【季前分析】羅渣士向禁區內切之後　車仔邊個左閘有能力執到手尾？

三個左閘，原來係三份工作

同之前一樣，雷達圖比較嘅唔係球員能力值，而係三個人平時將工作量放咗喺邊。以下採用25/26球季聯賽每90分鐘數據，百分位就係各自所屬聯賽同位置球員之中嘅相對排名。

不過今次要戴嘅頭盔比平時厚少少。帕拉斯查上季主要喺右邊活動，哈圖嘅數據就混合咗左閘同中堅時間，所以幅圖只適合用嚟推算佢哋踢左閘時可以提供咩功能，唔係三份純左閘履歷直接排高低。

有趣嘅係，三條線幾乎一眼就認得出。

帕拉斯查條粉紅線最明顯向成功盤扭、禁區內觸球同對抗成功率爆出去。佢每90分鐘成功盤扭2.04次、禁區內觸球2.33次，遠高過另外兩人；成功傳中亦有0.79次。簡單講，佢唔係企喺後面諗辦法將個波送上去，而係直接攞住個波，連人帶波一齊搬到前場。

至於接近六成嘅對抗成功率，亦唔可以全部當成防守能力。帕拉斯查大量盤扭同搏得犯規，本身已經會推高整體對抗數字。幅圖證明嘅係佢有能力頂住對手向前推進，未證明嘅係轉到左邊之後，身後防守同位置感同樣無問題。

查華利亞條藍線就無咁極端。佢每90分鐘成功傳球36.29次、預期助攻0.11、成功傳中0.54次，全部有一定產量；奪回球權4.77次更加係三人最高。佢唔會好似帕拉斯查咁一攞波就開Turbo，更多係留喺較後位置接應、轉移，再睇準時機上前支援。攻勢完咗，亦比較習慣返去收拾現場。

呢種踢法睇落無咁刺激，雷達圖亦無一隻角衝到出畫面，但勝在成條左路無論有波定無波，佢都交到基本功課。帕拉斯查似自己揸貨Van送貨，查華利亞就似物流中心，未必親自送到上樓，但會確保件貨放喺樓下看更度，送失咗都有人跟進。

哈圖條綠線就更加似另一個工種。佢每90分鐘成功傳球55.17次，成功率高達92%，遠高過另外兩人；但成功傳中只有0.32次、禁區內觸球1.10次，成功盤扭亦只有0.55次。佢嘅重點唔係不停落底，而係留喺較後位置參與組織，必要時由左閘移入中場，幫球隊將第一階段攻勢駁順。

當然，哈圖部分數據來自中堅位置，大量傳球唔等於佢踢左閘時都會原封不動複製。但至少角色方向相當清楚：帕拉斯查想將自己搬去前場，查華利亞想將個波穩定送上去，哈圖就想將球隊嘅出球起點搬入中路。

三個人名義上都可以踢左閘，實際上根本係三份不同職位。問題自然唔再係邊條線最大，而係羅渣士離開邊線之後，車路士究竟想用邊一份工補返個窿。

羅渣士入中路，左閘就要補兩個窿

羅渣士由左邊向內走，最直接留下嘅當然係闊度。無人留喺邊線，對手右閘就可以跟住收窄，中路原本已經逼迫嘅空間只會更加塞。左閘向前壓，目的就係逼對手仍然要分一個人出去守住外線，唔可以全屋人一齊迫入廚房。

但左閘一壓上，第二個窿就會喺佢身後出現。

所以左閘面對嘅其實係一份幾仆街嘅工：球隊有波時要企到最前拉闊，失去控球嗰刻又要立即出現喺最後面。最好識分身，識瞬間轉移，人工只出一份。

帕拉斯查係解決第一個窿最直接嘅人。佢可以留喺外線接波，再靠盤扭同推進自己將個波帶入危險區域。羅渣士向內切之後，左路唔會因此變成無人嘅後巷；對手右閘仍然要留意邊線，羅渣士亦可以專心喺Half-space接波或者衝入更深嘅禁區位置。

代價係，帕拉斯查一旦推到最前，身後就要有人包底。佢每90分鐘奪回球權只有3.39次，唔代表佢懶得防守，而係上季角色本身就要求佢長期留喺前面。放返落車路士，左中堅要準備橫移，中場亦要即刻填住佢留下嘅通道。帕拉斯查幫羅渣士得到自由，嗰張單最後就會寄去其他隊友度。

哈圖就優先處理到第二個窿。當羅渣士向內移動，哈圖可以留喺較後位置，甚至一齊移入中場，令車路士控球時保留足夠人數防止反擊。攻勢失敗，佢唔需要由對方底線跑返半場救火；球隊亦可以隨時由四後衛變成三人防線，減少左邊被一腳直線打穿嘅機會。

但如果哈圖內切、羅渣士又內切，條左線就真會變成廣場，空到可以俾大媽跳廣場舞。車路士要靠其他球員輪流拉出去，或者接受左路主要用短傳同移位入禁區，而唔係沿住邊線直接推進。哈圖令身後穩定，卻未必補得到羅渣士留下嘅闊度。

查華利亞就企喺兩個極端中間。佢有能力上前傳中同製造機會，但唔需要每次攻勢都衝到最盡；每90分鐘4.77次奪回球權，亦反映佢比較習慣喺攻守轉換後重新搶返位置。換句話講，佢未必可以將外線上限推到帕拉斯查咁高，亦無哈圖咁適合直接加入後場出球，但可以將兩份工作各自做一部分。

問題係「兩邊都做一部分」，有時亦代表兩邊都要有人幫手。對手縮得夠深，查華利亞未必可以單靠盤扭拆開外線；車路士大舉壓上，佢亦唔會突然變成第三個中堅包辦身後。佢降低咗左路對配套嘅要求，但無憑空消滅嗰條矛盾。

所以羅渣士向內走之後，車路士唔係單純搵一個左閘補位，而係要同時填返外線闊度同反擊防守兩個窿。帕拉斯查優先填前面，哈圖優先守後面，查華利亞就嘗試兩邊各填一半。

至於邊個先係正選答案，最終要先睇沙比願意將其餘嗰半份工作，交俾邊個埋單。

總結：揀左閘？其實係揀陣形

返去開頭條問題：「羅渣士向內走之後，邊個左閘最有能力補返條邊線，又唔會放生身後？」

答案係，無人可以同時將兩份工作做到最盡，有古古都唔得。左閘企得越前，身後自然越空；留得越後，羅渣士讓出嚟嘅邊線就越容易無人接管。所謂最適合，唔係搵到一個識影分身嘅六邊形戰士，而係睇球隊打算用咩陣形，將剩低嗰份工作交俾邊個。

如果沙比用四後，查華利亞會係配套成本最低嘅答案。佢可以選擇性壓上，唔需要每次攻勢都衝到對方底線；失去控球之後，亦比較習慣返去保護左路。佢未必可以單靠盤扭將對手右閘拆散，亦無哈圖咁大量參與後場組織，但勝在唔需要全隊為咗佢重新執位。羅渣士可以內切，左閘又未至於長期失蹤，成套左路比較容易維持平衡。

如果沙比用三中堅，帕拉斯查嘅上限就會最高。身後多一個左中堅包底，佢可以更加放心壓上，直接將翼衛當成半個翼鋒使用。盤扭、推進同禁區參與全部可以放大，防守位置感同身後空間就由三中堅結構分擔。呢個時候嘅帕拉斯查唔係勉強客串左閘，而係利用翼衛位置，將自己最擅長嗰部分搬去左邊。

哈圖就唔係兩者之間嘅第三順位。佢更加似一個改變陣形嘅掣。名義上由左閘開波，控球時可以移入中場或者跌落左中堅，幫球隊砌出三人出球或者3+2結構。佢未必親自填滿邊線，但可以令身後提早有人睇住，容許其他球員更加進取。換句話講，查華利亞同帕拉斯查係用不同方法完成左閘工作，哈圖就索性重新定義嗰份工作。

所以現階段嘅判決係：四後衛最穩陣嘅預設答案係查華利亞；三中堅之下，最有能力將左路攻擊上限推高嘅係帕拉斯查；哈圖則係當沙比想喺比賽途中改變出球結構時，最有價值嘅變形工具。

車路士表面上有三個左閘，實際上擁有嘅係三種分配左路工作嘅方法。帕拉斯查負責填前面個窿，哈圖優先守住後面個窿，查華利亞就嘗試兩邊各補一半。

所以沙比每次揀左閘，真正決定嘅唔係邊個坐正，而係羅渣士向內走之後，剩低嗰張單準備交俾邊個埋。