【戰術覆盤】車路士 3：1 皇家蘇斯達　　雙刀流被拆沙比點見招拆招

左手短劍，右手長劍

沙比今場繼續排出3-4-3，帕利斯查同尼圖分居兩邊，羅渣士、彭馬就喺祖奧柏度身後活動。名義上兩邊都係翼衛，但實際用法完全唔同。

左路嘅帕利斯查有盤扭能力，但速度唔算突出，所以更多係等羅渣士攞波之後再後上協助，靠配合逐步推進；右路尼圖就直接得多，留後少少都無所謂，反正只要前面有空位，佢就可以靠速度自己將個波帶入危險區域。

簡單啲講，就係左手短劍、右手長劍嘅雙刀流。

車仔早段亦靠呢把長劍先開紀錄。尼圖右路傳中，祖奧柏度頭槌被救，羅渣士及時攝入小禁區補中。成個攻勢無乜花巧，但翼衛拉開、前鋒搶點、攻擊中場後上，至少每個人都做緊自己應該做嘅嘢。

可惜去到飲水Break之後，皇蘇開始睇穿車仔兩把劍點樣用。

尼圖本身速度夠快，唔需要太早壓前都可以製造威脅，壓前都可以靠速度回追；帕利斯查就必須不斷後上，先可以幫羅渣士將攻勢推入前場。皇蘇索性將進攻重心放到車仔左路，趁帕利斯查上咗去，再攻擊佢身後留下嘅空位。

半場前嘅失球就係成套劇本嘅結局。皇蘇沿車仔左路推進，久保建英起腳被擋，帕利斯查解圍唔遠，最後由Aramburu禁區外窩利追成1：1。

當然，呢腳波射得靚係事實，但問題亦唔止防守。皇蘇調整之後，車仔前場開始各自各精彩，傳波嗰個以為隊友會走，接波嗰個就企喺原地等；左路短劍埋唔到身，右路長劍亦無空間揮。結果車仔上半場只有3次射門，皇蘇就有10次。

兩把劍本身唔算鈍，只係車仔暫時仲停留喺逐把拎出嚟亂斬。對手一識得拆招，成套進攻就跟住條官方Stream一齊斷線。

要破法，唔使換劍嘅

半場踢成咁，最直接嘅處理方法當然係換人。尤其安素已經坐喺後備席，只要將佢換入嚟，理論上就可以幫手控制返中場節奏。

但沙比無咁做。下半場一開波，車仔仍然係原本十一個人，只係幾個人嘅工作內容明顯唔同咗。

最明顯係占士嘅位置。上半場佢同卡些度長時間平排，既無辦法穩定接應後場，去到前面亦未見到有幾多作用；下半場沙比索性將占士收深，卡些度推前，先將中場拉出層次。

收深唔代表占士要長期留喺後場做第四個中堅。佢嘅起始位置放後咗，但仍然會按情況推前，成為多一個出球點。分別只係上半場佢一早企死喺中場等波，下半場就由後面睇住形勢再加入，至少唔使再背住對手、企喺人堆入面扮中場。

科芬拿亦開始更多由右中堅位置帶波推入右半空間，令尼圖身邊唔再只有一條路。科芬拿、占士、彭馬同尼圖可以互相短傳，皇蘇一有人撲出嚟，身邊就有另一個接應點。上半場係將把長劍交畀尼圖，叫佢自己諗辦法；下半場就開始有人幫佢拉開、搭路同製造出揮劍空間。

第二個入球就係最好例子。彭馬右邊攞波吸引防守，占士由後排適時推上，接應回傳後送出傳中，再由祖奧柏度頂入。占士收深同占士助攻並無矛盾，正正因為佢唔再一早塞入中場，先可以遲一步無人看管咁殺上去。

調整效果亦唔止一個入球。車仔由上半場3次射門、6次禁區觸球，變成下半場12次射門、20次禁區觸球；皇蘇下半場雖然仍有6次起腳，但無一次射中龍門。

沙比無換走占士，只係將佢由一個企錯位嘅中場，改成由後場出發、識得揀時間加入進攻嘅接駁點。兩把劍仍然係嗰兩把劍，但身邊開始有人識得搭招，車仔套進攻亦終於自行重啟。

彭馬出題，祖奧柏度交答案

齋睇比數，今場主角當然係祖奧柏度。兩個入球之外，車仔第一球亦係由佢頭槌被救，再由羅渣士補中。換言之，車仔全場三個入球，全部都有佢直接參與。

更重要嘅係，三次參與展示出嚟嘅並唔係同一招。第一球佢企穩中間搶點，第二球壓過守將頂入，占士退場之後就再用走位攻擊防線身後，接應古斯圖直線冷靜射成3：1。

要駁腳可以墮後接應，要搶點就留喺禁區，要放直線亦識得向身後走。祖奧柏度未必每一樣都做到世界級，但至少前面隊友抬起頭，會知道中間有個人準備接應，而唔係傳完個波先發現前鋒對唔到電波。

相比之下，彭馬今場就低調得多。0入球、0助攻，三次起腳亦無一次中框，齋睇賽後數據，甚至可能以為佢踢咗一場閪波。

但第二個入球入面，占士之所以可以無人看管咁後上傳中，正正係因為彭馬先喺右邊攞波，扭動幾下吸引皇蘇防守，再將個波交返畀占士。除此之外，佢全場製造兩次機會，亦曾經直接送祖奧柏度入禁區起腳，只係射門被Remiro救出。

呢個轉變幾有趣。過去兩年，車仔進攻去到最後，大家第一個反應通常都係將個波交畀彭馬，然後等佢自己變魔術救世界；但今場嘅彭馬開始退後半步，負責吸引防守、揀傳球路線，再決定由邊個完成攻勢。

當然，一場熱身賽未足以話彭馬已經完成轉型。但當羅渣士識得後上，祖奧柏度識得搶點同走身後，彭馬終於唔需要每次都自己做英雄。

總結：最重要嘅唔係三個入球

對我嚟講，今場真正值得令人飲得杯落嘅，係沙比對於戰術有返相當程度嘅理解。

車仔上半場嘅佈置唔係無效，只係飲水Break後被皇蘇睇穿。最重要係原本套招數被拆之後，沙比無坐喺後備席寫紙仔托眼鏡，亦無事但換個安素入場當自己做咗嘢，而係靠調整幾個人嘅位置，用同一班球員將形勢扭返轉。

一場熱身賽當然證明唔到沙比神功蓋世。車仔左路身後仍然有窿，中場組合亦未完全定案，班新隊友之間偶爾仲係各自用緊唔同Channel。返到英超，對手拆招只會更快，亦未必會留十五分鐘俾你返更衣室慢慢研究攻略。

但熱身賽本來就唔係用嚟證明套戰術天下無敵，而係試下套嘢被人拆咗之後，領隊仲識唔識得砌返。柔佛嗰場只照到一班球員有幾未準備好；今場至少照到沙比有能力睇出問題，再用手上同一批人見招拆招。

官方Stream由斷線到完場都無成功重啟，車路士套進攻就好彩識得自行修復。負責App嗰位半個月人工照扣，至於沙比，拎咗英超冠軍先決定有無勤工獎啦。