戰術覆盤

【戰術覆盤】車路士2:0曼聯 贏輸皆因把握力而起

發布於

先講在前頭,呢篇文堅係講球場上發生咗咩事,我無打算落井下石,亦無諗過喺呢篇文研究卡域克嘅帥位問題。

而且有跟開我Facebook嘅人都有眼睇到,直到羅渣士入波、馬天尼斯紅牌前,我一直都認為車仔係會輸波嗰隊。

單睇上半場曼聯嘅佈置同機會,就算而家俾我重新揀一次,我仍然會揀曼聯贏。

般奴入楔嗰下,我已經縮咗一縮 (咩嘢縮咗就交俾大家想像);戴亞路單刀嗰下,更加諗住要屌出聲。點知個波又飛咗上看台。科芬拿跟足送禮勤做法落力送禮,對面都堅持唔收,所以,重點就在於三粒字:把握力。


戰術深潛1:曼聯放谷上前,再打你身後

曼聯上半場個部署相當清楚:先俾車路士向前推,搶返球權之後,再用安保姆做接應,放般奴同兩邊攻擊防線身後。

車仔兩閘推高,帕利斯查早段幾次被人攻擊身後,附近中堅要橫移補位,其餘人又要重新對人。曼聯只要第一腳交得出去,就可以趁車仔未回齊,再放另一邊隊友入楔。

19分鐘嗰次,正正將呢個構思完整踢咗出嚟。車仔死球攻勢結束,安保姆攞到波立即反擊,再用一腳斜傳搵到般奴。車路士未人齊回防,般奴已經控定面對Panda仔起腳,最後射高。由車仔進攻,到曼聯得到單刀,只需要幾腳。

般奴射高一刻

前面留唔住個波,就令呢個循環更加難受。

尼圖有速度,亦識得跑身後,但今場開局要佢背住龍門、同麥龜爭高波,再將個波留返俾隊友,效果相當有限。後場踢上去,前面接唔實;隊友啱啱跑上嚟,下一秒又要回頭追。

呢部分係球隊安排造成嘅風險,科芬拿就令件事再慘烈少少。

32分鐘,佢喺後場處理慢咗,俾戴亞路搶走,靠Panda仔封住近柱先無事。尾段再同戴亞路爭身位,明明已經食到身位,仍然俾對手走甩,最後又係單刀射高。

另一球喺中間封阻當然要讚,但前後兩次送機會,真係睇到人血壓上升。星期三先送完利物浦,星期六又開工,你想車仔輸咪出聲囉。

曼聯有部署搵到空間,車仔亦自己送出機會。半場仍然0:0,最應該慶幸嘅,就係般奴同戴亞路無將最後一步做好。


戰術深潛2:拉維亞搶返,羅渣士行埋最後一步

車仔前場嘅變化,半場前已經開始。

大約38分鐘,二安移去左邊,尼圖返右,羅渣士就頂到中央。尼圖可以由外線開始加速,尾段亦有一次跑入身後、窄角度射斜。羅渣士喺中間接應,車仔亦多咗一個可以用身體護波、再正面帶向防線嘅人。

去到50分鐘,真正改變比分嗰下,就由中場搶波開始。

安保姆準備推進,卡些度先限制佢嘅路線,拉維亞再搶返個波,避過巴利巴嘅攔截交俾羅渣士。曼聯本來想再發動一次快攻,點知球權突然轉手,中場亦未趕得切重新企返好。

拉維亞嗰腳最重要嘅地方,係搶完立即送前。

佢無多帶幾步,亦無等曼聯排返齊,就將個波交到羅渣士可以面向龍門處理嘅位置。呢一下令車仔直接攻擊緊一條仍然向後退嘅防線,前面終於有空間可以跑。

羅渣士之後就自己搞掂。

二安喺側邊提供另一個傳球選項,麥龜同馬天尼斯一路退,始終無人及時上前截停。羅渣士見到中間條路仲開住,就繼續帶入禁區,再挑過出迎嘅拉文斯。

由中場攞波嗰刻,距離入球仲有成段路。佢要自己帶過防守、揀啱時間再完成埋門,最後先砌成一個清晰機會。曼聯上半場幾次已經去到最後一步,卻將個波射走;羅渣士今次就由推進到起腳,一口氣做埋。

拉維亞嘅功勞亦唔止嗰次助攻。

佢全場回收14次球權,傳送71次成功64次。配合攔截同第二點回收,佢今場幫車仔做到嘅,係搶返之後仲可以繼續踢,減少攻勢一斷就立即再守一次。

車路士終於先入波,曼聯之後亦要開始追分。上半場可以耐心等車仔送空間,落後之後,就輪到佢哋決定要推幾多人上去。場波由呢一刻開始,先真正傾向車仔嗰邊。


戰術深潛3:第一黃係逼返嚟,第二黃係自己送

羅渣士入波之後,車路士開始踢得順。

尼圖返到右邊,二安可以由左邊接波再內切,羅渣士就繼續喺中央同右邊之間移動。曼聯後衛要面對嘅,終於多咗啲需要轉身追、需要決定幾時上前截停嘅攻勢。

呢段時間,車仔仲未多打一個。

二安傳中俾尼圖頭鎚被拉文斯救出,角球亦持續考驗曼聯門前。去到59分鐘,羅渣士再由右邊帶波向前,馬天尼斯跟唔住,只能拉人阻止,食咗第一張黃牌。

呢張黃牌,係車仔靠推進逼返嚟嘅成果。羅渣士唔止自己入一球,仲繼續用帶波迫曼聯守衛做決定。上半場曼聯可以搶返就攻,依家連失去球權之後點樣截停對手,都開始出問題。

跟住第二張,就馬天尼斯自己攞嚟。

角球開入禁區,佢無望住個波,反而起跳用前臂撞向科芬拿。VAR介入,球證睇完,十二碼加第二黃,曼聯同時失去一個中堅,再落後多一球。

我都唔知科芬拿今場應該點評。前面努力送機會俾曼聯,對面射唔入;到佢上去攻角球,曼聯又反過來送十二碼俾佢。兩邊好似鬥緊邊個更唔想贏,最後馬天尼斯出手重啲,贏咗………贏…………?

車仔原本只領先一球,曼聯仍然有時間追。呢一下之後,卡域克要換入天堂仔補返中堅,前面少一個人,後面又要顧住車仔幾個持球點,追分條件即刻差咗一大截。

二安之後踢得更加自在,68分鐘喺禁區橫傳彭馬,被麥龜及時截走;再之後接應彭馬直線射入網頂,雖然越位唔計,但車仔已經可以持續喺曼聯防線身後搵到機會。

車路士喺十一對十一時先取得領先,再靠羅渣士繼續推進逼出第一黃。馬天尼斯第二下就將曼聯原本仲有得追嘅比賽,直接送到車仔手上。今次有兩球、有人數優勢,車仔總算無再將份禮物退返出去。


數據深潛:大好機會,射到變無機會

曼聯上半場1.09 xG,三次Big Chances,最後零入球。

最能夠解釋點解大家睇到咁驚、個比分卻仍然係0:0嘅,係曼聯同期只有0.21 xGOT。般奴同戴亞路幾次得到好位置,最後起腳射高,連需要Panda仔撲救嘅射門都做唔到。

xG記錄嗰個機會本身有幾好;起腳之後,射斜、射高嗰啲威脅就直接消失。曼聯花咗力氣打開防線,去到最後一步,再親自將成果踢走。

車仔上半場只有0.28 xG,禁區觸球就同曼聯相差無幾,係17比18。即係兩隊都有去到禁區附近,但曼聯更容易將推進變成清晰埋門。呢點配合場上反擊同單刀畫面,足夠支持半場嗰個判斷:車仔當時隨時可以落後。

換邊後,數字完全倒轉。

車路士有2.39 xG、三次Big Chances,曼聯就只得0.08 xG,禁區觸球亦由上半場18次跌到三次。不過呢個下半場包含彭馬十二碼,同埋63分鐘之後長時間多打一個,數字反映緊領先、人數優勢同曼聯追分困難一齊出現嘅結果。

至於車仔嘅零封,Panda仔亦有份保住。補時安保姆遠射中楣嗰下,佢有指尖掂到,個波咁快落點咁靚都可以掂到改變方向,抵佢今場拎到CS嘅。


贏波收貨,但科芬拿可唔可以停手?

兩場輸波之後,終於有三分落袋,二安亦終於正選踢咗場似樣嘅波,今個星期總算有啲嘢可以開心。尤其拉維亞嗰份表現,睇到真係會忍唔住諗:你健康踢落去,車仔中場可以少幾多煩惱。

我依家最想要嘅,就係呢啲好嘢可以連續出現。二安唔使踢完一場又返去坐幾星期,拉維亞唔使啱啱踢起就又消失,沙比亦可以用同一批人慢慢建立默契,唔使每場重新拼圖。

至於科芬拿,拜託你俾車迷舒服睇返場波得唔得?

拿確斯傷咗,後備席又無幾多中堅可以揀,未來幾場大概仍然要靠你。你有能力攔截、有能力封阻、有速度回防,今場亦真係幫手搏到十二碼,我無要求你突然變泰利。只係個波已經喺你腳下、個身位已經俾你食咗,可唔可以正常處理完,唔好突然送個單刀出去?

今次曼聯唔收禮,我哋笑住講多謝。下次對手講聲多謝袋走三分,我驚自己要寫九千字先可以平伏到。

好啦,三分袋好,過返個舒服星期日先。怕且下星期嘅話題會圍繞卡域克同曼聯……嗯,車路士早啲休息吧啦。