【賽前明燈】英超 車路士對曼聯 對面等起機我哋又急住贏

上場對熱刺,估車仔至少入兩球,結果一球都無;估車仔先開紀錄,結果Panda仔派膠幫對面開齋。兩個預測全部估錯。跟住今場,主場對曼聯。
對面八場不勝,卡域克份工朝不保夕,照計應該趁佢病攞佢命。但車仔每次遇到呢類急需三分續命嘅對手,我都會有一種非常熟悉嘅不安。上場有成個星期準備,對熱刺都可以輸兩球;今次星期三先喺晏菲路搏完,星期六早場又要開工,彭馬解禁返嚟,我仍然覺得有機會翻船……
上場英超彭馬都有踢,車仔卡住喺邊?
對熱刺嗰晚,車仔其實有機會先入波。羅渣士、神軒都試過埋門,下半場彭馬同尼圖亦有連續起腳。睇住嗰幾球,當然會諗,入咗其中一次,之後可能好唔同。
但成場睇落,最令人唔舒服嘅係,中場愈縮愈後,前面幾個就愈難舒服接到波。卡些度忙住處理防守,神軒亦要留後幫手,彭馬同羅渣士有時要自己返嚟搵波。搵到之後,再抬頭望,前面可以交嘅選擇又少咗。
祖奧柏度缺陣,正正抽走咗平時負責接駁嗰個人。佢會由最前回後接應,幫隊友交多一腳,再轉身入禁區。少咗佢,對熱刺由羅渣士同彭馬輪流頂上最前,兩個人都要兼做原本由另一個人分擔嘅工作。
所以今場見到彭馬個名返到正選名單,我當然開心,但第一個反應會係:佢身邊今次配邊個?
週中韋碧克踢中鋒,至少俾羅渣士返到較後位置。呢個安排可以繼續試,但幾個人點樣接返埋,仲要靠正式比賽累積。彭馬停賽一場之後返嚟,祖奧柏度留下嗰個空缺,仍然喺度等人補。
車仔今季已經踢過幾場入球騷,我對前面幾個嘅個人能力無咩懷疑。令我唔放心嘅,係一遇到接駁問題,班人又要各自返嚟攞波,再靠自己突破。
週中嗰場,車仔食咗幾多老本?
對利物浦踢成1:1,再輸互射十二碼,嗰晚我無輸熱刺咁嬲。車仔有頂住,亦有機會晉級,Panda仔幾次救波更加值得讚。
代價就係,星期六仲要再踢嗰批人,週中已經用得幾盡。
羅渣士、尼圖同神軒踢足90分鐘;卡些度同古斯圖踢到68分鐘,分別因身體不適同抽筋退下;拿確斯就半場已經因腿筋問題被換走。兩場開波相隔大約64個半鐘,扣埋比賽、返倫敦同恢復,真正可以準備曼聯嘅時間少得可憐。
彭馬休息到一場,身邊嘅隊友就未必。佢接波之後想交向前,羅渣士同尼圖仲有幾多體力衝?卡些度如果上到陣,身體又恢復成點?呢幾樣會直接影響彭馬返嚟之後,實際可以發揮幾多。
沙比當然可以輪換,問題係車仔前面啱啱先開始試另一種配搭,中後場又有人要等身體情況。繼續用熟嗰批,體力令人擔心;換入新面孔,就要承受配合再有變化。
曼聯上星期日踢完,今週有較完整時間準備。兩隊近況都差,今場車仔仲要額外處理一筆週中留下嚟嘅消耗。
曼聯踢到咁,點解我仲估佢贏?
曼聯最近先輸俾科木1:4,再輸俾般尼茅夫0:3。卡域克教到八場不勝,後防亦連續出事,車仔前場有條件喺佢哋身上搵到機會。
我今次偏向曼聯,主要係覺得車仔目前嘅問題,會俾佢哋一條相對直接嘅進攻路線。
般奴玩大和解,預計返嚟之後,曼聯搶到波就多返一個可以即刻送向前嘅人。安保姆同古亞都有能力攻擊身後,車仔兩邊一推高,中堅拉出去補位,佢哋就有位置跑。
呢個係我對今場最擔心嘅畫面:車仔前面幾經辛苦先傳到禁區附近,一次接應唔順失去控球,般奴接到下一腳,曼聯已經可以向前。車仔花咗幾十秒砌嗰段攻勢,對面可能兩三腳就返到我哋禁區。
錫斯高缺陣,曼聯少咗一個中鋒支點。要佢哋長時間控球、慢慢供應前線,仍然有好多問題要處理。但車仔如果自己交出反擊空間,就等於幫對面省返其中幾份功課。
我最怕嘅就係呢種差距:車仔每次進攻都要花好多力,曼聯每次搶到波卻可以直接向前。再加上休息時間,我今場會偏向相信曼聯有機會把握到車仔後段露出嚟嘅空位。
💡今場預測
預測一:曼聯贏波
唔係話我燈,但車仔前面少咗祖奧柏度,主力又啱啱消耗完,今場要贏,沙比對人腳同節奏嘅安排都要比上場細緻。我暫時未有足夠信心,所以今次直接估曼聯贏。
呢個估計幾悲觀,我知。對面最近踢到咁,車仔主場仍然有條件贏返場,但我更擔心班人急住交代,最後反而將機會送咗出去。
預測二:曼聯下半場有入球
去到下半場,車仔週中踢足嗰批人仲有幾多力、沙比幾時換人,都會影響中後場留到幾多保護。般奴同前面幾個只要捱過開局,後段就可能有更多空間可以利用。
所以第二個預測,我估曼聯下半場至少入一球。
星期六晚香港時間八點半,難得唔使捱夜,希望食完飯可以開開心心睇場波。最近曼聯咁多花生,我都抽咗唔少水,但希望車仔係玩爛玩具果隊而唔係幫人起機果隊。
沙比,今次唔該俾我繼續笑落去。
