戰術覆盤

【戰術深潛】車路士 0:2 熱刺 沙比到底等緊乜春嘢?

發布於

溫馨提示,如果你認為自己係乖仔乖女,平日對鏡講粗口會打冷震,咁呢篇文章唔適合你,或者建議搵相熟車迷陪同收看。

屌你老母,主場輸俾熱刺,仲要輸得咁撚柒閪肉酸。

彭達斯一拳將個波打入自己龍門,彭馬再用兩張黃牌提早收工,最後0:2。你話呢兩個抵唔抵屌?抵。但我最嬲嘅,係半場已經見到車仔踢得唔順,我半場其實好期待沙比會有咩改善,無諗過等到失撚咗波都仲係同一個死樣。

上星期對愛華頓,我先讚完車仔終於有耐性、有秩序,可以喺唔順風順水嘅比賽搵到方法贏。今場祖奧柏度一缺陣,成套進攻又即刻打回原形。後場大腳,前面接唔住;搶返個波,幾腳之後又交返出去。

迪沙比有部署,熱刺亦有針對性,呢啲係佢哋叻。但坐喺車路士教練席嗰個,今場究竟做咗啲乜去回應?

沙比賽後話,第一個失球改變咗比賽,之後紅牌令球隊難以反應。我想問嘅係:咁頭嗰七十幾分鐘,你又反應過啲乜?


戰術深潛1:叫龍門踢長,前面邊個接?

你老味我逐點數。

祖奧柏度受傷,沙比今場將羅渣士推上最前,同彭馬負責前線搶迫,昆達就由左邊出發。受傷大家都唔想,OKOK。開局幾分鐘,車仔的確搶得好積極,熱刺一有人接波,附近立即有人撲埋身,想趁對手未企穩就直接搶返嚟攻。

昆達正選亦有佢嘅用途。佢回防快,護波時頂得住身位,適合今場需要不停追人同對抗嘅工作。但問題好快出現:車仔主動有控球嗰陣,準備點攻?

彭達斯攞波後頻頻踢大腳,想直接越過熱刺嘅高位壓迫。長傳本身完全可以理解,前提係前面有人接到,或者至少爭完第一下,附近有人接應第二點。今場車路士兩樣都做唔好。

羅渣士企喺最前,要面對雙雲:Van Hecke、Van de Ven,成場七次空中對抗全部輸。個波送上去,佢無法穩定頂返俾隊友,亦難以將球權控落嚟。彭馬同兩邊即使準備向前跑,都要先等佢留得住第一腳,否則跑咗上去,下一秒又要轉身返嚟守。

上半場車路士長傳只成功兩次,成功率7%。7%,講出嚟自己唔笑嗰下好嘢。

羅渣士自己亦有責任。佢唔係第一次要接長波,上場對愛華頓第一球,就由佢喺左邊頂住壓力接應開始。今場除咗高波全輸,地面對抗亦只贏3/10,護球同接應都無交到足夠效果。

祖奧柏度平時可以背身護球、墮後駁腳,再轉身攻擊禁區。今場用羅渣士頂替,啪,沒了。前面少咗祖奧柏度做支點,羅渣士又由較深位置被搬到最前,彭馬自然更加難接到舒服嘅下一腳。

車仔最有威脅嘅幾段攻勢,主要靠前場搶返球權之後嘅配合。尼圖喺底線附近截到,再同羅渣士、彭馬配合;Kinsky出錯,車仔先有機會喺禁區內連續一腳傳送,最後交軒達臣起腳。呢啲配合有質素,但每次都要先等一次搶斷或者對手犯錯,先可以喺危險位置開始踢。我半場已經問緊:咁樣可以維持幾耐?

熱刺愈踢愈適應,車仔搶迫無法一直維持開場嗰種強度,長傳出去又繼續交失,前線就愈來愈少機會真正參與進攻。踢咗45分鐘,接應同推進有咩問題,已經攤晒出嚟。下半場再行返出嚟,車仔卻仍然要靠同一套搶迫,等同一種機會。沙比仲想等佢自己突然順返?


戰術深潛2:半場已經見到,沙比等緊乜?

熱刺中場用東拿尼、M費同麥迪臣做三角接應,卡些度同軒達臣就要不停揀:撲出去迫持球者,身後有人接;留低封線,對手又可以轉身向前。

麥迪臣尤其麻煩。佢會移去雙中場身後接波,高維爾見到就跟出去。中堅一離開防線,其餘人就要橫移補位,熱刺再將個波送去左邊,搵泰同羅拔臣攻擊邦仔嗰側。

27分10秒嗰次推進,已經捉到車仔回防未齊;之後羅拔臣成功傳中,馬慕殊門前起腳,靠彭達斯救返。邦仔嗰邊點樣被拉開,半場前已經有畫面睇。

車仔前面接唔住,中場又被三個人輪流拉扯,領隊要改嘅接應同協防安排,已經清清楚楚。

結果屌你老味下半場無變化。

麥迪臣51分鐘傷出,熱刺失去最識搵空間嗰個人,車路士仍然無趁機改善出球。65分鐘帕仔換哈圖,72分鐘二安換昆達,左邊換咗人,前面亦多咗突破能力,但羅渣士繼續頂喺最前,卡些度同軒達臣身邊仍然缺少穩定接應。

二安入場後,彭馬同軒達臣的確即刻配合放佢入禁區。問題係呢種地面配合始終無法持續出現,後場好多時仍然要大腳送走。

我會想更早見到嘅調整,係韋碧克入中間,羅渣士退返左邊,彭馬留喺佢哋附近接第二腳。韋碧克先頂住中堅,羅渣士可以面向前場接波,亦多一個人返嚟幫雙中場駁腳。再由尼圖保留右邊速度,至少令長傳落點附近有人分工接應。

用韋碧克,前場搶迫嘅跑動會少咗,球隊就要相應收返距離,揀位先搶。沙比需要處理嘅正正係呢種取捨,試吓用另一種方式留住個波,俾全隊唞到氣。

最後韋碧克88分鐘先入場。當時已經少打一個、落後兩球,換佢入嚟仲想試到啲乜?試下落雨出場睇下水溫啱唔啱?


戰術深潛3:角球出事,彭馬自爆

今場守熱刺角球,車路士留四個人喺前面。

禁區附近剩低六個:一個睇短角球,邦仔守近柱區域,其餘四個人盯人。呢個安排無問題,反正對手有一樣嘅人數俾你拉咗出去。

但車仔要抽人出去,禁區內就更加鬆。去到77分鐘,佢哋直接利用蘇蘭基做掩護,Van Hecke避開拿確斯,衝向Panda仔面前爭波。

拿確斯無跟住,Panda仔起跳亦慢咗一下。最後佢掂到個波,拳頭卻將個波打返自己龍門。

呢下技術失誤,就係大家講嘅學費。佢之前救過馬慕殊同泰嘅射門,有一球越位嘅封擋都做得好,但就輸俾自己手鎚失準。

之後到彭馬。

第一張黃牌,M費跌低攬波,前面卡些度亦先被Van de Ven侵犯,火滾係理所當然。但彭馬衝過去撞低仲瞓喺地上嘅對手,送咗張完全可以避免嘅黃牌。

80分鐘,加拉加先掂到個波,彭馬遲到踩落去,第二張黃牌收工。

由無謂衝撞到遲到落腳,九分鐘內自己累積兩張。當時車路士只係落後一球,二安已經入場,連補時仲有時間追。彭馬一走,球隊連最後階段可以靠邊個接波、靠邊個送最後一腳,都要重新安排。

踢得燥、接唔到波、被對手小動作搞到㷫,全部都睇得到。偏偏球隊最需要佢用個波解決問題嗰陣,佢選擇用身體發洩,最後自己離場,隊友執手尾,下一場對利物浦仲要停賽。

沙比拖住無解決嘅問題,彭達斯一拳令球隊落後,彭馬再用紅牌令追和更加困難。場上失晒控你仲喺場邊嘆咖啡,真係屌你都嫌嘥氣。


數據深潛:遠遠錯在紅牌之前

車路士上半場完成97次傳送,成功率68%;熱刺就有295次,成功率85%。去到對方半場,成功傳送更加係28比83。

呢組數字最直接交代咗,車仔Hold唔住個波,亦好難將攻勢延續落去。搶迫成功可以換到一次埋門,但其餘時間,球隊缺少另一種可以穩定向前嘅方法。半場只有四次射門、0.22 xG,無Big Chance,就係代價。

熱刺上半場亦只得0.43 xG。佢哋喺中場佔優,能夠反覆組織,真正去到埋門嗰下同樣做得有限。車仔靠彭達斯救過兩次,再靠幾次前場搶斷威脅Kinsky,0:0返更衣室,場波仍然有得踢。

偏偏之後車路士嘅進攻產量仲少咗。

下半場只得三次射門,一次中龍,累積0.25 xG。最後十分鐘少打一個,當然會影響呢組數字;沙比要負責嘅,係球隊十一個人齊齊整整嗰段時間,仍然無搵到持續改善嘅方法。

全場七次射門、零Big Chance、0.47 xG。主場對熱刺,車路士就交咗呢份進攻成績表。

由開局搶迫,到落後追分,球隊一直無將前場人腳轉化成足夠機會。等到龍門犯錯,原本已經薄弱嘅進攻就要承擔追和任務,再遇上彭馬紅牌,最後一齊收皮。


屌完之後,下場又點?

輸俾熱刺特別難受,如果我喺度扮中立相信我過唔到自己。

上星期先喺愛華頓贏返一場有秩序、有耐性嘅波,今個星期返到主場,對住死敵熱刺,睇住對方愈踢愈舒服,自己就一路等轉機。半場等調整,下半場等換人,失波之後等反應,最後等到彭馬自己行返入更衣室。屌,成晚就喺度等。

我之前讚沙比,係因為真係見到改善。今場屌佢,亦因為問題由半場攤到完場,佢都無有效處理。

更加令我煩躁嘅,係祖奧柏度今場因傷缺陣,彭馬下場又要停賽。星期三仲要去晏菲路。球隊本身已經夠多傷兵,場上嗰班仲用紀律問題繼續減人,真係驚領隊太易揀正選咩?

我無興趣聽咩「要提高強度」、「要更加專注」,下場再睇同一套。麻煩沙比同彭馬自己反省一下,係咁。