死因研究

【死因研究】車仔舊中鋒組復仇者聯盟?拆解 114 英超三連敗嘅結構性死因

發布於

積臣對 114 入兩球,隔兩輪到戴納,一樣入兩球。唔係啩,車仔啲舊中鋒幾時組咗隊復仇者聯盟㗎?做咩無人通知我嘅?

中間仲夾住一場白禮頓,雖然無任何車仔球員客串,但 114 照輸。開季氣勢如虹咁殺出英超七連勝,跟住三場突然間一分都拎唔到。那個男人個走勢,跌得仲急過最近嘅美股。

本身我都無諗住特登開 File 寫,但有巴打敲碗問起,於是我就走去翻睇森林嗰場。望多兩望,唔係喎,呢波三連敗點睇都唔係單一意外。由七連勝嘅順風順水,去到維拉、白禮頓、森林三場食白果,114 嘅三分,最後係點樣一滴一滴漏走嘅?


死因一:114 唔係一開波就俾人撳住砌,而係「極早送禮」打亂部署

維拉同森林,第 6 分鐘。白禮頓,第 11 分鐘。三場加埋,114 踢住 0–0 嘅時間得大約 21 分鐘。開波前部署咗成個禮拜,有兩場分分鐘巴打們都仲未開到直播,114已經失咗波。

失球最直接改變嘅,係邊隊要先行出嚟。打和嗰陣,那個男人可以叫中堅多傳兩腳,等對面有人行前迫。對手一郁,後面就可能騰到位,俾中場轉身,或者俾翼鋒接波向前。但一落後,對手有一球揸手,對面大可以留多個人喺中路,收窄禁區前面嘅空間。你兩個中堅想互傳多三四腳?得呀,你哋慢慢猜。

對白禮頓最容易睇到呢個變化。114 嘅前場控制率由 0–0 時約 24%,升到落後之後約 88%。戰線推到好前,但白禮頓可以接受大部分時間無波,只要守住入禁區嗰幾條線。114 要打入去,就要有人離開原位去接應,有人推高幫手拉開防線。到白禮頓搶返個波,嗰啲人又要趕返嚟。

早失一球,當然仲有時間追。最傷係之後大半場,對手可以等你郁,你就要一路諗點樣迫佢郁。 114 三場都咁早交咗呢個選擇權出去。


死因二:把握力斷電,點射都入唔到

三場敗仗,114 合共射咗 46 腳,造到 5.46 xG,結果只入兩球。更有意思係,同開季七連勝相比,114 場均射門仲多咗,但每腳平均 xG 由 0.175 跌到 0.119。起腳多咗,平均每腳嘅機會反而差咗。

白禮頓嗰場就最難睇。那個男人換入卓基之後,卓基有一腳直線真係穿過防線,送紐尼斯入禁區起腳。去到尾段,奧萊利嗰球頭槌亦值 0.37 xG,結果頂斜。114 下半場有 1.88 xG,白禮頓嗰一球優勢由 11 分鐘守到完場。當你真係打穿咗對手,嗰一下就係成次進攻最值錢嘅地方。頂斜咗,又要由頭嚟過。

對維拉,114 第二次落後之後都有六次起腳,加華度爾仲有一腳近門起腳畀鈴木彩艷救出。白禮頓嗰場係自己頂斜,維拉嗰場有門將幫手頂住。前面入一球都咁難,後面就更加經唔起不停送禮。


死因三:防守屢次派膠,追返都可以再輸

積臣同戴納各入兩球,佢哋各自嘅第二球擺埋一齊睇就相當有趣。兩個人都先交走個波,再跑去接返。114 嘅防守一路跟住個波郁,交完波嘅人就咁走甩咗。

對維拉,114 當時已經追平,成隊向右移去迫,另一邊嘅 Mbaye 有大量空位跑。積臣分波之後再入禁區,114 明明有人趕得切回防,但大家嘅注意力去晒 Mbaye 度,冇人接手跟返積臣。

森林嗰球就更加直接。114 壓上想追和,安素已經入咗禁區。戴納一個撞牆過晒紐尼斯同安達臣,身後就只剩戴亞斯。戴納再交畀傑斯韋治,自己繼續向前跑,接返傳送嗰陣,成段路幾乎冇人阻佢。維拉嗰球係有人返到去,但漏跟人。森林嗰球係第一輪逼搶畀人過咗,身後已經冇足夠人接手。

對維拉,夏蘭特辛苦追返個 1–1,八分鐘後又要再追。對森林,卓基追到 1–2,戴納轉頭就拉開返兩球。兩場最傷嘅位都係,前面啱啱幫你救返少少,後面就送返出去。


總結:抽水還抽水,我信佢哋會反彈

九月寫那個男人嗰陣,我話佢去到 114,遇到路況唔同,識轉波扭軚。睇完呢三場,我仲係咁諗。對白禮頓換入卓基,前面就真係多咗一條路。

但下次 114 再要追波,或者應該要將視線望去安達臣身後。安素行前幫手,安達臣去搶第一下,呢啲都係可以理解嘅決定。到第一下搶唔返,場邊仲未有時間嗌,場上已經要有人知道自己應該企邊、跟邊個。嗰幾秒先最考那個男人平時教落啲乜。

至於積臣同戴納,兩條友都突然上力,好事嚟,唔該加拿祖都生生性性,加入埋復仇者聯盟,咁就大家都開心。