（會員限定）【課金透視】阿仙奴2：1車路士　用數據睇下十個煲九個蓋問題

如果將上半場完全剪走，只俾你睇下半場數據，課金EVENT記錄到車路士下半場完成172次傳送，阿仙奴係188次；射門更加係車路士7比6佔優。阿仙奴上半場製造接近1.93 xG，換邊後就跌到0.64。齋睇數字，沙比半場嘅調整似乎相當有效，至少場波終於由阿仙奴單方面出題，變返兩邊都有機會威脅對方。

問題係，車路士下半場7次射門加埋，只有0.28 xG。

即係波確實Hold得耐咗，戰線亦推得前咗，阿仙奴製造嘅威脅更加明顯減少；但由頭到尾，車路士仍然無創造到一次令人覺得「呢球應該要入」嘅機會。場面由捱打變成可以還手，只係每一拳都好似隔住張被打出去，聲就有，痛就未必。

上一篇戰術覆盤已經講過，沙比換邊後將三中堅改成4-2-3-1，邦仔外推右閘、尼圖推上右翼。呢篇唔打算再將同一套陣式搬出嚟講多次。

今次課金DATA真正值得追嘅，係車路士下半場究竟用咩方法，將部分比賽控制搶返返嚟。

沙比唔係無修好部車。問題係每拆一件零件去補另一個窿，原本由嗰件零件負責嘅工作，又會交俾邊個？