【賽前明燈】阿仙奴對車路士　車仔無得閃電開局嘅話點算？

七個入球，但有問題仲未答到

車仔開季兩場入七球，前面三個人嘅配合的確有料。祖奧柏度回後接應，羅渣士帶波向前，彭馬再搵位接下一腳，幾個人開始知道隊友想做乜。對白禮頓第二球，由祖奧柏度接應交俾羅渣士，再由佢突破後橫傳尼圖射入，就係一個幾舒服嘅例子。呢啲配合值得開心，唔使因為後面失得多，就連前面做得好嘅都一齊抹走。

但兩場波有個共同條件：車仔好早已經領先。

對手一落後，就要考慮點樣追返。未必即刻全軍壓境，但隨住時間過去，中場要推前、兩邊要加人，車仔搶返個波之後，自然更容易搵到可以向前跑嘅位置。羅渣士有地方加速，祖奧柏度可以攻擊中堅身後，彭馬亦有機會喺對方未企返好之前送出最後一腳。早入波嘅好處，唔止係比數牌多咗個「1」，仲係之後條路都可能好行咗。

假設中場無一個專門負責派牌、調節快慢同轉邊嘅人，而對面又企得齊齊整整，個波點樣先可以舒服咁去到前面三個腳下？

反擊嗰陣，搶到波向前送，前面有人跑，好多決定都可以幾直接。但對手已經退好，祖奧柏度回後，中堅可以唔跟；羅渣士接波，面前可能有兩個人等住；彭馬想搵直線，隊友又未拉開傳球角度。個波由左去右、再由右返左，望落一直有人接有人傳，但對面條防線根本無需要郁。搓到最後，可能又要等彭馬自己扭過兩個，或者羅渣士硬爆一次。

呢個先係我想問嘅問題。中場派牌嗰份工，可以由幾個人分擔，可以靠中堅帶波上前，亦可以靠前鋒回接、翼衛後上夾出條路。但總要有人做，唔會因為陣式紙上無寫住「派牌中場」四個字，對手就自動讓條通道出嚟。

阿仙奴有耐性，車仔就唔可以自己心急

今場阿仙奴最值得提防嘅，正正係佢哋有能力令你等。

對維拉嗰場，阿仙奴全場只得七次射門、兩次中目標，要到59分鐘先由沙卡入波。但喺入波之前，佢哋亦無畀維拉製造大量機會，全場更加無一次被射中目標。唔係每一段進攻都順，仍然可以維持住比賽，等下一次機會。連埋首場對高雲地利，兩輪合共只畀對手一次中目標，呢種限制對手嘅能力，就係佢哋可以保持耐性嘅本錢。

當然，今次對住車仔，阿仙奴未必可以照樣將機會壓到咁少。但如果踢到半個鐘仲係0：0，佢哋唔一定會覺得有問題，更加無必要為咗快啲入波，就將中場同防線之間嘅位置全部交出嚟。

到時有機會先心急嘅，反而係我哋。前兩場開波無耐就慶祝，今場突然等極都無，前鋒開始回後搵波，翼衛愈企愈前，中場又想上多兩步幫手。每個人單獨睇都似係想做多啲，但如果無人照顧身後，原本無乜空位嘅比賽，就可能由車仔自己先打開。

更麻煩係，阿仙奴未必要先喺運動戰壓倒你，先有辦法取得領先。上次作客輸1：2，車仔下半場初段明明有得攻，最後仍然係被添巴接應角球頂入奠勝。你可以同佢哋拉鋸大半場，但一次死球失守，下一刻就變成你要追住一隊本身已經好難打穿嘅波。

所以今場如果無閃電開局，車仔第一步要做到嘅，可能係接受場波暫時唔好睇。0：0唔代表套戰術失靈，亦唔需要幾次進攻無結果就全隊衝多兩步。真正要睇沙比功力嘅，係保持住隊形之下，班人可唔可以靠接應同走位，逐少逐少逼阿仙奴離開原本舒服嘅位置。

占士企中間，要供應俾前面三個

講到呢度，卡些度趕唔趕得切固然重要，但另一個值得睇嘅人係占士。沙比已經公開講過，會繼續畀佢大量時間踢中場，睇中嘅包括接波前後嘅判斷、同隊友串連嘅能力，以及企喺中間指揮全隊嘅作用。即係今次唔係臨時叫隊長入去頂住先，而係沙比真係準備將呢份工交俾佢。

占士亦唔係未試過。上季主場對阿仙奴踢成1：1，佢就係中場最搶眼嗰個，全場12次對抗贏11次，車仔踢少個之後仍然有能力護住個波，再帶隊向前。當然，一場好波唔代表今次自動複製，但至少證明面對阿仙奴呢種強度，佢有能力幫隊友保住球權，爭取時間重新接應。

不過贏到對抗之後，下一腳去邊，先係今場真正要睇嘅嘢。如果占士接到波，前面三個全部背住龍門、身邊各有一個守將，咁佢就算企得幾穩，最後都可能只係交返畀中堅。

所以祖奧柏度回後接波嗰陣，彭馬同羅渣士就要有人走向另一個位置。中堅跟出嚟，身後有無人前插？中堅唔跟，祖奧柏度又可唔可以轉身，或者同中場撞完一腳再向前？當阿仙奴收窄中路，翼衛就要喺邊線提供下一個出口，唔好前面幾個一齊返嚟搵波，最後六七個人迫喺同一塊地，大家好似開緊立法會答問大會咁，傾足五十分鐘都無結論。

車仔今次有完整一星期準備，我唔期待沙比突然將所有問題解決晒，但應該有空間練清楚呢啲配合。車仔今次有完整一星期準備，我唔期待沙比突然將所有問題解決晒，但應該有空間練清楚呢啲配合。搵到空位未必要即刻射門，有時只係逼對面一個中場走出原位，再將個波交去佢身後，已經係有意義嘅一步。

前兩場，大家已經見到彭馬、羅渣士同祖奧柏度有能力完成最後幾腳。今場要驗收嘅，係成隊波可唔可以先幫佢哋鋪好前面嗰段路。

💡今場預測

預測一：雙方都有入球

講咗咁耐阿仙奴有幾難拆，我仍然估車仔有波入。前面三個嘅配合已經有啲默契，祖奧柏度回接、羅渣士突破同彭馬最後一腳，足以令對面唔敢鬆懈。要拆足全場可能有難度，但搵到一兩次機會，我相信佢哋有能力把握。

至於車仔自己守唔守得住………兩場失五球，暫時真係未俾到信心我估零封。所以第一個預測，我估雙方都有入球，1：1都算中。

預測二：至少一個入球源自角球攻勢

上次交手三個入球全部由角球開始，雖然今季執法指引有調整，但兩隊都仍然有條件喺死球搵到機會。尤其如果運動戰互相限制，一次角球就可能係打開比分嘅捷徑。

所以第二個預測，我估至少有一球源自角球攻勢，邊隊入都計。直接頂入、短角球配合或者即時第二點補射都算。

星期日晚香港時間11點半，去到酋長球場，當然想贏。五年無贏過阿仙奴，車迷內心點諗好易估，但現實係，我哋同真正強隊中間仍然有距離。

係一場唔易踢嘅比賽，輸波我可以接受，但至少要見到班人遇到困難仲識得搵辦法，唔好一踢唔順就愈踢愈亂，最後又等彭馬救全家。所謂輸得有骨氣，唔止係跑到尾，仲要真係同對面鬥到尾。