【戰術覆盤】車路士5：1般尼茅夫　贏波皆因神軒爆Seed？

戰術深潛1：彭馬留喺有價值嘅位置

今場沙比其中一個重要改變，係無球時將彭馬留喺祖奧柏度身邊。

之前幾場，車路士中場連唔上前線，彭馬就要墮後幫手攞波、轉身，再帶成隊向前。佢的確可以解決一部分組織問題，但代價亦直接：最識得喺禁區附近製造威脅嗰個人，偏偏要由距離龍門最遠嘅地方開始工作。

琴晚車路士無球時，睇落更接近4-4-2。尼圖同羅渣士回撤守住兩邊，彭馬同祖奧柏度就留喺最前。全隊亦無每球都追過半場搶，而係先收窄前後距離，等對手進入可以圍搶嘅位置，再一齊施壓。

咁樣守，唔止係為咗後場人多啲。更重要嘅係，車路士搶返球權之後，前面立即有兩個出口。

祖奧柏度可以背身接應、頂住中堅，彭馬就喺附近搵位接下一腳。個波唔需要先交返後場，再等彭馬由中場跑上去；只要第一腳送到前面，車路士已經可以開始攻擊。

般尼茅夫嘅高壓，反而令呢個安排更加有用。佢哋前場一度用接近六個人搶迫，想封住車路士後場出球，但大量人手壓上之後，中場同防線之間亦留下空間。車仔一旦避過第一輪，彭馬同祖奧柏度就有機會直接喺呢片空間接應，唔使再逐層慢慢猜上去。

第一個入球，見到嘅係彭馬喺高位處理個波可以帶嚟幾大威脅。

佢由右邊轉身帶入禁區，般茅防線被迫向後收，附近球員亦將注意力集中喺佢身上。軒達臣由後面跟上，得到大量嘅起腳空間。彭馬回傳，神軒第一時間射入，68秒已經領先。

呢球唔可以全部歸功於4-4-2，軒達臣嗰腳射術亦肯定超額完成。但彭馬先要喺危險嘅位置攞到波前衝，先可以逼對手收縮，再將空間留俾後上隊友。佢如果仲忙緊喺中場幫手駁腳，就無辦法同時喺禁區入面做呢份工作。

所以今場第一個值得肯定嘅改變，唔係車路士突然識得快速反擊，而係沙比終於可以將彭馬留喺反擊最需要佢嘅地方。

至於點解今次唔使叫佢返中場救火，就要睇軒達臣同卡些度做咗啲乜。

戰術深潛2：軒達臣先係重點

彭馬可以留喺前面，唔係沙比突然決定唔理中場，而係今場終於有人接管咗佢之前要兼職嗰份工。

軒達臣拍卡些度，兩個人唔係單純企喺中間增加人數，而係有相當清楚嘅分工。軒達臣負責接應、轉移方向，同決定個波應該繼續向前，定先留一留；卡些度就負責掃蕩、保護防線，睇準機會再推前搶返球權。

由功能睇，軒達臣接管咗上季安素部分工作。佢唔會每次都用一腳直線劏穿對手，但識得移去隊友可以交波嘅位置，亦知道幾時應該由後面跟上。第一球後上射入，只係呢種判斷最搶眼嘅一次。

更重要嘅係，佢唔會係交完波就算。攻勢向前發展，軒達臣會跟住提供下一個接應點；球權失去，佢又會收返去維持距離。前場有人可以回傳，中場亦唔使每次都由卡些度一個人同時負責接波、轉身、推進，再追返去執手尾。

卡些度因此可以更專注做自己最擅長嘅嘢。

般茅想由中路接波轉身，卡些度就貼上去干擾；對手準備加速，佢就先截斷或者拖慢攻勢。搶返之後亦唔需要夾硬帶波過幾個人，只要交俾附近嘅軒達臣，或者直接搵彭馬同羅渣士，車路士已經可以繼續向前。

第二個入球就係呢種分工嘅縮影。尼圖射門被撲出後，卡些度喺般茅禁區附近搶斷，再交俾軒達臣；軒達臣隨即橫傳，羅渣士起腳射入。卡些度負責將未完嘅攻勢搶返，軒達臣就負責接住下一腳，再搵到可以埋門嘅隊友。

卡些度72分鐘內完成51/53次傳送，地面對抗亦贏咗7/10。兩組數字放埋一齊，先睇到佢今場嘅價值：唔止攔到對手，仲可以將球權安全交返自己人，避免每次搶到之後又立即再守一次。

當然，呢個唔代表軒達臣已經變成安素，更加唔代表卡些度只需要企喺後面。兩個人仍然會因應攻勢交換高低位置，重點係其中一個行前，另一個知道要留低做乜。

之前車路士好多問題，都係搵一個人補窿之後，佢原本嗰個位置又打開咗。今場軒達臣同卡些度至少令中場唔使不斷拆東牆補西牆。彭馬可以留前，羅渣士可以專心攻擊空間，祖奧柏度亦唔需要每次都退到中場等隊友。

前線踢得輕鬆咗，唔係因為後面突然無嘢做，而係終於有人將嗰啲工作做返好。

戰術深潛3：般茅搵到方法，但車仔無散開

般尼茅夫唔係由頭到尾都俾車路士牽住走。

上半場後段，佢哋已經開始將陣形向左右拉開，用Rayan嘅速度攻擊防線身後。換邊再加入Gannon-Doak，兩邊有更多跑動同突破，車路士亦無法繼續用開場嗰種方式，將對手困喺中路。

另一個改變，係般茅更加直接利用高波同第二點。

佢哋唔一定要第一下就將長傳控落嚟，而係先用頭鎚Set返落地，再由附近隊友爭下一腳。車路士第一次解圍，未必代表攻勢完結；個波再落返般茅腳下，車仔就要重新收位，再守多一次。加上早早領先本身唔急住向前，球隊逐漸被壓返自己半場。

而佢哋最有威脅嘅入口，仍然係死球。

51分鐘嗰球，角球先由近柱頂入六碼區，卡些度攞到解圍機會，卻將個波踢中伊雲尼臣彈入網。嗯，不過禁區本身就有混亂，最後嗰腳雖然處理失敗，但有少少難責怪佢…

失波係有少少失望，但重點係，今場同之前幾場唔同，失球之後無連鎖反應。

車路士仍然被壓住，亦繼續要處理傳中同角球，但中場同防線之間無再出現之前嗰種大片空位，前線亦保留住接應出口。般茅可以將戰線推前，卻無接連由中路送人入禁區，將3：1變成另一場熟悉嘅災難片。

而車仔保留住嘅進攻出口，亦令般茅無法放心全隊壓上。

67分鐘，查華利亞由左邊攻入防線身後，再傳俾祖奧柏度門前射成4：1。唔需要長時間圍攻，亦唔需要全隊重新推到對方半場；只要對手壓上後留低空間，車路士仍然有人可以跑入去，再有人接應完成。

呢球重要嘅唔止係再拉開比分，而係車仔證明咗自己收後之後，仍然有能力將個波送返上前。般茅每次進攻，都要繼續顧住身後，唔可以好似之前幾個對手咁，愈攻愈多人，最後將車路士困到完全出唔到嚟。

所以今場唔係防守突然變成銅牆鐵壁。我哋死球仍然守得牙煙，卡些度亦照樣可以犯錯。進步係一個錯誤出現之後，其餘人仍然做緊自己份工，無跟住一齊失去秩序。

失一球，今次就真係只失一球，唔係成隊開始缺堤嘅訊號。

數據深潛：五球好誇張，但改善唔係假

車路士今場用1.08 xG入五球，般尼茅夫就由1.46 xG入一球。齋睇呢組數字，最容易得出嘅結論，當然係車仔射術爆Seed，對面就黑仔到喊。

比分的確將差距放大咗。軒達臣兩個入球加埋只得0.12 xG，羅渣士嗰球亦有折射；祖奧柏度兩次起腳全部入網，車路士下半場更加三腳射門、三腳中龍、三個入球。呢種效率唔可能每星期複製。

但總xG亦唔足以交代今場點樣踢。

拆開攻勢來源，車路士生波進攻xG係1.03，般茅只有0.36；死球就完全倒轉，般茅有1.10，車仔只有0.05。兩隊製造威脅嘅方法，其實相當唔同。

車路士主要靠接應、推進同攻擊身後搵機會；般茅就靠死球將個波送入危險位置，再爭第一點同反彈。

下半場嘅數字尤其值得放埋一齊睇。般茅禁區觸球以15比4領先，車路士傳送成功率亦由89%跌到77%。對手確實壓得更前，車仔亦無上半場咁容易留住個波，唔係全程舒服控制住比賽。

不過，般茅嗰1.12 xG之中，1.04來自死球。配合場上畫面，今次更似車路士退守後守住咗大部分流動進攻路線，卻仍然未處理好死球落點。呢個問題要修，但同之前一失波就連中場、邊路同禁區中央一齊打開，始終係兩回事。

車仔下半場雖然只得三次射門，仍然製造到0.62 xG。祖奧柏度接應查華利亞嗰球，係全場一次清晰嘅門前機會，亦證明球隊被壓後之後，進攻出口無完全消失。至於另外兩腳都入埋，就係射手幫個比分化咗個靚妝…

終於有一場，唔使一路贏一路驚

琴晚我最大嘅感覺，係終於可以正常享受一場車路士嘅勝仗。

之前幾場，入波嗰一下當然開心，但慶祝完又要立即驚：仲有幾多分鐘？領先兩球夠唔夠？下一次對手落底，係咪又有人喺中間無人看管？睇自己愛隊贏緊波，竟然都可以睇到咁攰，真係陰撚功。

今場仍然無零封，死球亦照樣嚇人，但至少我唔使每次般茅行過半場，就開始準備睇車仔失波。呢種安心，比個5：1更難得。

亦因為咁，我更加唔想將今場簡化成「卡些度返嚟，所以全部搞掂」。

佢當然重要，但軒達臣同樣證明，隊波需要嘅唔止係一個周圍救火嘅人，仲要有人知道幾時接波、幾時行前、幾時留低。之前嫌神軒年紀大、簽嚟只係更衣室吉祥物嘅車迷，琴晚應該都靜咗少少。36歲未必場場做到林伯，但有人識得幫班後生仔安排返啲工作，已經好有用。

當然，般茅今季未贏過，今場又缺少史葛，唔可以贏完就立即將爭冠兩個字由櫃桶拎返出嚟。下一場作客愛華頓，對手未必肯留咁多空間，車仔亦未必再三腳中龍入三球。

到時先更睇得出，琴晚呢種分工係一次啱晒對手嘅安排，定係沙比終於搵到可以繼續用落去嘅底。

但嗰啲留返下場先煩。隔咗咁多個星期，終於有場車仔波可以笑住睇完。今次就俾我哋開心一輪先啦屌。