【球壇風向室】卡域克轉正半年就出事 INEOS高層反而唔使問責?

呢篇文,其實係來自我同一位曼聯朋友嘅討論。
畢竟曼聯準備又炒人。之前寫卡域克,我已經由部署、戰術、換人,數得嘅都數過晒。對唔住卡域克但我堅係無乜貨可以再寫佢,唔通真係回顧佢由1月到11月嘅曼聯執教生涯咩,呢種文我自己都唔想睇。
跟住,就到我位曼迷朋友登場,因為我講起,當初 INEOS 入主嗰陣,唔止我朋友,連好多其他曼迷都好興奮。你諗下,佢哋等咗咁多年,終於由格拉沙呢隻吸血鬼手上解放出嚟,由一班睇落算係識波之人接手,仲要大刀闊斧又裁員又起球場,雄心壯志咁話要3年內令曼聯重振雄風……
嗯,所以,今篇同其他街外文唔同,嚟望下呢班膠層。
留卡域克,我明喎
如果返到去五月,你問我曼聯應唔應該留卡域克,我無可能話唔留。
大佬呀,你望下佢接手之後頭兩場就贏曼城同阿仙奴,16 場英超擸走 36 分,帶曼聯鎖定第三。
嗰段時間全英超冇一隊攞分多過佢哋。Wilcox 當時話,卡域克靠實力贏得繼續帶隊嘅機會,我覺得好合理。你哋搵個人返嚟執手尾,佢執手尾執到隊波有歐聯踢,俾佢坐正有咩問題先?直頭係天經地義。
而且高層當時講得幾清楚。Wilcox 讚卡域克同球員建立到信任,Berrada 就話,佢哋要揀一個適合手上呢班人、又帶到球會行落去嘅教練,而卡域克嗰幾個月已經證明自己做得到。即係話,佢哋揀完人,對點解揀佢、想佢繼續做啲乜,有齊自己嘅判斷。
只係無諗到攞到歐聯資格之後,下一季份工即刻難做咗。
你決定留佢,咁你準備咗啲乜?
卡域克五月坐正嗰陣,曼聯已經知道兩件事。
第一,下季要踢歐聯,加埋英超同兩個本土盃,開季有四條戰線。
第二,卡斯米路會走。
上季卡域克搵到一對用得順嘅中場,明奈落去接波,卡斯米路喺中堅前面守住。般奴可以留喺前面衝鋒陷陣送波射門。去到今季,多咗波踢,但夏天就完全睇唔到高層有配合到整體去組隊。
表面睇,曼聯係一口氣買咗山度士、泰利文斯同巴利巴三個中場返嚟。
山度士擅長搶返個波再駁腳;
泰利文斯可以喺後面一腳傳穿對手防線;
巴利巴嘅跑動同補位,算係接近卡斯米路。
買巴利巴個方向係啱嘅,問題係佢仲未證明自己又健康又勁,可以長期一個人頂起卡斯米路嗰份工,結果對羅馬嗰場就真係傷出。幾日後返英超踢維拉,卡域克揀咗用泰利文斯拍明奈,山度士坐後備。
呢個係卡域克嘅排陣選擇,大家當然可以問佢點解咁揀;但同時我都好想問,夏窗將最多資源擺晒落中場,球會高層原本預咗巴利巴踢唔到嗰陣,係用邊個組合頂上去守防線前面?
俾你解釋話中場已經做盡咗,再望埋前後,問題仲大。
中堅同左閘,一個新人都無買過;前面雖然收返拉舒福特,但海龍又正式走埋。結果錫斯高一傷,卡域克又要喺安保姆、古亞同舒克斯三個踢法完全唔同嘅人之間搵人頂檔。
所以,班高層夏天計數嗰陣,係咪真心覺得呢副人腳夠踢四條戰線?唔好話曼迷,我呢個車迷都好想知。
卡域克要交代,Wilcox 同 Berrada 呢?
十場八分排第十八。卡域克係領隊,成績跌到咁,高層要換人,我明。
但五月嗰陣拍板推薦佢坐正嘅係 Wilcox 同 Berrada,夏窗建軍買人亦係佢哋兩個管嘅範圍。去到十一月,出嚟主持檢討嘅係 Wilcox,據報準備同占 Sir 建議換帥嘅,又係呢兩位。咁我就好想聽埋佢哋兩個講:除咗教練席要換人之外,自己夏天做落嗰堆決定,有邊一個係睇錯咗?去到下次開窗又會點改?
再講,占 Sir 自己一樣要向曼迷交代。
當初佢接手足球事務嗰陣,親口同 BBC 講過,曼聯換咗咁多任教練都搞唔掂,就應該睇下係咪個工作環境本身出咗事。呢句話,我到今日都覺得好啱。既然成個足球部由佢話事,佢就要講得出自己到底想砌一隊點樣嘅曼聯,同埋今次會叫下面班高層改啲乜。
如果搞咗一大輪,到頭來只係聽完下面報告、大筆一揮批咗換帥就當交咗差,咁只不過係搵另一個人落去坐低。樽入面斟出嘅,咪又係米一久釀。
笑完曼聯,望返車仔
寫到呢度,本來想笑下曼聯兜兜轉轉搵咗咁耐,都仲未搵到條啱嘅路。
跟住轉頭望返自己隊車仔,嗯……我哋好似都仲喺度搵緊。
不過,咩先叫做行啱路?砌到一隊長勝之師?年年都有份爭冠?有就梗係想要啦,邊個會嫌自己隊波贏得多。只係可能真係年紀大咗,我而家睇波最想見到嘅,係車仔就算踢到唔順、落後緊一球嗰陣,只要搶返個波,前面即刻有人肯跑,後面亦有人肯抬起頭搵佢。場波仲有得踢,場上十一個人仲想贏。
曼聯而家傳話已經搵咗普捷天奴接手………嗯,我哋下篇見。
