【戰術覆盤】英超 車路士2：2候城　作客虎無運慘失兩分

右邊塞兩個人，左邊得哈圖自己守

車路士以4-2-3-1開局，但進攻時企位比牌面進取得多。科芬拿會主動推前，古斯圖亦長時間壓上右路，同尼圖一齊企喺候城左邊防線附近。

理論上，右邊擺古斯圖加尼圖無問題。一個拉闊、一個內切，或者輪流Overlap同Underlap，都可以逼對手不停交接。問題係兩個人今場活動範圍高度重疊，卻無穩定做出兩條不同走線。

兩個人經常一齊等波，但少咗一個負責將守衛拉開。右路睇落有足夠人數，實際仍然只係一個人接波、另一個企喺附近，候城根本毋須作出艱難選擇。

古斯圖踢咗78分鐘，完成八次傳送進入Final Third同七次Line-breaking Pass，但五次長傳全數失敗，只創造一次機會，xA亦只有0.08。個波經常經過佢所在嘅右路，卻無因為多塞一個人而更接近龍門。

問題係，車路士將大量資源放到右邊之後，左路又無建立另一條供應線。

羅渣士收入Half-space，理應由哈圖提供外線闊度。但哈圖上半場只有25次觸球，既無穩定後上，亦無成為轉邊後嘅推進出口。候城可以放心將防線移向車路士右邊，唔需要擔心另一側會被Overload。

查華利亞半場入替後，左路運作明顯正常得多。佢同樣踢45分鐘，錄得38次觸球、六次傳送進入Final Third同五次Line-breaking Pass，跑動距離同衝刺次數亦高過哈圖。

當然，查華利亞入場時車路士落後緊，Game State自然要求佢推得更高。但兩個人嘅分別仍然清楚：哈圖只係佔住左閘位置，查華利亞就真正將左路連接返入進攻。

車路士嘅問題唔係無將個波帶過半場，而係成套進攻過分集中喺右邊，兩個人企得近，功能卻無互相補足；左邊明明留有空間，又無人穩定利用。

個陣企得好進取，候城防線實際要解嘅難題卻唔多。

個個望住個波，後上嗰個偏偏無人理

車路士今季開始有一種令人熟悉嘅不安感。

對阿仙奴，夏維斯吸引防守，再漏俾奧迪加特由後面入攝；對列斯，Nmecha牽制第一點，Aaronson就喺中路無人看管。今場換咗對手，問題仍然係所有人跟住個波移動，真正後上起腳嗰個無人接管。

候城第一球，哈圖當然係最明顯嘅犯錯者。佢判斷錯傳中軌跡，之後亦處理唔到個反彈，令Belloumi喺身後輕鬆起腳。

但當哈圖第一下出錯，高維爾無及時提場或者橫移包位，中場亦無人跟住Belloumi入禁區。哈圖係第一個犯錯嘅人，成條防線就無第二個人將個錯誤截停。

第二球有折射，收死馬天尼斯係無辦法。但折射只可以解釋點解個波入網，解釋唔到Belloumi點解又可以舒服起腳。

Ajayi接應角球頂中楣，McBurnie搶到反彈再交返中間。車路士幾個守衛全部被第一點吸引，稍後位置嘅Belloumi再次無人接管。

兩個失球來源唔同，一球係長傳落底，一球係角球二次進攻，但死法相同。第一個落點出現混亂後，車路士無人重新分配對位；個個掛住睇波搵波，第二線入攝自然變成真空。

所以將問題寫成「哈圖集中力不足」並唔夠。哈圖今場踢得差，半場被換走完全合理；但同一種走漏後上球員嘅問題連續幾場出現，就唔再係某一個後衛突然發夢。

車路士將壓迫位置推得好高，防線同中場亦會跟住向前。第一線一旦搶唔到，後場就要喺大片空間處理長傳同第二點。有人衝出去撲波，必須有人接管佢身後嘅走線，但呢一下交接正正係車路士一直做唔好嘅地方。

個波去邊，車路士班傻仔就望去邊。至於下一腳會交到邊個腳下，往往要等對方起腳嗰刻先有人記得。

死得啦咁。

五枝箭一齊上，身後只剩一個巴高

追成2：2之後，候城將防線收得更深，車路士原本嘅4-2-3-1仍然搵唔到缺口，沙比唯有逐步將籌碼推出去。

巴高先入替拉維亞拍住占士。到78分鐘，韋碧克換走古斯圖，占士移返右閘，巴高變成單防中；尼圖、彭馬、羅渣士同祖奧柏度就平排支援韋碧克，整體接近4-1-4-1。

個諗法好清楚。主場2：2，比賽只剩十幾分鐘，沙比無理由仲為咗陣式工整留住兩個防中。韋碧克加入禁區，可以提供支點同多一個門前接應。

但擺多一名前鋒，只會增加收貨嘅人，唔會自動解決點樣送貨入去。

彭馬要墮後攞波，羅渣士亦要自己帶波推進；祖奧柏度同韋碧克就留喺禁區附近。前場人數多咗，負責將中後場連接到前線嘅反而只剩巴高一個。

二安到86分鐘先入場，的確立即帶來一對一突破，但時間只夠佢製造一兩次混亂，未足以反覆攻擊同一個啱嘅位。

另一邊廂，前面擺足五個人，第一輪壓迫一旦失效，巴高就要獨自面對成片中場空間。佢衝出去截，中路無人；留低保護中堅，候城就可以帶波一路推前。

87分鐘，Cho喺禁區內得到絕殺機會，只係起腳唔夠應，被馬天尼斯接實。候城尾段攻勢數量的確少咗，但每次避過第一輪壓迫，面前嘅空間反而更加大。

沙比選擇All-in完全可以理解，亦成功將候城壓返入後場。但4-1-4-1無令車路士掌握比賽，只係將風險推到極端。

車路士更加接近射入第三球，同時亦比之前任何一刻更接近輸波。

數據深潛：七成控球，結果控咗啲乜？

車路士全場完成479次傳送，候城只有179次；單計對方半場，亦係298比82。即係車路士確實長時間將個波放喺候城嗰邊，唔係靠後場猜波刷出一個虛假控球率。

問題係，個波去到前場之後發生咗乜嘢。

車路士有36次禁區觸球，候城只有16次；但候城嘅禁區內射門反而以9比6領先，Big Chances係4比2，xG亦以1.33比0.85佔優。

車路士入禁區次數比較多，但好多觸球只係邊位接應、背向龍門攞波，或者未搵到射線就要交返出去。候城入去嘅次數少得多，每次卻更容易直接變成起腳。

上半場差距最清楚。車路士雖然先開紀錄，半場只有0.17 xG同零Big Chance；候城就有0.50 xG同兩次Big Chances。羅渣士靠一腳高質素處理取得入球，但整體進攻並無持續製造同等級嘅威脅。

換邊後，車路士增加攻擊人數，xG升至0.68，亦製造兩次Big Chances；但候城同期仍有0.83 xG同兩次Big Chances。沙比嘅調整提升咗進攻，無扭轉兩隊嘅機會差距。

最終比分之所以可以維持2：2，關鍵在於埋門質素。車路士七次中龍累積2.36 xGOT，代表羅渣士同祖奧柏度成功將本身唔算優質嘅機會，加工成難度極高嘅射門。

候城四次Big Chances只入兩球，尾段亦浪費咗絕殺機會。佢哋創造到更好機會，卻無足夠射術將優勢變成三分。

所以七成控球本身無呃人，只係控球從來唔等於控制比賽。車路士控制咗球權；候城創造咗更多真正可以決定比賽嘅機會。

總結：堅係候城痛失兩分

完場之後，我最唔舒服嘅唔係車路士主場和波，而係我完全無「差少少就贏」嘅感覺。

升班馬唔代表自動送三分上門，和一場亦唔代表個Project已經爆炸。但當相似嘅防守問題不停換對手再出現，「磨合」就唔可以永遠成為藉口。

更加重要嘅係，先判斷清楚自己究竟失去咗乜。

如果車路士只係攻極唔入，今場當然叫痛失兩分；但當對手創造到更好機會，完場前更加差少少完成絕殺，就無理由因為自己着住主場波衫、控球比較多，便自動將「不幸」據為己有。

所以，我要向曼聯道歉。原來候城真係唔容易應付。跟住亦要向各位車迷講聲唔好意思。今場呢句說話再難聽，我都會講多次：我哋唔係痛失兩分，只係好彩無失埋第三分。