【車迷觀點】史堡五戰全敗失20球　BlueCo割韭菜割到連根拔起

五戰全敗，戴幾多頂頭盔先遮得住？

如果齋睇賽果，史堡今個夏天嘅戰績已經唔係普通核突，而係樣衰到好似現代美術咁款。

對士砵亭輸0：7、對布力般流浪輸0：2、對白禮頓輸3：4、對艾華斯堡輸2：5，再對弗賴堡輸0：2。五場主要熱身賽全敗，合計入5球、失20球。嚴格嚟講，弗賴堡當日仲有另一場以青訓為主嘅比賽，史堡同樣輸0：2；所以你真係想落井下石，甚至可以寫成六戰全敗。（但做人留一線好，我哋計五場算啦。）

不過同車仔一樣，熱身賽姐，唔好咁認真……

0：7嗰場尤其有巨大水份。士砵亭當時已經踢緊第五場熱身賽，史堡先啱啱開機，陣中又有大量後備、青年軍同試驗性質嘅人腳。一邊已經開恒Turbo，另一邊引擎都未撻得著，玩到少林足球咁大炒40比0都唔代表新季一定會降班。

但後面先係問題。

對白禮頓入到三球，證明前場唔係完全無反應；但到世盃兵陸續歸隊，史堡面對德乙升班馬艾華斯堡，仍然由半場2：2踢到最終輸2：5。對弗賴堡嘅組織同防守雖然有改善，最後依然零入球兼繼續輸波。五場入面唔係場場都踢得差，但無論點樣轉陣、換人同加返主力，禁區都照樣失控。

咁表面證供講完……死因係咪我講嘅咁簡單先？

半年拆三次，砌唔返先係正常？

答案係：

史堡今日個爛攤子，的確有大半係BlueCo親手拆出嚟；但又唔可以求其將所有人腳流失都賴晒車路士。

第一刀早喺一月已經劈咗落嚟。主角當然係以羅生為首嘅一連串事件。

羅生季中直接升職去車路士，帶領車迷走入黑暗，史堡唯有臨時搵O’Neil接手；同一時間，沙亞被車仔提早收回，柏艾斯亦結束借用轉去河床。柏艾斯喺史堡本身唔算主力，走咗未至於世界末日；但短時間內同時換教練、抽走正選中堅，再改動陣容配置，原本建立咗半季嘅默契就已經要重新嚟過。

去到季尾，BlueCo再好似清倉咁，見到邊件啱用就逐件貼Label放落袋。

隊長艾美夏加盟車路士，巴高亦被車仔買走，正選龍門彭達斯借滿歸隊。前者係史堡前場最重要嘅速度同縱深來源，中間嗰個負責左路推進、組織同定位球，後者就守住最後一關。換句話講，唔係求其走咗三個人，而係由前場支點、後場出球到龍門，成副骨架一次過少咗三節。

然後連負責砌返副骨嘅人都走埋。O’Neil接手不足半年就轉教葉士域治，史堡半年內迎來第三位教練。新帥Hugo Oliveira七月中先正式上任，接過手嘅唔係一隊有少少甩漏嘅成品，而係一箱無說明書嘅Ikea式DIY家具組合，嗯，諗起就頭痛。

更加搞笑嘅係，史堡唔係今日先知道呢批人會走。

彭達斯本身就係借將，借期幾時完一早定好唔係突然收走；艾美夏加盟車路士更加2025年就安排好；巴高被出售亦係BlueCo養成、升值再套現嘅標準流程，內部一早就做好通知。球員離隊本身唔係意外，真正令人R晒頭嘅係，明明交貨日期一早寫晒落Calendar，去到開季前幾星期，替代品仍然未搵齊。

龍門位置，佐真遜雖然已經去到史堡，借用程序仍未完成；中堅Doukouré受傷，後防仲穿緊窿；前面Panichelli十字韌帶重傷，Luković亦有傷，Mara先啱啱恢復操練，最後甚至要安斯素客串中鋒。Moreira、Doué同安斯素自己又仍然有離隊可能，搞到新教練唔止要研究點樣排陣，仲要估下開季嗰日夠唔夠11條友開波。

不過，如果BlueCo只係今次補貨慢咗，轉會窗完結前買齊人，件事最多都只係一次核突嘅季前甩轆。真正危險嘅地方係，史堡今次唔一定仲有以前咁多空間慢慢砌。

因為拆骨之外，佢哋今季仲要面對另一份大禮：無歐戰收入，加埋UEFA張€13M牛肉乾。

無歐戰再收牛肉乾，BlueCo自己玩死自己

首先講清楚少少，€13M其實只係即刻要交嗰部分。

UEFA判史堡嚴重違反SCR，完整罰款係€25M，當中€13M要現兜兜即磅，另外€12M就睇佢哋2026年能否大幅降低球隊成本比例。SCR…跟開我嘅車迷應該熟，唔重提啦。

€13M大約等於史堡上季殺入歐協聯四強賺到嘅收入。即係成班球員辛辛苦苦踢足一季，喺UEFA收到錢再原封不動還返去不但止，仲要欠多12m。更仆街嘅係，今季連呢袋錢都無得再賺，因為史堡連歐戰都無得踢。

無歐戰代表少咗獎金、門票同商業曝光，收入個分母縮細；但人工同轉會攤銷唔會因為星期四晚得閒咗就自動消失。要將比例壓返落70%，最直接嘅方法始終係控制支出，同繼續賣人套現。

講到賣人，簡直係BlueCo拿手好戲。

單計2025年，巴華、沙亞同夏比迪亞拉已經帶來約€80M轉會收入；今夏再賣巴高，Moreira、Doué、安斯素等人亦仍然可能離隊。但問題唔係咁簡單。

史堡愈成功將球員養大、升值同出售，就愈頻密失去已經適應體系嘅主力；戰績一動盪，就更加難取得歐戰收入；無歐戰收入，條數又更加難壓低，最後唯有再賣人。

成件事變成一個非常BlueCo嘅死循環：

戰績動盪→無歐戰收入→財政壓力增加，繼續出售主力→出售主力之後，新教練又要由頭砌過→戰績自然更加容易動盪。

當然，BlueCo未死透嘅。史堡仍然有轉會收入，轉會窗亦未完，龍門、後防同中鋒仍然可以補貨；五場熱身賽更加唔足以證明成套養成模式失敗。

但問題從來唔係「點解要賣人」，而係當一套模式要求球隊年年拆走最成熟嘅零件，管理層有無能力喺下一批貨成材之前，保住最基本嘅延續性？

史堡最尷尬嘅地方，正正係BlueCo模式唔係失靈，而係運作得太順。Excel計到每個球員幾時升值、調動同套現，但計唔到一隊波每年拆完再砌，要幾耐先重新變返一隊波。

韭菜可以割但唔可以拔

諗咗一輪，最初我想寫拔苗助長，但諗下又好似唔完全準確。BlueCo種出嚟啲苗唔係無長，直頭長得幾好；問題係每逢有一棵開始成熟，佢哋就立即連根拔起，搬去車路士或者拎出市場套現。

養成球會要賣人，其實天經地義。韭菜長成唔割，唔通真係留返嚟開花咩？問題係正常收割會留底條根，等下一批慢慢長出嚟；BlueCo而家嘅做法，就似見到邊棵生得好，連根、泥土同隔籬嗰幾棵一齊剷走。

球員養成同球隊養成，從來係兩回事。一個新仔可以喺半年內升值，但一隊波要靠教練、骨幹、角色同默契慢慢生根。每年賣走一兩個主力，球隊仲可以靠原有骨架補返；但當連教練、隊長、龍門同幾個核心位置一齊換，嗰個已經唔叫收割，而係重新開荒。

所以史堡最需要證明嘅，唔係下一批幼苗夠唔夠高潛力。BlueCo已經證明咗自己識買人、識養人，亦非常識賣人。真正未證明嘅，係佢哋識唔識留下足夠嘅根，令史堡唔使每逢收成之後，都變返一塊爛地。

否則當然可以年年豐收，但史堡永遠只會係一間成功嘅育苗場，成為唔到一隊真正成熟嘅球隊。史堡嘅球迷………(如果你哋真係存在)，希望你哋睇到佢成熟嘅一日啦。