【賽前明燈】英超 車路士對候城　大開大合後識唔識悶住贏？

16個入球，仲未答到點樣拆牆

車仔頭五場正式比賽入16球，彭馬、羅渣士同祖奧柏度亦愈踢愈有默契。前面三個有人回後接應、有人帶波突破、有人負責最後一腳，至少證明沙比手上呢套進攻唔係單靠個人質素亂撞。

但三場英超，車仔分別喺32秒、四分鐘同77秒取得領先。早入波之後，對手就要逐漸推前追比數，羅渣士有空間加速，祖奧柏度可以攻擊中堅身後，彭馬接波時亦未必已經有兩三個人圍住。早入波唔止令比數領先，仲會將成場比賽變成車仔最鍾意嘅形狀。

對列斯反勝6：3就更加極端。沙比半場換入四名主力之後，車仔12分鐘連入四球，但嗰陣場波早已經完全失控，兩邊有波就向前衝，空位多到可以擺30圍請埋姨媽姑姐。呢場證明車仔有能力靠火力反Cup，仍然證明唔到佢哋識得慢慢拆牆。

如果今場踢到半個鐘仍然0：0，候城無需要主動行出嚟。祖奧柏度回後，中堅可以唔跟；羅渣士想爆，面前未必有路；彭馬想送直線，禁區附近可能已經塞滿人。

今次要驗收嘅，係無地方跑嗰陣，班人仲識唔識用走位同傳球，逐個逐個逼對面離開原位。

零失球有水分，但唔係完全符碌

候城開季先2：0贏曼聯，再作客1：0贏高雲地利，上場就同維拉踢成0：0。三場七分兼零失球，作為升班馬已經唔止係開局順利，甚至靜雞雞咁霸住聯賽第三。

呢個零失球當然有水分。對高雲地利，候城嘅xG其實以0.73比1.28落後；維拉開季三場更加合共只有一次射門中目標，進攻本身已經死死地火。話候城係英超最強防線，肯定吹大咗。

但符碌還符碌，候城自己亦有做啱嘅地方。無波時佢哋會收成5-4-1，中場先封住中路，寧願逼對手將個波送去兩邊。傳中入到禁區，入面已經有人等住解圍；第一點處理唔乾淨，Tzolakis亦有能力執手尾，對曼聯一場就救咗六球。

所以候城未必真係守得住車仔90分鐘，亦唔代表三場零失球可以一直維持落去。問題係，佢哋至少有一套方法令你不停傳中、不停重新組織，再等你自己開始心急。

只要頭20分鐘頂得住，壓力就會慢慢掉返去車仔身上。到時最先離開原位、最先嫌0：0太悶嗰隊，可能先係真正露出空位嗰隊。

拆唔開對手，最忌自亂陣腳

有耐性唔等於將個波由左傳去右，再由右交返左。車仔要做嘅，係每一次傳球都逼候城其中一個人離開原位。

祖奧柏度回後接波，彭馬或者羅渣士就要有人走入佢身後；候城收窄中路，兩邊翼衛就要拉闊，逼對方翼衛決定跟出去定繼續守住禁區。只要成功拉走一個人，下一個空位先會出現。

另一個關鍵係第二點。候城就算頂走第一下傳中，如果車仔可以喺禁區外即刻搶返個波，對面就無時間重新企好。相反，每次解圍都要由三中堅重新開始，候城自然愈守愈舒服。

但車仔亦唔可以為咗搶返第二點，成隊愈企愈前。候城前面有McBurnie，長傳上去唔一定要佢直接入波，只要頂贏第一點或者保住個波，後面隊友已經有時間衝上嚟。今場啱啱係佢第100次英超上陣，車仔條五場失10球嘅防線，最好唔好順便送埋第一個入球做賀禮。

所以今場真正考驗唔係車仔有無火力，而係0：0維持得比預期耐嗰陣，班人仲可唔可以繼續做啱嘅決定。識得等，同識得入波一樣，都係強隊應該有嘅能力。

💡今場預測

預測一：車仔頭15分鐘無入球

車仔三場英超都係極早領先，但呢種開局無可能當成固定服務。候城連續三場零封，開局第一件事亦必然係先收窄空間，唔畀車仔舒服起跑。

所以第一個預測，我估車仔頭15分鐘唔會入波。由開波去到14分59秒保持0入球，就算我估中。

預測二：雙方都有入球

話候城有能力拖住車仔，唔代表我相信佢哋可以連續第四場英超零封。車仔五場入16球，前場主力質素始終高一班，主場完全無波入嘅機會應該唔高。

但另一邊，車仔五場亦失咗10球，場場都有失波。候城只要靠McBurnie頂住第一點，再搶到翼衛身後或者禁區外第二點，已經有機會延續呢項優良傳統。

所以第二個預測，我估雙方都有入球。1：1已經算中，邊隊最後贏就另計。

星期六晚香港時間10點，今場唔一定要再入六球，甚至悶住贏1：0都可以。對我嚟講，如果車仔無閃電開局、無大片空位，仍然可以忍住唔亂嚟，再慢慢搵到入球，可能比另一場入球Show更加值得開心。

畢竟識得癲住贏係娛樂，識得悶住贏先係爭前列嘅本事。