【戰術覆盤】聯賽盃 利物浦1 (5):1 (4) 車路士 科芬拿一手一腳送走車仔

又係利物浦,又係互射十二碼,又係我哋出局。下次盃賽抽籤抽中佢哋,不如直接由十二碼開始踢,大家慳返90分鐘,車迷仲可以早啲瞓。
老實講,今場輸波我無上場輸熱刺咁嬲。十二碼踢到第八輪先分勝負,Panda仔救咗一球,艾美夏亦曾經有機會送我哋晉級。嗰幾分鐘由準備收皮,到突然見到希望,再到真係收皮,嗯,習慣就好。
不過科芬拿就真係好忙。上半場一隻手送十二碼,最後再一腳將個波送上看台,成功「一手一腳」送利物浦晉級。利物浦如果想喺一月買入科芬拿,我估車路士唔介意打個折頭,318五個零,Call我吖。
講返場波,上半場睇到我幾乎瞓着,下半場就終於有返啲精神。車仔壓得更前,換人之後亦多咗幾條走線,帕仔嗰下門前接應,我真係以為有。睇住隊波慢慢踢返起,最後仍然要靠十二碼決定去留,今次留低嘅感覺,更多係可惜。
尤其係開頭嗰45分鐘。我哋擺咗兩個老將喺最前,究竟想靠佢哋做啲乜?
戰術深潛1:兩個老將擺最前,毫無生氣
彭馬停賽,祖奧柏度繼續養傷,沙比今場用韋碧克踢中鋒,軒達臣就喺佢身後活動。無球時,神軒會推上去,同韋碧克形成4-4-2最前嗰兩點,尼圖同羅渣士守住兩邊,卡些度配拉維亞留喺中間。
呢個安排保留咗國際賽期之後嘅防守框架,但最前面兩個人加埋成70歲,既無迫到利物浦後場,搶返球權之後亦缺少跑動製造出口。
韋碧克經常留喺中堅附近,軒達臣又要由前線壓迫位置回身接應。個波一送上去,前者未能穩定護球,後者亦難以立即接下一腳。羅渣士同尼圖要先由兩邊移入嚟幫手,攻勢就喺等人接應嘅同時慢咗落嚟。
韋碧克踢咗68分鐘,只有16次觸球,禁區內更加只掂過一次波。車仔個中鋒大部分時間都無真正參與到攻勢,更加難靠佢將彭馬平時負責嗰啲細位配合接續落去。
神軒亦有同樣嘅位置問題。對般茅,佢由後面跟上,前面有人先吸引防守,佢就可以揀時間入攝;今場推到韋碧克附近,對手一早已經睇住佢。佢本來最有用嘅接應、轉移同後上,全部都要由一個更窄、更難轉身嘅位置開始。
兩個人都無足夠速度反覆衝擊身後,利物浦中堅就可以放心向前收,縮短同中場嘅距離。車仔想由地面傳入去,前面無乜位;Panda仔改踢長,韋碧克又未能穩定將個波留低。後場每次出波,都好似將同一條問題再問一次。
上半場比較有心思嘅攻勢,反而係23分鐘自由球。
神軒無直接斬入人群,而係送去遠柱,搵到空晒嘅古斯圖,再由佢回傳中路。呢個設計有成功搵到空位,只係最後無完成有威脅嘅埋門。之後古斯圖反向傳送俾卡些度,亦成功製造十二碼,Credit俾返長髮哥。
車仔有幾下預先設計好嘅走位,正常推進就一直接唔順。半場兩次射門,一次自由球、一次十二碼,生波進攻連一腳射門都無。
沙比用神軒填補彭馬個位,無球時可以維持兩個人喺最前;到有球嗰陣,隊波仍然缺少一個能夠接波轉身、帶動隊友向前嘅人。兩個老將企咗喺度,前場嗰份工作就一直無人完成。
戰術深潛2:下半場有人壓上,亦終於有人跑身後
今次返出嚟,車路士的確有改變。
全隊位置推得更前,兩邊亦更主動貼近利物浦接球者,想喺對手未加速之前先截斷。搶返球權之後,身邊接應距離短咗,車仔終於可以連續做幾腳,而唔使每次都立即踢長。
48分鐘嗰次攻勢已經見到分別。軒達臣喺中間轉移,古斯圖沿左邊推上,再經尼圖交俾羅渣士起腳,逼到Mamardashvili撲出。神軒喺較後位置面向前場處理,邊路有人跟住行,前面就容易接得順。
邦仔嗰邊亦踢得相當熱鬧。
Ngumoha一攞波就想去,邦仔就不停迎上去截。佢有幾下成功攔住,對手亦有幾下靠轉向同加速走甩。50分鐘邦仔落腳犯規領黃,之後Ngumoha又成功推進,拉維亞要追返去犯規。兩個後生仔鬥到幾熱血,亦睇得出車仔想主動喺邊線截停攻勢,需要付出幾多跑動同協防。
去到68分鐘,艾美夏、巴高同帕仔一齊入場,前場再多咗新嘅走線。
艾美夏會主動跑去中堅身後,迫利物浦防線回身追。佢未必每次都接到,但中堅要顧住佢,羅渣士同尼圖就多咗機會喺前面接波。77分鐘,艾美夏走到右邊接應,再嘗試回傳羅渣士,已經係韋碧克上半場較少提供嘅活動方式。
左邊換入帕仔,亦令後上變得更加直接。同時巴高又會主動去邊線增加接球點。
古斯圖今場有製造十二碼嗰腳,但其餘時間處理反覆,回傳失誤、對抗後失平衡,幾次都令左路攻勢停低。帕仔入場後更積極由後面衝過去,78分鐘就跑過巴高拿,接應前場配合喺門前起腳,差少少幫車仔贏埋場波。
呢下最有意思嘅地方,係羅渣士攞波時,身邊終於有人繼續向前跑。佢可以利用隊友走線分散防守,再送最後一腳,唔使每次都自己帶住個波撞入人堆。
沙比今場下半場嘅調整,至少令車仔多返幾種攻擊方法。神軒喺中間分波,前鋒衝身後,閘位由後面超前,幾個角色開始接得埋。
可惜艾美夏同帕仔都去到68分鐘先入場。頭半場已經踢到咁靜,之後見到佢哋幾下跑動帶來嘅變化,真係會忍唔住諗:呢啲嘢,早少少試會點?
戰術深潛3:幾經辛苦終於領先,科芬拿即刻送返出去
車路士今場最令人氣餒嗰下,係領先時間同連淥個杯麵都差少少唔夠。
卡些度入禁區搏到十二碼,羅渣士射入,車仔終於可以帶住優勢踢。對一隊前場接應咁辛苦嘅球隊嚟講,呢一球本來好重要。利物浦要主動搵返入球,兩邊同身後就有機會留空間,車仔亦可以更有耐性揀反擊時機。
結果下一個角球,科芬拿就將個優勢親「手」送返出去。
角球開向雲迪克,卡些度本身跟緊佢,科芬拿一邊介入爭位,一邊旋風式將右手舉過頭頂,最後直接掂到個波。禁區入面,手舉到咁高,出名盲嘅英超球證都係到。
12碼被迫和,之後要守住1:1,其他人就要逐個執手尾。
Panda仔救出Araujo門前頭鎚,再擋走巴高拿射門;尾段高維爾同邦仔連續封阻,先無俾利物浦喺正常時間贏埋。科芬拿自己亦有解圍同封阻,但送十二碼嗰一下,已經將隊友之前搏返嚟嘅領先抹走。
至於最後互射十二碼,巴高中柱、艾美夏致勝嗰腳被救,呢啲錯誤算係無避免。但科芬拿……………………
………………………………………一腳將個波送上晏菲路看台………………………………………
我有幾多粒點就代表我有幾無奈。
數據深潛:下半場有起色,但仲未踢到可以放心
車路士全場1.82 xG,利物浦2.10,兩邊各有一個十二碼。
扣除各自0.79 xG嘅十二碼,其餘射門就係車仔約1.03、利物浦約1.31。正常時間嘅機會差距唔大,雙方都有足夠理由覺得自己可以贏。
上下半場嘅分別,就更加值得睇。
車仔換邊後完成九次射門,七次喺禁區內,生波xG由上半場顯示0.00升到0.61。呢個變化支持場上見到嘅改善:位置推前,接應距離短咗,再加上後備帶來嘅跑動,攻勢終於可以去到埋門。
不過利物浦下半場四次射門,就製造咗三次Big Chances。車仔同期只有一次,正正係帕仔嗰腳。
即係車路士攻勢多咗,利物浦每次真正打入去,仍然更容易得到清晰機會。Panda仔同兩個後衛尾段嗰幾下救波、封阻,份量就喺呢度。車仔重新有能力爭勝,同時亦繼續需要有人喺門前救命。
Panda仔今場嘅救波值得肯定,出球就仍然令人頭痛。全場35次傳送只成功19次,約54%;長傳…19次得3次中,頻頻踢長之下,前面未能穩定接住,球權就好快返到利物浦腳下。佢有能力將射門擋出去,點樣將個波送到隊友可以繼續踢嘅位置,仍然要改善。
所以今場個1:1,我收貨。下半場車仔有實質進步,亦有贏波機會,防守端仍然留低幾次足以輸波嘅缺口。踢到十二碼先出局,係一場有得爭、最後無爭贏嘅比賽。
結尾:二安,你係咪得罪咗人?
輸完今場,我最想問沙比嘅,反而係二安到底要等到幾時。
係咪訓練嗰陣得罪咗佢?定係上年入利物浦波,搞到沙比嬲豬,返到晏菲路都仲記住?你講出嚟,我哋幫手調解吖。
彭馬停賽、祖奧柏度受傷,前場已經少咗兩個最重要嘅人。今場明明可以試左邊尼圖、右邊二安,羅渣士移入中間接應韋碧克,偏偏最後係神軒推上去,二安繼續坐。
呢個擺法會改變中場人數,兩邊回防同接應分工亦要重新安排。但睇完上半場嗰種進攻,後備席又明明坐住一個識得喺狹窄位置過人、可以自己帶波入禁區嘅球員,我真係想知,沙比到底等緊咩條件先肯試。
對愛華頓,我仲理解佢想保住原班人嘅默契;對熱刺,二安入嚟之後亦有機會。今場盃賽連幾分鐘都無,之後少咗呢條戰線,輪換機會只會更加少。
艾美夏同帕仔今場起碼用幾下跑動,證明後備席有人可以帶來唔同嘅嘢。二安連試嘅機會都無,我哋自然無從知道佢可以幫到幾多。
好啦,聯賽盃出局,拿確斯變咗文員,星期六就對曼聯。希望到時彭馬返嚟,前場可以順返少少。至於二安,PSG係咪想借……一樣係318五個零。
