【賽前明燈】聯賽盃車路士對Luton　阿仙奴牛奶仔帶15場不敗挑戰

上次領先3：0，最後都差啲反艇

兩隊最近一次交手，已經係2023年12月30日嘅英超。當時車仔作客，彭馬開波12分鐘先開紀錄，之後再助攻馬杜基射成2：0；去到70分鐘，彭馬接應積臣傳送，扭過門將再冷靜射入空門。領先到3：0，正常都應該可以熄機等完場。

之但係，車路士嘅波又點會咁易估。Luton先有Adebayo頭槌破網，但因為越位被VAR推翻，之後又連續兩次中楣。去到80分鐘，車仔舊將巴克利接應角球頂入；七分鐘後，Adebayo再喺門前補射追成2：3。由領先三球變成要捱埋六分鐘補時，最後總算無驚無險晉級下一輪。

車仔係贏咗，但Luton全場有15次射門、7個角球，最後十幾分鐘更加幾乎將我哋壓住嚟打。所以上次對賽留低嘅教訓其實幾簡單：呢個對手就算落後到3：0，都未必肯投降。

兩年之後，當日五個入球者只剩彭馬仍然留喺兩隊陣中。再望埋Luton今季最近一場正選十一人，無一個係上次對車仔嗰場嘅正選。比分可以拎返出嚟笑，但要用嗰場波預測今次對手會點踢，基本上已經無乜參考價值。

由英超跌到英甲，但唔再係當年嗰隊Luton

上次交手之後，Luton只用兩年就由英超連跌兩級，直接落到英甲。單睇呢條發展線，今場好似理應係車仔例行公事，但韋舒亞接手後，佢哋嘅方向已經唔再係當年靠三中堅、長傳同高空波搵食。

今季Luton主要踢4-1-4-1，由Liam Walsh企喺防線前面負責派牌，車仔青訓Kasey Palmer就推前一格負責創造。佢哋唔介意由後場開始組織，聯賽盃第一圈對Gillingham更加錄得492次傳球，差唔多係對手嘅兩倍。換句話講，韋舒亞唔係準備帶隊上橋擺低十個人死守，而係有可能同車仔搶下個波。

實際效果就好有英甲娛樂性。Luton今季三場正式比賽入咗9球：先以3：0淘汰Gillingham，之後半場落後1：3之下反勝Reading 4：3，再兩度落後逼和Notts County 2：2。攻力係有，但兩場聯賽失足5球，證明條防線同樣性感。

正選識，後備兵又跟唔跟得足？

車仔星期一晚先踢完富咸，今場休息不足72小時，星期日又要返主場對白禮頓，大輪換幾乎走唔甩。卡些度同帕利斯查繼續缺陣，科芬拿亦要繼續停賽，Panda仔、巴高、基頓斯同韋碧克等人都有機會得到今季第一次正式上陣機會。

問題係，季前幾場熱身賽已經睇得出，正選同後備對沙比套戰術嘅理解仲有一段距離。主力嗰批落場，至少開始知道翼衛幾時壓前、前場幾時回後接波，三中堅亦識得點樣拉開協助推進；一換成後備陣容，球員之間嘅距離就容易散開，出波節奏慢咗，前場走位亦變得各自為政。

所以今場值得睇嘅，唔係班後備兵個別有無能力。單計身價同天份，車仔第二隊都理應高過Luton幾班；真正要睇嘅係，換走大半隊正選之後，場上仲剩返幾多個人踢得出「沙比足球」。

如果後備兵可以照樣維持隊形，Luton條失咗五球嘅防線應該好難頂足全場；但如果中場再次斷開、兩邊翼衛上咗去又返唔切，對面最擅長嘅後段反撲就隨時有機會出場。今場表面係沙比主場地標戰，實際亦係佢第一次正式交後備功課。

賽前明燈：入球騷同後備奇兵

講到呢度，今場兩盞燈其實都指向同一件事：兩隊有能力入波，但防守暫時都唔係令人特別放心。

💡明燈一：全場總入球至少有三個

車仔首場英超贏富咸3：2，前場三個正選全部有波入，但後防同樣失咗兩球；Luton今季三場正式比賽就入9球失5球，兩場聯賽更加分別踢成4：3同2：2。再考慮到車仔今場預計大輪換，進攻端仍然有足夠個人質素，但防守默契就未必跟得上。

所以我估兩隊全場合計至少有三個入球。無論2：1、3：0定再次演出3：2都算我中，1：1就當我輸。

💡明燈二：至少有一名後備球員入波

Luton今季三場比賽，場場都有後備兵入波。Kodua先後對Gillingham同Reading後備建功，當中對Reading更加補時絕殺；上場對Notts County，就輪到新加盟嘅Callum Marshall後備追和。

車仔今場亦一樣有條件靠後備改變比賽。無論沙比先收起主力、下半場先放彭馬同祖奧柏度落嚟，抑或正選踢完七十分鐘再換新鮮翼鋒衝擊Luton條防線，後備席都應該會有足夠火力。

所以我估今場至少有一名入球者唔係正選。邊隊後備入波都計，但如果踢到互射十二碼先射入，當然唔可以咁厚面皮計落去。

凌晨2點半，睇下沙比班副選交唔交到功課，順便睇下韋舒亞會唔會帶住Luton將史丹福橋變成另一場英甲入球騷。