【賽前明燈】兩場轟八球零失波　白禮頓又嚟史丹福橋收車仔皮？

由3：1到3：0，白禮頓點解愈打愈順手？

上季首循環，車仔原本憑安素頭槌領先，但細查53分鐘領紅後成場波完全反轉。白禮頓下半場將車仔按在地上磨擦，韋碧克後備梅開二度，De Cuyper亦喺補時入波，最終反勝3：1。

次循環更加肉酸。白禮頓開波三分鐘已經由Kadioglu先開紀錄，Hinshelwood同韋碧克下半場再各入一球。車仔全場只有六次射門，零次中目標，最後輸0：3。侯沙拿賽後更加將嗰場形容為自己執教白禮頓以來最好嘅表現之一。

兩場波嘅細節唔完全一樣，但共通點都係白禮頓一旦搶到主導權，就會不停將比賽速度推高。佢哋唔係單純縮後等車仔派膠，而係主動推高防線，迫你喺後場快速決定。一傳慢半秒，接波方向錯少少，下一刻已經有兩三件白衫圍上嚟。

呢套打法啱啱好專打近年車仔最容易出事嘅位置。當中後場出波未夠穩、中場接應距離拉開，白禮頓就可以將一次普通失誤，直接變成禁區前嘅進攻。

所以過去幾場唔只係「車仔自己踢得差」。更麻煩嘅答案係，侯沙拿的確幾識得點樣令車仔踢得差。

兩場4：0，真正恐怖嘅係開波已經撲埋嚟

白禮頓上季以53分排第八，防守只失46球，成績僅次於曼城同阿仙奴。佢哋全季喺進攻三區搶返192次球權，更加係英超最多。呢個數字代表嘅唔係班前鋒跑得勤力咁簡單，而係成隊幾時壓前、邊個封傳球線、第二個人點樣執漏，已經有相當完整嘅默契。

今季第一場聯賽對維拉，白禮頓只用31分鐘已經領先4：0。全場控球率73%，射門21比6，xG更加以3.67比0.31大幅拋離。紅牌確實令維拉更難反撲，但João Gomes被逐之前，白禮頓已經入晒四球，唔可以將場大炒純粹推落張紅牌度。

星期四歐協聯附加賽對Tromsø，白禮頓只係換咗兩名正選，又喺上半場轟入三球，最終再贏4：0。兩場波加埋，佢哋頭45分鐘已經入咗七球。

當中最值得留意嘅係左路。De Cuyper名義上可以由左閘或者左翼衛出發，但進攻時經常直接壓入對手禁區邊緣。前面球員向中路拉走守將之後，佢就由外線高速插上。對維拉參與兩個入球，對Tromsø更加一入球一助攻，第二球仲係直接喺對方禁區搶走個波。

白禮頓現時有三笘薰、明達、Evan Ferguson等進攻球員受傷或者上陣成疑，照計火力應該打折。結果兩場入八球，反而證明侯沙拿唔係靠一兩件主力撐住成套進攻。即使人名換咗，前場壓迫、兩邊前插同二線後上照樣運作。

今場第一關，車仔後場頂唔頂得住個Press？

車仔星期四晚同樣有盃賽，雖然2：0擊敗盧頓，但並唔係全副選輕鬆食對手。彭馬踢足90分鐘，羅渣士、艾斯迪華奧同古斯圖亦有正選；白禮頓另一邊更加只輪換兩人。兩隊都係不足72小時再開波，今場未必邊個特別新鮮，反而係鬥邊隊喺疲勞之下仍然保持到戰術執行。

對盧頓，車仔錄得26次射門、2.41 xG，但要到50分鐘先由韋碧克打破僵局。英甲球隊縮得較後，俾到車仔時間慢慢移動同重新組織；白禮頓就唔會咁有禮貌。當彭馬或者羅渣士回後接波，對面防中會唔會跟出嚟？三中堅被迫向邊線出波時，翼衛又有無準備好做下一步？呢次會係沙比套3-4-3第一次面對高壓測試。

卡些度仍然未肯定趕唔趕得切復出，安素亦因轉會風波有可能缺席。如果兩個最擅長喺壓力下接第一腳、轉身或者將個波送出包圍圈嘅中場都唔喺度，車仔由後場開始已經係地獄模式。沙比確認高維爾、昆達同停賽完畢嘅科芬拿都有機會回歸，但卡些度就要等最後檢查。

另一邊就係車仔右路點樣處理De Cuyper。對富咸下半場，邦仔背後已經一度變成公路；如果今場右翼衛照樣壓得太高，右中堅又被前鋒拉入中路，白禮頓左邊後上隨時再次無人接貨。

當然，白禮頓推得高亦唔係無代價。佢哋肯用人數壓迫，就代表第一層一旦被車仔越過，身後會有大片空間。祖奧柏度、羅渣士同彭馬嘅速度、背身接應同直線傳送，理論上正正可以食住呢種高風險防線。

所以今場唔係單方面捱打。核心問題只係，車仔可唔可以先頂過白禮頓開局嗰輪大浪，再將對方高壓變成自己反擊嘅起跑線。

賽前明燈：頂得住上半場先講

💡明燈一：白禮頓上半場有入球

白禮頓對維拉上半場入四球，對Tromsø上半場再入三球；車仔首場聯賽對富咸亦係23分鐘已經失守。雖然話對面入波功臣嘅韋碧克變咗隊友，但考慮到兩隊星期四先踢完比賽，開局專注力同回防速度都可能受到影響。

所以第一盞，我估白禮頓仍然會喺上半場攻破車仔大門。唔需要領先，45分鐘前入到一球就算我中。

💡明燈二：雙方都有入球

白禮頓兩場轟入八球，進攻狀態唔使再介紹；但佢哋今季未真正面對過車仔呢種前場個人質素。對面敢將防線推高，祖奧柏度、彭馬同羅渣士就一定會有空間可以利用。

車仔最近兩場正式比賽入五球，主場亦理應唔會完全無還手之力；但要我相信一條仍然磨合緊、門將位置又準備換人嘅防線，我不如信聽日去食壽司郎唔使排隊簡單少少。

所以第二盞明燈，我估兩隊都有入球。1：1當我中，至於會唔會再次變成3：1或者3：2，就睇下邊隊後場先頂唔住對手嘅Pressing。

星期日晚香港時間9點，沙比第一次喺英超主場領軍。對手偏偏係近兩年最鍾意收車仔皮、最近兩場更加入八球零失球嘅白禮頓。

過到呢關，先可以話車仔開季兩連勝唔止係食住個賽程。過唔到，就證明白禮頓超市唔止要收我哋轉會費，仲要收足3分先放人………好貴呀………