【球探報告】三次買摩納哥人三次中伏 車仔點解仲敢買Lamine Camara？
車路士同摩納哥做生意，往績可以話係相當有保證。
保證中伏。
巴卡約高、巴迪亞舒尼、迪沙施，三次買人，三個都無踢出符合身價嘅表現。嚴格講，如果連法卡奧嘅借用都計埋，車仔每次去摩納哥搵人，最後都係損手而回，明燈率百分百。
如今轉會窗去到最後直路，車路士又一次敲響摩納哥大門。今次睇中嘅，係22歲塞內加爾中場Lamine Camara，傳聞價錢更加可能高達五、六千萬歐元。偏偏呢單傳聞，又同安素可能離隊綁埋一齊。
網絡世界嘅轉會邏輯一向直接。安素走，Camara嚟，所以Camara就係安素替身。恭喜恭喜，搞掂收工。
咪玩啦，安素邊有咁容易代替。
能夠控制節奏、由後場派牌、長傳轉邊、創造機會，自己又會後上入禁區交出入球，呢種能力組合放眼球壇都唔易搵。真係咁易搵，曼城唔使籌旗啦係咪。就算車仔真係收到一大筆轉會費，想原價買返另一個年輕版安素，恐怕都唔係打開球探資料庫撳幾個Filter咁簡單。
但難以代替，唔代表無法換走。
而對富咸同盧頓兩場，沙比似乎亦開始思考另一個問題：如果安素真係離開，車仔可唔可以唔靠另一個人硬接晒佢所有工作，而係將嗰份戰力拆散，再分配俾成隊波？
咁問題就嚟喇。Lamine Camara究竟係一個根本唔似安素嘅錯誤替代品，定係車路士改變中場分工之後，真正需要嘅新零件？
真係接近，定只係查詢？
傳聞本身唔算空穴來風。
最早係Foot Mercato報道車路士曾經查詢Camara情況，之後Fabrizio Romano亦確認車仔接觸過球員團隊，Camara本人對轉會持開放態度。最進取嘅版本來自Sacha Tavolieri，聲稱兩間球會已經進入談判，價錢可能接近€60m；但Foot Mercato其後仍然強調，車路士尚未送上正式報價。
所以，興趣同接觸應該係真，所謂協議在即就未必。
Camara現年22歲，喺Metz成名後轉投摩納哥。最初主要喺薩卡利亞旁邊踢雙中場（無錯，車仔以前嗰個薩卡利亞），負責由後場接波、轉邊同處理死球；去到近季位置逐漸推前，無球時亦要參與更多高位壓迫同搶第二點。
佢唔係一個突然爆起半季嘅妖人，近兩季都踢超過1,800分鐘，組織同防守產量亦相當穩定。問題只係，當叫價升到五、六千萬歐元，車仔買嘅就唔可以只係「幾樣都識少少」嘅潛力，而要係一個清楚知道放落邊度用嘅中場角色。
唔係6號，亦唔係傳統8號
如果要用一句形容Camara，小弟會形容佢為「識用波嘅掃蕩中場」。
先上佢個人嘅數據雷達圖比較。
近兩季，佢每90分鐘都完成約51次傳球、製造約0.21至0.22 xA，同時創造1.7至1.9次機會。準確長傳亦維持喺每90分鐘三次左右，證明佢唔只識得搶完交俾隔籬，而係真係可以參與後場組織，將個波送去前面。
當然，呢份創造力要戴返少少頭盔。Camara有負責角球同傳中，暫時又無法將Open Play同定位球產量完全拆開，所以唔可以見到xA高少少，就直接當佢係摩納哥版迪布尼。
相比起有波，佢上季更明顯嘅轉變反而出現喺無球階段。Tackles由每90分鐘2.88次輕微降至2.67次，但Interceptions由1.35升至1.80次，Recoveries由6.67升至7.68次，前場搶回球權亦由0.70升至1.02次；與此同時，犯規就由1.96次降至1.36次。
數字唔係話佢防守差咗、無咁肯落腳，而係開始更多靠預判、壓迫同執第二點搶返個波。上季每90分鐘82.71次觸球，加上56%對抗成功率，亦反映佢喺摩納哥中場並非陪跑，而係攻守轉換經常會經過嘅一站。
不過，Camara距離全能仍然有一段距離。佢每90分鐘只有1.02次禁區觸球，唔係會頻密後上入楔嘅8號位；航空對抗成功率只有40%，每90分鐘亦大約被扭過一次，暫時無足夠證據證明佢可以單獨守住防線前面。
所以佢最合理嘅位置，仍然係雙中場其中一人。身邊最好有另一個人幫佢守住位置，等佢可以接波、派牌，再喺失去控球後主動向前追擊。
放入車仔：補唔返安素，可以補返個中場
將Camara同安素放埋一齊，最有趣嘅係，兩人部分數據真係幾乎倒模咁滯。
先上咗佢對車路士另外兩個人嘅雷達比較。
每90分鐘成功傳球係50.81對50.61，傳球成功率85.9%對86.0%，準確長傳2.87對2.74，連xA都同樣係0.21。至少喺接應後場、保持傳送量同向前供應方面，Camara的確有能力接走安素一部分工作。
但一去到禁區附近，兩個人就完全分家。安素每90分鐘有2.94次禁區觸球及0.33 xG，Camara就只有1.02次同0.10 xG。安素上季入到10球，唔單止因為佢識傳波，亦因為佢已經成為車仔其中一個主要後上攻擊點。呢部分Camara明顯補唔到。
反而防守方面，佢同卡些度更加接近。兩人每90分鐘Tackles係2.67對2.79，Interceptions係1.80對1.90，對抗成功率亦同樣約56%。Camara嘅Recoveries甚至更多，前場搶回球權亦明顯高於卡些度。
當然，法甲同英超強度、球隊控球比例同防守方式都唔同，呢堆數字只可以用嚟比較角色輪廓，唔係證明Camara防守勁過卡些度。
於是，問題就由「Camara可唔可以取代安素」，變成「沙比係咪仍然需要一個中場完成安素所有工作」。
對富咸嘅3-4-2-1，羅渣士、彭馬同祖奧柏度集中喺前場製造威脅，兩邊翼衛負責後上；去到對盧頓嘅4-2-3-1，球隊更加直接擺出四個前場攻擊點。陣式唔同，但暫時都睇唔到雙中場被要求好似上季安素咁，長時間衝入禁區做第五個進攻點。
兩場波當然未足以證明呢個就係沙比嘅最終藍圖，但至少見到佢正在思考另一種分工：由前場三至四人加兩閘負責創造及入楔，雙中場就留喺攻勢後方供應、回收球權，同埋處理失去控球後嘅第一下反擊。
如果係咁，Camara就唔需要扮安素。佢只需要同卡些度組成一條夠硬淨、識得出波，又可以迅速搶返球權嘅雙中場。
當然，兩個人都鍾意主動撲出去搶波，亦代表位置分工一定要清楚。Camara空中對抗唔算好，每90分鐘亦大約被扭過一次；一旦佢同卡些度同時被個波吸走，而兩閘又已經推咗上去，後面條防線就會直接面對反擊。
所以Camara唔係一個插落去就可以原裝取代安素嘅零件。佢成立嘅前提，係沙比真係願意改變車仔整套進攻分工，用其他位置補回安素留下嘅火力，再用Camara加強中場供應同攻守轉換。
總結：我最驚嘅唔係摩納哥
車仔連續喺摩納哥中伏三次，今次又走返去摩納哥買人，第一反應係想屌柒班總監都好正常。
不過，Camara亦唔係轉會窗最後幾日先突然由Excel彈出嚟。早喺佢效力Metz、出戰2024非洲盃期間，已經有報道指佢進入車仔視線。
但小弟真正想知嘅，唔係車仔Scout咗佢幾耐，而係Scout完之後，有無寫低一份清楚嘅Job Description。
過去幾年最令人無力嘅，從來唔係車仔買咗太多有潛力嘅球員，而係有時買完先慢慢研究應該放喺邊度。Camara今次啱啱好可以測試，班總監究竟係按住沙比需要搵人，定又只係見到22歲、數據好、摩納哥肯賣，就忍唔住撳多次十連抽。
如果佢係沙比明確要求嘅中場，教練知道要佢做咩，亦接受成隊波需要配合改變，咁就算佢唔係另一個安素，我都理解點解車仔會買。
相反，如果答案仍然只係「22歲、數據好、摩納哥肯賣」，咁第四次中伏就唔係咩詛咒。
純粹係同一條招聘題目，車路士又揀咗同一個錯誤答案。