【賽前明燈】英超 車路士對熱刺 八月嘅功課沙比做成點?

上場對愛華頓,小弟事忙無出文,成功避過一劫。本身準備估車仔至少入兩球,再加愛華頓下半場有波入,結果車仔贏2:0,一中一錯。好彩無出街,正式戰績維持十六中九,命中率56.25%。
跟住今場,主場對熱刺。
八月喺悉尼,踢多件都輸1:2,唔知大家仲記唔記得。當時我寫,熱身賽輸波唔使急住判沙比死刑,搵到問題就帶返去慢慢執。兩個幾月過去,車仔連贏兩場,仲終於有返英超零封,家陣可以問下:當日話要執嗰啲嘢,執成點?
對愛華頓嗰份耐性,今場唔好掉低
八月對熱刺,車仔最先出問題嘅係中場。拉維亞有幾次破壓做得好,但佢同艾素高一齊踢,熱刺一埋身,接波同傳波就開始甩拍。東拿利嗰球更加直接:艾素高失波,加拉加前插拉走守將,禁區頂空出嚟,俾東拿利起腳。射門有折射係一回事,但起腳前車仔自己散咗係事實。
而家卡些度返嚟,身邊多咗軒達臣,中場終於有人搶波、接應同補位。對愛華頓尤其值得記住,因為嗰場車仔無閃電開局,上半場仲要同對面不停爭波、地面對抗,前面亦未搵到太多舒服機會。班人頂住咗,無因為半場仍然0:0,就急住將成隊推上去。
沙比半場再針對愛華頓嘅人盯人壓迫調整出波,尼圖下半場開波43秒就入波。之後愛華頓追比分,車仔仍然保留到前場接應,搶返個波有地方交,對手亦無辦法將我哋長時間困喺禁區。連馬天尼斯突然傷出,都無令成隊亂晒。
呢場先係今次值得帶返史丹福橋嘅經驗。對熱刺,主場球迷當然想快啲入波,但如果踢咗二十分鐘都未開紀錄,車仔有足夠理由繼續按部署踢。保持自己節奏先係呢場波嘅重點。
熱刺最想要嘅空位,車仔唔使送
十月初寫迪沙比嗰篇,我已經講過,熱刺由後場傳出去嗰套係有方法嘅。佢哋肯喺後面停一停、橫傳多兩腳,等你有人衝上嚟,再將個波送去壓迫者身後。車仔如果前面三個追得興奮,中場又逐個跟出去,兩條線之間就會慢慢拉開。
反觀熱刺今季最頭痛嘅,正正係去到前面之後老鼠拉龜。對愛華頓有62%控球、13次射門,但只有0.82 xG,蘇蘭基踢咗六十幾分鐘,只得一次禁區觸球。後面搓到上去,最後一下仍然經常慢咗,或者接應嗰個已經被守住。車仔應該令佢哋繼續面對呢個難題,守好中路,迫佢哋自己諗辦法傳入去。
唯一變數,係麥迪臣嘅回歸。上場對高雲地利,佢首次正選復出就遠射入波,馬莫殊同賓戴維斯之後亦喺禁區外建功,熱刺終於贏3:1。全場三球都係遠射,Opta嘅xG就係0.87對0.82,禁區內嘅供應仍然未算順,但佢哋已經有能力喺外面直接解決問題。
所以守住中路之餘,仲要分清楚工作責任。熱刺中堅喺自己半場橫傳,可以等;麥迪臣喺禁區頂轉身,就要有人即刻上前限制。
迪沙比上場亦因中場人腳問題改踢三中堅,東拿利留喺防線前面,麥迪臣、馬莫殊同Archie Gray喺較前位置接應,兩邊再拉闊。今場會唔會照用仍然要睇,但車仔要處理嘅選擇一樣:邊啲傳球值得出腳逼,邊啲位置必須留人守住。
而熱刺自己亦會露位。高雲地利試過由Cherif回後接應,Thomas-Asante隨即跑入身後,最後要靠雲迪雲回追封阻。祖奧柏度回接、羅渣士向前衝,同樣有條件逼佢哋作決定。車仔只要唔急住將所有人推前,就有機會等到熱刺先離開位置,再向嗰度落刀。
逼就一齊逼,打就有人跑
今場我會支持沙比接受一段時間無波在腳,尤其係熱刺中堅喺自己半場橫傳嗰陣。主場球迷可能會催,前鋒亦可能想衝上去搶,但迪沙比等緊嘅就係有人離開位置。熱刺自己仲未穩定解決到前線供應,車仔無必要幫佢哋將中路拉開。
最值得睇嘅係麥迪臣回後接波嗰一下。佢離開禁區頂,卡些度要唔要一路跟出去?我會傾向留住卡些度保護中路,較後位置嘅接應交俾前場遮線。麥迪臣可能因此多咗觸球,但佢要再向前,仍然要過車仔中場。追住佢走到中圈,身後就可能留俾馬莫殊或者蘇蘭基接應,代價更大。
呢個選擇當然有風險。車仔收窄中路,熱刺就有更多機會轉去兩邊,Kudus可以喺外線攞波再一對一,閘位同近邊中場要頂得住。尤其麥迪臣傳完再走近禁區,亦唔可以繼續放任。今場我寧願車仔先迫熱刺由邊路重新組織,再喺佢哋接近禁區時加壓,好過中場太早被引走,畀對手正面衝住防線嚟。
另一邊,祖奧柏度墮後接應亦未必次次有人跟。熱刺上場擺三中堅,就有條件由一個守將出去,另外兩個留後;所以車仔要睇嘅,係羅渣士接到下一腳時,面前仲有幾多人。祖奧柏度拉走一個,羅渣士再逼另一個出腳,尼圖喺外線先可能得到較舒服嘅空間。
彭達斯如果正選,呢份耐性亦要包括出波。祖奧柏度擅長墮後串連,但唔適合腳腳受壓解圍都指意佢同中堅爭頂。車仔需要有人行近門將做短傳接應,亦要按熱刺壓上嘅位置,準備將波送去邊線或者防線身後,避免最後只剩一腳向前大腳嘅選擇。
💡今場預測
預測一:車仔至少入兩球
車仔最近兩場入七球,祖奧柏度返嚟之後,前場接應順返,尼圖亦開始將機會變成入球。熱刺守將會跟人壓出去,車仔前面幾個正好有能力利用嗰啲位置。
所以第一個預測,我估車仔至少入兩球,入多幾球我都唔介意架。
預測二:車仔先開紀錄
熱刺上場先入今季第一個聯賽上半場入球,前面供應仍然未夠穩定。車仔近期開局製造威脅嘅能力,我會信多一邊。
所以第二個預測,我估車仔先開紀錄。
星期日凌晨12點半,對熱刺,當然想贏,呢樣無需要扮客觀。八月輸完,我叫大家俾時間沙比,最近兩場亦終於有啲值得開心嘅進步,今次希望可以繼續信落去。
最好贏完之後,仲可以安安穩穩瞓覺。至於熱刺球迷瞓唔着?佢哋今季都慣架啦。
