【賽前明燈】英超 車路士對般尼茅夫　條防線真係只差一個卡些度？

卡些度唔喺度，但失球仲有其他兇手

車仔防守有咩問題，我文都寫撚咗幾篇。寫到大家可能開始懷疑，我係咪打算每個位都捉個戰犯出嚟審問。老實講，我都想寫啲新嘢，但班人失波嗰幾招又真係熟口熟面………

卡些度缺陣，最直接就當然令中場少咗保護。但上場對賓福特三個失球，正好說明有啲工作，其實有卡些度都救唔到幾多。

第一球係角球。Schuster喺遠柱頂返中路，Anthony近門無人看管下頂入。呢次對面唔需要突破中場，個波直接由角旗去到禁區，車仔仍然無人接住最後嗰個入球者。防中幾好，都唔會令其他人自動識得跟人。

失波之後，車仔又急住追和，向前傳得愈嚟愈勉強，身後亦愈留愈多空位。第二球沙迪衝過去起腳，馬天尼斯救到，Igor Thiago再補入；第三球又係沙迪送波去遠柱，Carvalho收埋尾。高維爾賽後自己都承認，班人太急，推得太前，傳咗啲唔應該傳嘅波。

卡些度可能截到其中一次反擊，但如果前面不停勉強交波、後面又無留好保護，佢都只係有更多機會表演搶救。今場希望佢復出，係想中場有返一個可靠支點，如果其他人繼續做錯，俾你中場有個神仙都救唔返。(吖………有神仙可能救到……)

般尼茅夫最啱驗收，搶到波之後點做

今場般尼茅夫排第17，五輪仲未贏過。望落似係一個幾好嘅復出對手，但佢哋未贏波，唔等如車仔食得到。

Marco Rose接手之後，般尼茅夫仍然有能力喺前場逼出機會。作客紐卡素嗰場，上半場已經有13次射門，35分鐘內領先2：0。Evanilson試過直接截走Botman傳球起腳，第一球由Scott射門後，Tavernier搶到鬆散球射入；第二球亦係起腳中柱之後，Scott繼續追返個波，再傳中造成烏龍。

即係第一下處理完，場進攻都未完。你封到一次射門，下一個人已經走去搶；你截到一腳傳球，但無隊友接應，個波就可能即刻又返到佢哋腳下。對車仔嚟講，卡些度搶到幾多次固然值得睇，但每次搶完有無人幫佢接走，可能更加重要。何況，卡些度係咪真係復出仍然要睇。

好彩嘅係今次對面亦有損失。史葛為國捐軀要休息四至五星期，少咗一個肯走、搶到波，亦有能力將進攻延續落去嘅中場。般尼茅夫要由其他人補返呢份工，逼搶同後面保護之間會唔會出現空位，正好係車仔可以利用嘅地方。

所以今場唔需要一見到對面壓上就急住踢走。只要車仔越過第一輪逼搶，般尼茅夫同樣要轉身回防。對面少咗史葛，我哋可能迎返卡些度，條件的確有機會比之前好；但要將呢個變化變成優勢，就要有人接住佢搶返嚟嗰個波。

人腳未定，但其他人份工唔會變

卡些度踢唔踢得，仲要等最後決定。車仔今場要改善防守，就唔可以將準備工作押喺佢復出上面。

首先係搶返波之後，要有人接應。中場截到個波，彭馬同羅渣士就要搵位接下一腳，另一個中場亦要提供出口。唔使次次即刻打穿對面，撞返一腳或者轉去另一邊，避開般尼茅夫第一輪逼搶，已經可以令全隊有時間推上。最怕辛辛苦苦搶返嚟，一抬頭無人接，最後又交返俾對面再攻。

無波嗰陣亦一樣。一個中場走出去搶，另一個就要保護佢身後，後防跟住調整距離。呢啲工作無論邊個正選都要做，唔可以因為少咗最識搶嗰個，就連補位都一齊取消。

前場人選同樣未定。祖奧柏度能否上陣，會影響車仔點樣留住個波；艾美夏即使可以候命，佢攻擊身後嘅跑動，亦唔會自動補返回後接應嗰份工。如果前面用一個更鍾意向前跑嘅前鋒，彭馬、羅渣士同中場之間就更加要有人行近，唔好一解圍就全部衝走，留低持球嗰個自己諗辦法。

所以今場睇正選名單，第一樣當然係留意卡些度個名有無出現。但開波之後，更值得睇嘅係搶波嗰個有無人幫、接波嗰個有無路行。人腳未必齊，互相接應同補位仍然要做，呢啲唔使等醫療報告先開始。

💡今場預測

預測一：雙方都有入球

上場先俾呢個預測跣完，我今場仍然堅持 (笑)。般尼茅夫有能力逼出失誤，車仔條防線亦未俾到足夠信心我估零封；但對面今季同樣未試過聯賽唔失波，史葛缺陣亦可能令中場保護打折。

所以第一個預測，我估雙方都有入球，1：1都算中。

預測二：車仔失球少過兩個

寫咗咁耐唔可以只靠卡些度，最後都要俾沙比同其他人少少信任。今季五場英超，場場至少失兩球，我自己就想車仔可以有改善。

唔係要求立即零封，但經過呢段時間準備，加上對面中場缺人，我希望車仔至少唔使再靠入三四球先有機會贏。

所以第二個預測，我估車仔今場唔失波或者失一球。失兩球或以上，就當我錯。

等咗三個星期，當然想睇車仔贏返場。但今次我唔貪心，唔需要又反Cup、又456球、又睇到血壓升高。入完波之後可以安安穩穩睇完場，已經好夠。

卡些度如果踢得，當然係好消息。但無論佢踢唔踢，其他人都要做好自己本份。等咗三個星期，希望今次唔使再寫同一篇防守問題。