【戰術覆盤】阿仙奴2：1車路士　認清現實比盲目幻想更重要

四個人企出面，車路士一開始就準備偷雞

官方將車路士嘅正選陣式列成4-2-3-1，但由場上企位睇，上半場更接近延續對白禮頓嗰套3-4-2-1。邦仔、科芬拿同拿確斯組成三中堅，尼圖同哈圖負責兩邊，無球時直接企五人防線；占士拍住拉維亞，彭馬同羅渣士就留喺祖奧柏度身後。

呢個部署唔難理解。卡些度缺陣，沙比無理由用占士拉維亞同阿仙奴正面搶中場。既然對手一定會將大部分人手推上前，車路士索性先收窄後場，再將反擊出口留喺前面。

其中最有趣嘅畫面，係車路士防守角球時

將四個人留喺禁區外。

正常弱勢一方作客阿仙奴，第一反應應該係十個人全部塞入禁區，最好連領隊都企埋近柱幫手頂。但車路士偏偏留低四個反擊點，逼阿仙奴同樣抽調球員留喺後場，結果禁區內一度只係五對五。

呢個安排清楚反映沙比嘅取態：車路士唔可能成場單靠死守捱過去，必須令阿仙奴進攻時有所顧忌。只要第一點解圍成功，前面立即有足夠人數接應，唔需要等兩個Wing-back由底線跑返上去。

開賽77秒嘅入球雖然唔係反擊，但同樣係趁阿仙奴未重新組織完成落刀。占士由後場開出罰球，拿確斯頂到第一下，哈圖再將解圍頂返中間；羅渣士留喺禁區頂，一腳窩利將個波送入死角。

之後車路士亦唔係完全無再搵到空間。30分鐘祖奧柏度擺脫懷斯，再交俾羅渣士入攝起腳；完半場前，祖奧柏度亦成功放尼圖落右邊反擊，後者射中遠柱。

所以沙比嘅上半場部署唔係無效。車路士知道自己控制唔到中場，就用五後衛頂住，再將足夠人數留喺前面，等待幾次由守轉攻嘅機會。

問題係，呢種踢法提供嘅係偷襲機會，唔係比賽控制。車路士可以突然咬阿仙奴一啖，卻無辦法阻止對手一次又一次重新行近自己。

拉左走右，五人防線照樣被拆

五後衛最大嘅優點係人多，但人多從來唔等於自然識得防守。

如果阿仙奴前場幾個企定定，沙卡留喺右邊、Tzolis留喺左邊、奧迪加特企十號位、夏維斯留喺兩個中堅中間，車路士確實可以逐個對位。問題係阿仙奴由開場開始，就無打算俾佢哋企得咁舒服。

沙卡會移去另一側，夏維斯就拉到車路士左邊，落到哈圖同中堅之間；奧迪加特再因應兩個人嘅走位，選擇進入Half-space或者禁區頂接應。幾個人輪流交換位置，車路士防線每次都要重新決定應該由邊個跟。

哈圖如果跟住夏維斯入中間，邊線就會留位俾對手後上；中堅橫移幫手，另一邊嘅空間又會打開；拉維亞或者占士落後半步，奧迪加特就可以喺防線前面接應。

25分鐘嘅追平球就係呢種拉扯嘅結果。夏維斯由中鋒位置拉到阿仙奴右邊，接應懷斯後轉身推入中路。哈圖未能完全封住佢內切路線，拿確斯亦要顧住禁區中央，最後夏維斯喺禁區邊取得起腳空間，將個波射入近柱。

大馬有掂到個波，當然唔可以話完全無責任。但喺射門出現之前，阿仙奴已經透過換位令哈圖、中堅同雙中場之間短暫失去交接。夏維斯嗰腳本身未必係絕佳機會，重點係阿仙奴可以反覆將車路士拉入同一類選擇題。

死球亦係另一個例子。開賽五分鐘，奧迪加特突然將罰球低送近柱，逼到馬天尼斯倒地處理；11分鐘再用相似方法製造混戰，卡拉菲奧利一度將個波送入網，只係Konsa越位在先。

車路士留四個人喺外圍，的確逼阿仙奴減少禁區內人數；但阿仙奴無同你鬥人頭，反而用低平波、近柱同二次走位令守衛失去預設對位。車路士個方案唔係無針對性，只係阿仙奴有足夠默契，喺同一個結構入面不斷改變細節。

呢個就係兩隊上半場最明顯嘅差距。車路士嘅威脅來自幾次成功執行，阿仙奴嘅威脅就來自一套可以反覆運作嘅方法。

到車路士仲研究緊應該邊個跟夏維斯，奧迪加特已經走咗去下一個答案。

十個煲九個蓋，無卡些度同裸跑一樣

半場守成1：1，沙比並無繼續原封不動捱落去。

換邊後車路士由三中堅轉成更接近4-2-3-1。邦仔移到右閘，科芬拿同拿確斯留喺中央，哈圖就變成左閘；尼圖大幅推前，唔再需要由右翼衛位置跑足成條邊線。

呢個調整明顯係想增加前場人數。上半場車路士搶返個波後，尼圖往往仲喺自己後場；將佢推到右翼，可以更早建立反擊出口，避免祖奧柏度每次接長傳都要一個人等齊隊友。

但十個煲得九個蓋，個蓋搬去邊，另一邊就自然會滾瀉。

尼圖推前之後，後場由五個人變成四個，中場需要負責嘅空間隨即增加。彭馬於是明顯墮後，企位同功能有少少似以前嘅安素，幫占士同拉維亞接波、控制節奏，再嘗試將攻勢送返上前。

呢個安排確實令車路士更容易將個波留住。代價係彭馬一落去蓋中場，前線就少咗一個最識得喺防線之間接波同拉扯嘅人。幾個攻擊球員各自仍然有功能，但去到最後一層，就少咗最重要嗰個加工點。

更麻煩嘅係，彭馬可以幫車路士控制個波，卻唔可以同時代替卡些度保護防線。

50分鐘第二個失球，車路士四後衛本身未算完全失位。Tzolis將個波送入中路，夏維斯背住科芬拿，故意漏過傳送；真正無人接管嘅係由後面入攝嘅奧迪加特。

占士原本應該跟住佢，但注意力被夏維斯準備接波嘅動作短暫拉走。奧迪加特就利用嗰半步空間入禁區，在無人補位之下完成射門。

呢球唔可以寫成占士走漏人就完事。車路士中間只剩下一層保護，占士一旦被牽制，身後就無第二重保險。中堅唔敢放低夏維斯衝出嚟，中場又追唔切奧迪加特，成條中路就咁打開。

沙比60分鐘換入查華利亞同古斯圖，嘗試補充體能同防守覆蓋。但拉維亞離場之後，車路士已經要靠占士同古斯圖兩個閘位球員兼職守住中場。

兩個人都有速度、有對抗，亦願意周圍補位；但當車路士落後、需要拆開阿仙奴Low Block，古斯圖可以幫手撲火，卻唔係用嚟拆牆嘅人。

所以今場唔應該簡化成「無安素所以中場無人派牌」。無安素，車路士會失去控制節奏同向前傳送；無卡些度，問題就由唔識得點樣舒服進攻，升級成中路隨時無人保護。

彭馬可以墮後補組織，占士可以留中間補位置，古斯圖亦可以入場補跑動。但每搵一個人蓋住其中一個問題，佢原本負責嗰個位置就會打開。

無安素，車路士係唔識得舒服咁踢；無卡些度，就同無著底褲無分別。

數據深潛：2：1只差一球，內容究竟差幾遠？

如果只睇射門數，今場甚至有少少似五五波。

阿仙奴全場16次射門，車路士亦有13次；下半場車路士更加以7比6領先。加埋尼圖中柱同二安完場前逼到拉也飛身救波，話車路士差少少就搶到一分，聽落完全合理。

問題係，射門從來唔係逐腳等值。

阿仙奴16次射門累積2.11 xG，車路士13次就只有0.35。阿仙奴有13次射門來自禁區內，車路士只有5次；禁區觸球係44比25，Big Chances更加係4比0。

即係車路士唔係完全無射門，而係大部分攻勢去到禁區外圍就已經要起腳。由頭到尾，球隊無真正將任何人送到一次應該入波嘅位置。

上半場個1：1最能反映比分同內容嘅落差。阿仙奴錄得1.21 xG、9次禁區內射門同3次Big Chances；車路士就只有0.12 xG、兩次禁區內射門。羅渣士開賽嗰腳入球本身只值0.02 xG，純粹係佢用高質素處理，將一個幾乎唔應該入嘅機會變成領先。

下半場車路士嘅控球情況確實改善，成功傳送由136次增加至173次，同阿仙奴嘅191次已經相當接近；射門更加以7比6佔優。

但車路士下半場仍然只有0.22 xG，阿仙奴就有0.90。即使戰線成功推前，球隊仍然無製造任何Big Chance。呢組數字正好說明，控球改善同進攻改善係兩回事。

比賽強度亦唔係問題。車路士全場贏咗43次對抗，阿仙奴係42次；衝刺次數亦以107比104領先。班球員唔係無跑、無撞或者無鬥心。

所謂欠缺中場硬度，唔係車路士輸晒每一次五五波，而係缺少一個可以覆蓋空間、預早截斷走線，再將搶返嘅球權保留下來嘅人。

所以2：1可以叫惜敗，亦可以話車路士戰鬥到最後。但如果將個比分撕走，今場唔係兩支爭冠球隊之間五五開，只係車路士靠球員質素同龍門表現，成功將一場內容差距明顯嘅比賽維持到最後仍然有懸念。

份卷唔係完全唔合格，但肯定無個比分睇落咁接近滿分。

總結：認清現實，唔等於提早投降

老老實實，今場輸波我又未去到非常失望。

至少同上季相比，而家呢隊車路士有本錢同阿仙奴鬥足90分鐘。領先過、反擊威脅過，落後之後亦無立即散晒。去到完場前，球員仲願意跑、願意撞，亦真係差少少就搶返一分。

好啦，全季不敗就無啦。個夢維持咗三輪，算係比好多車迷嘅耐性更加長命。

但英超從來唔係短跑，而係一場由八月跑到五月嘅馬拉松。開局跑得快當然開心，第一次被人拋離亦唔代表成季已經玩完。真正重要嘅係跌出領先群之後，球隊會唔會立即腳軟，定係認清自己仲差幾遠，再繼續一步一步追返上去。

我唔要求沙比第三場聯賽就追得上阿迪達幾年累積落嚟嘅成果，更加唔會因為作客輸俾衛冕冠軍，就話成個Project已完。

爭冠兩個字可以暫時收返入櫃桶，但今季條路仲長。認清現實唔係投降，只係唔再靠幻想幫球隊加分。

至少今場班球員無停低。

咁就繼續跑落去啦，車仔。