新兵同舊將仍然需要時間適應；阿仙奴由領隊到核心陣容都更加穩定，今場狀態較好並唔令人意外。

所以，0比3唔足以證明曼城今季注定失敗，亦無必要因為一場波就幫那個男人搵定下一份工作。真正值得擔心嘅，係比賽由頭到尾都無出現過一段令人相信佢哋知道點樣扭轉局勢嘅時間。

一支新球隊可以未成熟，可以執行得差，甚至可以輸得肉酸。但至少應該令人睇得出，當原本嘅計劃失效，佢哋準備向邊個方向修正。

曼城今場無俾到呢個答案。

今次驗屍唔係宣判那個男人嘅曼城時代已經死亡，只係確認佢第一日返工帶嚟嗰套計劃，23秒開始失血，48分鐘正式無生命跡象。

希望佢12月唔會再經歷另一次最黑暗嘅48小時啦。（笑）