【死因研究】白禮頓3：0阿仙奴 自爆只係死法白禮頓先係兇手
華文足球圈睇咗轉，對呢場白禮頓3：0阿仙奴嘅分析有但唔入肉，討論就幾乎走向三個極端：一邊話白禮頓踢到識飛、另一邊就話根本唔關對手事，純粹係阿仙奴今場特別廢、仲有一邊就單純笑鳩阿仙奴輸波。
本來我都無諗住踩過界。畢竟我唔係阿仙奴專頁，平時亦無可能場場追住兩隊去睇。但睇完直播，再望埋大家嘅討論同數據，嗯，我話唔打文，其實有少少自欺欺人。
所以姑且多事一次。
首先講明，呢篇文唔係用嚟抽阿仙奴水。如果純粹想抽水，我一句「死阿狗，終於同我哋一齊輸三球，哈哈哈」就已經可以收工；為咗流量，我亦根本唔需要走去睇數據做對比，再寫幾千字同自己過唔去。
呢篇文無意踩低任何球隊或者球迷，純粹係一次戰術同足球討論。如果你入嚟只係想睇我笑鳩阿仙奴，或者已經認定白禮頓無做過任何特別嘅事，純粹係阿仙奴十一個人集體發瘟，咁去到呢度其實已經可以按上一頁。後面寫嘅內容，大概唔會係你想像中嗰篇文。多謝你嘅點擊，下次再見。
另外，平時我將呢批課金數據收埋喺會員文入面，今次難得寫場無車仔份嘅比賽，就當賣大包俾大家睇下辦。只不過「課金透視圖」入面突然無咗倫敦嗰隊藍色笑話，成套圖睇落有少少錯錯哋，大家唔好介意。
最後，喺開始之前，亦要先戴返個頭盔。我知今場已經係阿仙奴連續第四場作客，比賽密度、舟車勞頓同體能消耗一定有影響。部分球員壓迫慢半步、防線回收唔夠快，甚至臨門一腳欠缺銳利度，都唔可以完全撇除疲勞因素。承認呢個背景，唔等於替敗仗搵藉口，只係如果要判斷一隊波點解死，總唔可以連死者之前連續跑咗幾多公里都扮睇唔到。
問題係，體能可以解釋阿仙奴點解無平時咁好，但未必足以解釋白禮頓點樣將呢份疲態放大成一場3：0。
阿仙奴控制個波，白禮頓控制下一腳
先睇阿仙奴原本打算點樣踢。
對住贏完曼聯、氣勢又好、搶迫速度極高嘅白禮頓，阿仙奴自然無打算由第一分鐘同對手鬥癲。較合理嘅做法，自然係先用控球穩定比賽，靠中堅同中場將白禮頓引向一邊，再將個波轉去沙卡或者佐利斯腳下。
只要兩翼可以喺單對單環境接波，阿仙奴就有機會用個人能力打開缺口；白禮頓如果提早橫移，另一邊又會留出空間俾閘位或者奧迪加特後上。唔敢話100%啱，但至少達子喺場上表達出嚟嘅嘢係咁。
阿仙奴全場有62%控球，完成508次傳送，遠高過白禮頓嘅331次。單睇呢兩組數字，好易得出呢個結論：阿仙奴控制住場波，只係前面太廢把握唔到，再被對手幾腳世界波射死。
問題係，控球權屬於阿仙奴，唔代表比賽走向由阿仙奴決定。
白禮頓今場最誇張嘅地方，係佢哋防線橫移嘅速度。個波去到沙卡一邊，翼衛會立即貼近，身後隊友同時向外補位；阿仙奴轉去佐利斯嗰邊，成個防守單位又可以快速移返過去。佢哋唔係等阿仙奴慢慢猜到禁區先開始守，而係個波一離開兩個中堅，壓力已經隨即到達。
白禮頓全場PPDA低至4.9。證明佢哋唔係縮喺禁區等人攻，而係由前場開始追住阿仙奴每一腳傳送撲。更加厲害嘅係，白禮頓錄得19次High Recoveries，阿仙奴只有9次；喺對方半場回收球權亦以34比18領先。
換句話講，阿仙奴即使避過第一下逼搶，個攻擊組織都仲未安全。傳接稍為慢半拍、第一點頂唔乾淨，或者接球者無法即時保護個波，白禮頓已經有人準備搶走第二點。
呢點亦解釋到點解白禮頓可以放心用高波。
佢哋唔係預期每一腳長傳都直接搵到前鋒，而係將高波當成另一種逼搶起點。第一點贏到，立即向前攻擊；第一點輸咗，附近球員就圍住落點搶第二下。阿仙奴中堅可以頂走個波，但未必有時間重新排好隊形。只要解圍落點再次落入白禮頓腳下，防線就要喺尚未完全復位嘅情況下，再守多一次。
所以阿仙奴明明有更多控球，向前效率卻無因此佔優。兩隊前進傳球只係71比66，阿仙奴僅僅領先五次；真正傳入禁區就反過來由白禮頓以23比13領先。
一隊波用508次傳送換到13次傳入禁區，另一隊只用331次就做到23次。呢個差距就已經講咗個故事出嚟。所以如果話阿仙奴今場踢得特別差，我唔反對。
但佢哋唔係朝早起身突然集體肚痛唔識踢波，而係白禮頓堅係踢得好有針對性。
0.02 xG唔係免死金牌
講到白禮頓第一球，支持「阿仙奴純粹自爆」嗰邊當然有充分證據。
高路斯禁區外起腳，阿仙奴無人殺出去封鎖，拉也反應亦唔算理想。個射門本身只有0.022 xG，即係正常大約射一百次先入兩球。由守衛到龍門好似企定定目送個波入網，點睇都似派膠多過白禮頓有咩神機妙算。
呢個批評有一半係啱嘅。
阿迪達嘅防守本身就有明確取捨：塞住禁區中央同高價值射門位置，寧願對手喺外圍起腳。長期計落，俾人射0.02 xG遠射，肯定安全過放人入六碼區。單睇起腳位置，阿仙奴其實已經逼到白禮頓去佢哋願意接受嘅位置。
但接受低概率射門，同企定定任人校炮，係兩回事。
華保根長傳失敗後，阿仙奴原本有機會帶走球權，Diego Gómez卻立即搶回第二點。白禮頓無急住再斬，而係由右邊重新組織，靠連續傳送將阿仙奴防線拉向皮球方向，最後由Kostoulas回傳俾較後位置嘅高路斯起腳。
所以呢球唔係白禮頓偶然執到個波，再靠高路斯鳩射中獎。前面嘅第二點回收，正正延續第一節講嘅逼搶優勢；之後嘅轉移同走位，就負責將高路斯送到無人封阻嘅位置。
當然，戰術只係製造到一次低概率起腳。高路斯仍然需要用個人質素將佢變成入球。佢起腳後嘅xGOT升到約0.27，證明射門處理的確將機會質素提高咗；但亦未去到任何龍門都只能企定定望波，拉也係咪應該做得更好，完全值得討論。
所以責任其實好清楚：白禮頓靠第二點同傳送砌出空位；阿仙奴選擇接受外圍射門，卻無做好最後干擾；高路斯再用超額處理，將低風險變成失球。
呢球既有白禮頓踢得好，亦有阿仙奴執行得差，兩件事本質上無衝突。
逃生門其實有開過，但只開咗十秒
如果第一球仍然可以歸入低概率遠射加防守執行失誤，第二球就更加接近成場波真正嘅死亡時間。
完半場前，阿仙奴終於成功打穿白禮頓。夏維斯喺禁區內將個波交去右邊，沙卡得到全場最清晰嘅埋門機會。呢腳射門有0.56 xG，差唔多佔咗阿仙奴上半場0.79 xG嘅七成。
華保根救出。
五秒後，佢已經將個波交到Diego Gómez腳下；再過七秒，Diego Gómez送前俾Kostoulas；去到44分55秒，個波已經收死拉也。
由最接近追成1：1，到落後0：2，中間只係十五秒；由華保根開出反擊計起，更加只係十秒。
Kostoulas嗰腳同樣只值0.061 xG，所以阿仙奴球迷話自己黑仔，完全無錯。白禮頓頭兩個入球加埋只有約0.083 xG，正常情況未必入到任何一球，今場就兩腳一齊收死拉也。
但將兩邊放埋一齊睇，差距就唔止係運氣。
阿仙奴得到0.56 xG嘅機會，華保根救出；白禮頓得到0.061 xG嘅機會，Kostoulas射入。白禮頓唔止喺中場搶迫同第二點佔優，連兩個禁區入面嘅執行都贏埋。阿仙奴好不容易搵到第一條逃生路線，白禮頓就直接將嗰次撲救變成反擊起點。
換邊後，阿仙奴亦唔係完全無反應。佢哋將PPDA由上半場7.1壓低至5.6，證明達子確實提高咗壓迫強度，想盡快搶返球權。
但我估達子都嚇咗跳，領先嘅白禮頓無縮。
佢哋下半場PPDA仍然維持喺5.2，比阿仙奴更加進取。即使領先兩球，白禮頓仍然繼續向阿仙奴後場施壓，而唔係全隊退返禁區等死。(學嘢啦車路士)
56分鐘嘅第三球，就係另一種處決方法。高路斯角球直接搵到Chema Andrés，後者第一點頂入。白禮頓前兩球已經用咗兩種方法，第三球就輪到死球補刀。
去到呢個階段，阿仙奴已經無得再用原定節奏慢慢拆。阿迪達先後換入Zubimendi、Merino、Eze同Gyökeres，希望增加中場控制同禁區威脅，但白禮頓反而利用阿仙奴壓上後嘅空間，不斷製造更直接嘅機會。Gyökeres同Eze上陣後一次射門都無，反觀白禮頓下半場就製造咗1.88 xG，高過阿仙奴嘅1.24。
所以3：0唔係單純由三腳超水準射門砌出嚟。頭兩球確實有射術同運氣成分，但白禮頓領先後唔止守得住，仲繼續製造足以拉開比分嘅機會。
阿仙奴唔係由第一分鐘俾人打到毫無還手之力。佢哋曾經搵到一條逃生路線，只係條門開咗十秒，華保根就親手閂返，再順便反鎖。
自爆係死法，白禮頓先係兇手
寫到呢度，我唔係想證明話「阿仙奴今場特別廢」嗰班人錯。
我開頭都講咗部份，連續四場作客，球員體能下降；三次Big Chances全部錯失；守衛無及時封阻遠射，拉也亦未交出應有表現。阿仙奴今場確實遠低於自己正常水平，呢點達子打風都打唔甩。
我只係唔認同將所有問題濃縮成一句「自己廢」，然後當白禮頓無做過任何嘢。
我一向唔吝嗇讚美。白禮頓傷咗9個人，結果仍然可以令衛冕冠軍食白果兼贏3：0，今場白禮頓踢得好係事實。足球最成功嘅針對部署，往往就係令對手睇落好似突然唔識踢波。傳送慢半步、接波無空間、第二點永遠遲人一步、想壓出去又被人幾腳打返轉頭。逐個畫面拆開睇，都可以話係球員自己做得差；但當同一種失誤連續出現，就應該問下究竟係邊個逼佢哋不停犯錯。
所以我對今場嘅判詞唔會改。
阿仙奴確實有自爆，但自爆只係死法；白禮頓先係迫到阿仙奴爆嗰個。
今場課金數據圖
以下係今場課金數據圖。正文無提及嘅部分，就留俾各位巴打自己慢慢透視。
