【季前分析】車仔5個中堅爭正選位置　邊一對先砌得出最完美防線

五個人夾埋，原來幅圖都仲有窿

同之前一樣，雷達圖唔係球員能力值，而係睇五個人將工作量放咗喺邊。科芬拿同拿確斯採用25/26英超每90分鐘數據；高維爾上季受傷太多，所以改用24/25球季。哈圖嘅數據混入咗左閘上陣時間，占士就主要踢右閘同中場，兩人嘅中堅百分位只可以當作角色推算，唔適合拎嚟逐格定輸贏。

正常睇五人雷達圖，第一反應可能係搵邊條線包圍面積最大。但中堅本來就唔需要一個人包辦所有工作，真正值得留意嘅反而係：五條線疊埋一齊，竟然都未填得滿成幅圖。

有啲範圍的確人才濟濟。高維爾同科芬拿可以承擔大量短傳；科芬拿嘅攔截最突出；哈圖、占士同科芬拿就有能力自己帶波避開第一重壓迫。無論想控制後場、搶前截斷攻勢，定係直接帶波推過第一線，名單上面總算搵到相應工具。

但去到成功長傳同整體對抗成功率，五條線就一齊縮返入去。

幾個長傳較多嘅人，每90分鐘成功長傳都只係2.45至2.62次之間，算係送得到遠，未去到可以單靠長傳穩定拆走對手成條壓迫線。對抗成功率亦一樣，正職中堅之中最高嘅拿確斯有61.3%，放返入同位置比較仍然只屬中間附近，科芬拿同高維爾就再低少少。

呢個先係車仔最麻煩嘅地方。球員之間嘅不足本來可以靠配搭互補；但如果某一項五個人都唔算突出，換另一個上場亦只係將個窿移位，唔會憑空多出一件原本不存在嘅武器。

所以今篇唔係要搵一個識傳、識帶、識頂、識截兼永遠唔會俾人過嘅六邊形戰士，而係睇五件各有所長嘅零件點樣兩件一組，遮住最多死角之餘，又唔好將兩個人嘅缺口啱啱疊埋一齊。

先揀左邊，右邊先知道要補乜

要砌一對中堅，最簡單嘅方法唔係將五個人亂咁配對，而係先決定左邊由邊個開工。高維爾同哈圖睇落都係左腳中堅，實際上俾右邊拍檔嘅工作說明完全唔同。

高維爾比較似成條防線嘅地基。24/25球季，佢每90分鐘成功傳球66.54次、成功長傳2.49次，車路士由後場開始組織，大量第一腳都會經佢處理。佢未必會自己帶波撞穿第一重壓迫，防守數據亦無一項誇張到雲迪克咁，但勝在可以留喺原位接波、轉邊同控制節奏。

左邊有高維爾，右邊嗰個就可以放膽做好自己最擅長嗰份工作。高維爾未必填得滿幅圖，但佢會令拍檔無必要填滿幅圖。

哈圖就唔同。佢每90分鐘成功傳球55.17次，成功率高達92%；成功盤扭亦有0.55次，加上2.84次搶斷同1.42次攔截。佢更加願意移出去迎波、跟人，甚至直接加入左路推進。

當然，呢堆數據混入咗左閘上陣時間，尤其搶斷同被盤過更加唔可以當成純中堅能力照單全收。但角色方向仍然清楚：哈圖唔係後生版高維爾，而係一個活動範圍更闊、更加鍾意離開原位解決問題嘅左路守將。

代價係，右邊拍檔就要更加似一個傳統中堅。當哈圖走出去壓迫或者帶波上前，中間要有人留低包抄；當佢面對高空波同身體對抗未必佔優，另一邊亦要有人頂住禁區。

高維爾係自己做好地基，再俾拍檔自由發揮；哈圖就係自己四圍走，要求拍檔幫佢守住間屋。揀高維爾，右邊可以追求上限；揀哈圖，右邊首先要負責穩定。

三種配搭，三份唔同代價

如果左邊係高維爾，最令人期待嘅拍檔自然係科芬拿。

高維爾負責留後接波，科芬拿就利用速度同預判搶前截波。後者每90分鐘有2.09次攔截，遠高過其他人；同時有3.60次高空對抗成功，亦唔係一個淨係識追住人跑嘅跑狗中堅。理想情況下，一個維持防線秩序，一個主動消滅危險，既有出波，亦足以支撐高位防線。

問題係呢對組合雖然勁，但好難砌得埋。高維爾上年先斷完ACL，科芬拿就同樣有玻璃體質，上季1,726分鐘仲拎咗兩張紅牌。兩條友一齊上到場先要問過個天，仲未計科芬拿搶前失敗嗰陣，高維爾要即刻幫佢填補身後大片空位。

想將風險降低，右邊可以改用拿確斯。

拿確斯無科芬拿嗰種追出去截斷攻勢嘅速度感，但每90分鐘贏得5.95次對抗、3.47次高空對抗，另有7.35次解圍。呢啲數字一部分受到水晶宮踢法影響，防守時間越長，中堅自然越多波要清；但至少證明當個波真係入到禁區，佢習慣企喺最需要有人頂住嘅位置。

高維爾加拿確斯就係最容易理解嘅分工：一個負責將個波由後場送出去，一個負責唔俾對手將個波送返入嚟。上限未必及科芬拿嗰對刺激，但兩個人較少爭住做同一份工作。代價係一旦對手封鎖高維爾，拿確斯未必有能力由另一邊接管組織，後場出波容易變成單引擎運作。

至於高維爾缺陣時，哈圖加拿確斯反而係最合理嘅替代組合。

哈圖可以向左移動、帶波推前同搶出去迎擊，拿確斯就留喺中間處理高空波、對抗同包抄。呢對未必可以複製高維爾嘅長距離出波，至少兩個人嘅不足可以互相彌補，唔會令防線直接真空。

相反，哈圖加科芬拿就係一個好睇但令人血壓上升嘅組合。兩個人都鍾意主動離開防線，搶得成當然可以將對手壓喺地上磨擦；一旦同時判斷錯誤，中間就會得返個打緊邊爐食肥牛嘅山齊士。

咁占士呢？

占士唔適合硬塞入第四對常規組合。佢嘅傳球、長傳、高空對抗同帶波能力，的確足以客串右中堅；但當佢由右閘退落去，或者由中場跌入防線，車路士實際上已經唔再係一套固定四後衛。佢更加似一個轉換陣形嘅掣，而唔係日常頂替科芬拿或者拿確斯嘅答案。

總結：最高上限同最穩陣，其實係兩對人

所以返去開頭嗰條問題：四後衛之下，車路士砌唔到一對真正完整嘅中堅，只可以決定今場最願意承受邊一種缺口。

最高上限係高維爾加科芬拿，但健康同失控風險亦最大；最穩陣係高維爾加拿確斯，代價就係後場出波過度依賴高維爾。無高維爾嘅話，哈圖加拿確斯係比較正常嘅替代方案。

嗯，但講到尾，點揀兩個都會有窿。所以……爭咩吖，溝埋做瀨尿牛丸，踢三中堅呀笨。

左邊有人放波，中間有人頂高波，右邊有人搶前，甚至占士仲可以隨時行入中場。三個各有缺口嘅中堅擺埋一齊，表面上好似真係可以盡量做到無死角。

唔，Perfect池。

至於三中堅係咪真係瀨尿牛丸咁掂，定只係幫計時炸彈包多塊糖衣……嗯，下一篇見。

【數據方法論備註】本文使用FotMob聯賽每90分鐘數據。科芬拿及拿確斯採用25/26英超數據，分別上陣1,726及3,087分鐘；高維爾因25/26傷患影響，改用24/25英超3,149分鐘數據。哈圖採用25/26球季1,142分鐘數據，當中混合左閘及中堅上陣；占士採用25/26球季1,961分鐘數據，主要來自右閘及中場角色。哈圖及占士嘅中堅百分位屬近似推算，只用作觀察角色形狀，唔代表純中堅能力評分。